Yezekiyele 37 - MUKANDA WA MYIDI MUKULU

Mvidi Mukulu udi uleja mifuba miume ipeta mubidi, ijuka ne muoyi

¹ Bukole bua Maweja-Nangila kuntulukila. Mueyelu wende kungambula, kuya kunteka mu tshibandabanda tshialabale, tshivua tshiuwule ne mifuba ya bantu tente.

² Maweja-Nangila kungendesha miaba yonsu ivua mifuba mu tshibandabanda atshi. Nanku meme kumona ne: mifuba ayi ivua ya bungi be, ikavua miume nyonyonyo.

³ Ke Maweja-Nangila kunkonka ne: — Yezekiyele, ngambila tumone, mifuba eyi idi mua kupeta kabidi muoyi anyi? Meme kuandamuna ne: — Maweja-Nangila Mvidi Mukulu, wewe nkayebe ke udi mua kumanya.

⁴ Kuambaye kabidi ne: — Ambila mifuba eyi mu dina dianyi ne: “Nuenu mifuba miume nyonyonyo, telejayi!

⁵ Maweja-Nangila Mvidi Mukulu udi unuambila ne: Ndi musue kunufulula, nupeta muoyi.

⁶ Ndi nnuasa mijilu, nnupingajila munyinyi, nnubuikila dikoba. Pashishe nennupingajile mueyelu wenu, bua nupete muoyi. Nanku nenumanye ne: meme ndi Maweja-Nangila.”

⁷ Meme kuambila mifuba malu anu bu muvua Maweja-Nangila muntumine diyi. Pantshivua ngakula, meme kumvua mutoyi. Mifuba ivua ituadija kutuangana, mufuba onsu uvua uya muaba uvua muukumbanyine.

⁸ Meme kumona mifuba kupeta mijilu ne minyinyi, dikoba dibibuikila. Kadi mueyelu kauvuaku to.

⁹ Nanku Maweja-Nangila kungambila ne: — Muntu, bikila mueyelu wa muoyi, uwambile ne: “Mueyelu wa muoyi, Maweja-Nangila udi ukutumina diyi ne: Ufumine ku nseke yonsu, ubuele munda mua bitalu ebi bua bipete muoyi.”

¹⁰ Meme kuakula miaku ivua Maweja-Nangila musue. Mueyelu wa muoyi kubuela mu bitalu, kupetabi muoyi, kuimanabi kulu. Kuenzabi tshiluilu tshia bantu ba bungi bapite.

¹¹ Maweja-Nangila kuamba kabidi ne: — Yezekiyele, mifuba eyi idi ituleja mudi bena Izrayele. Bena Izrayele badi bamba ne: “Tudi bu mifuba miume nyonyonyo. Tshitudi mua kutekemena kabidi ntshinyi? Tshitudi mua kuenza kabidi ntshinyi?”

¹² Nanku ubambile ne: meme Maweja-Nangila ndi mbalaya ne: “Nembulule nkita yenu. Nennujule nuenu bantu banyi. Nennupingaje mu Izrayele mu ditunga dienu.

¹³ Nenujadike ne: meme ndi Maweja-Nangila pandi mbulula nkita yenu bua kunujulamu,

¹⁴ pandi nnupingajila Mueyelu wanyi wa muoyi, pandi nnusombesha mu ditunga dienu. Eyowa, nenumanye ne: meme Maweja-Nangila ndi nkumbaja tshimvua mulaye. Meme Maweja-Nangila Mvidi Mukulu, ndi njadika nanku.”

Maweja-Nangila neasangishe bena Izrayele bonsu pamue

¹⁵ Maweja-Nangila kungambila ne:

¹⁶ — Yezekiyele, angata tshitupa tshia dibaya, ufundepu miaku eyi: “Yuda ne bena Izrayele badi mu bukalenga ebu.” Pashishe wangata tshitupa tshia dibaya tshikuabu, ufundepu ne: “Yozefe (nansha Efrayime) ne bena Izrayele ba mu bukalenga ebu.”

¹⁷ Uteke bitupa bia mabaya ebi bituangane mu tshianza tshiebe bua bimueneke tshintu tshimue.

¹⁸ Nanku bana benu nebakuebeje ne: utunwuije tshiudi muenze atshi.

¹⁹ Ubandamune ne: “Maweja-Nangila udi unumanyisha ne: Ndi ngangata tshitupa tshia dibaya tshidi tshileja Yozefe ne bena Izrayele badi mu bukalenga buende, bua kutshituangaja ne tshidi tshileja Yuda ne bena Izrayele badi mu bukalenga buende. Nebituangane mu tshianza tshianyi, bishale tshintu tshimue.”

²⁰ Wewe Yezekiyele, ulame mu tshianza tshiebe bitupa bia mabaya bidi ne miaku iudi mufunde, bua bantu bonsu babimone.

²¹ Pashishe newambile bantu tshindi meme Maweja-Nangila Mvidi Mukulu mubamanyishe ne: “Nuenu bena Izrayele, nennupatule munkatshi mua bisamba bia bantu munuvua baye. Nennusangishe, nnupingaje mu ditunga dienu.

²² Koku aku, nennukunguje nushale tshisamba tshimue, pa mikuna ya Izrayele. Mukalenga umue neikale mfumuenu bonsu. Kanuena nukosoloka kabidi mu bisamba bibidi, nansha makalenga abidi to.

²³ Kanuena nudinyanga kabidi pa kutendelela mvidie mikuabu ya manyanu, pa kuenza malu mabi a mishindu yonsu. Nennusungidile bua nulekele mibi yonsu ivua inupetesha tshibawu kundi. Nennumushe mikiya. Nenuikale bantu banyi, meme nengikale Mvidi Mukulu wenu.

²⁴ Muntu mufuanangane ne muntu wanyi Davide neikale mukalenga wenu, mulami wenu umuepele. Nenuitabe meyi anyi. Nenukumbaje mikenji yanyi yonsu imvua munupe.

²⁵ Nenusombe mu ditunga dimvua mupe muntu wanyi Yakobe, mutua bankambua benu basombe. Nenushalemu kashidi, nuenu, bana benu, ne ndelanganyi yenu yonsu. Muntu mufuanangane ne muntu wanyi Davide, neashale mukalenga wenu kashidi.

²⁶ Nentue nenu ndondu bua kunupesha bupole bua kashidi. Nemvudije bantu benu. Nenteke nzubu wanyi munkatshi muenu kashidi.

²⁷ Nensombe munkatshi muenu. Nengikale Mvidi Mukulu wenu. Nuenu nenuikale bantu banyi.

²⁸ Bisamba bikuabu nebimanye ne: ndi Maweja-Nangila, ndi mujidile bena Izrayele bua bangenzele mudimu. Bualu nzubu wanyi neikale munkatshi muenu kashidi.”