Yezekiyele 36 - MUKANDA WA MYIDI MUKULU

Bena Izrayele nebapingane mu ditunga

¹ — Wewe Yezekiyele, umanyishe mikuna ya mu Izrayele, iteleje bindi meme muyambile ne:

² meme Maweja-Nangila Mvidi Mukulu ndi nnuambila ne: “Baluishi benu bavua banuseka, bamba ne: ‘Mpindiewu mikuna ya kale ya mu Izrayele ikadi yetu!’ ”

³ Ke pandi nkulomba, wewe Yezekiyele, bua umanyishe bena Izrayele bindi nkuambila. Ndi musue kubambila ne: “Ndi mumone ne: nseke yonsu badi baluisha mikuna ya Izrayele, bakeba kuyikuata. Ikadi mu bianza bia bantu ba bisamba bia bantu benyi, badi bayipenda, bayiseka.”

⁴ Nanku, wambila mikuna ne: “Nuenu mikuna ya mu Izrayele, telejayi bindi meme Maweja-Nangila Mvidi Mukulu mulaya bua mikuna minene ne mikese, bua misulu ne bibandabanda, bua miaba idi minyanguke mishale makolu, bua bimenga bienu bidi munda mutupu, bivua bantu bavua nenu mutumba banyenga, bapetula.

⁵ Meme Maweja-Nangila Mvidi Mukulu ndi ngamba ne: Tshiji tshidi tshingenza. Nanku ndi ntandisha bisamba bidi ku mutumba, nangananga bena Edome. Bantu aba bavua bakuata ditunga dianyi, biba biakudia bivua mu mpata. Bavua basanka kabayi ne luse.”

⁶ Nanku wewe Yezekiyele, umanyishe ditunga dia bena Izrayele, umanyishe mikuna minene ne mikese, misulu ne bibandabanda ne: “Meme Maweja-Nangila ndi ne tshiji tshikole. Bavua banupenda, banupepeja kudi bisamba bikuabu.

⁷ Nanku meme Maweja-Nangila Mvidi Mukulu ndi nnulaya ne: bisamba bidi nenu mutumba ebi nebabikengeshe pabi.

⁸ Tshikondu atshi, pa mikuna ya Izrayele, mitshi neyipatule mabeji, ikuama bimuma, bua kunudisha nuenu bena Izrayele bantu banyi. Bualu nukadi pa kupingana mu ditunga dienu.

⁹ Eyowa, nennuambuluishe, nengenze bua buloba buenu babusekunune, bamiaminamu ntete.

¹⁰ Nemvudije bungi bua bantu bebe mu ditunga dijima dia Izrayele. Bantu nebase kabidi mu bimenga, bualu bionsu bivua binyanguke, nebabiakaje.

¹¹ Bantu ne nyama nebivulangane miaba yonsu. Nenuikale bantu ba bungi, nupete ndelanganyi mivule. Ditunga nedikale ne bantu ba bungi bu bangabanga. Nennuendeshe diakalenga dipite dia bangabanga. Nanku nenujadike ne: meme ndi Maweja-Nangila.

¹² Nuenu bantu banyi, nennusombeshe miaba yonsu mu ditunga dienu. Ditunga dijima nedikale dienu, kabakununyenga kabidi bana benu to.

¹³ Meme Maweja-Nangila Mvidi Mukulu, ndi ngamba ne: Bantu badi bamba ne: ditunga dia Izrayele didi bu nyama wa tshidika, udi udia bana badiye mulele.

¹⁴ Nanku, bituadije ku mpindiewu, ditunga kadiena didia kabidi bantu badi to, kadiena dinyenga kabidi bantu bana babu to. Meme Maweja-Nangila Mvidi Mukulu, ndi njadika nanku.

¹⁵ Kanuakumvua kabidi mudi bisamba bikuabu binuseka, binupetula. Nanku ditunga dienu kadiena dishipesha kabidi bana benu to. Meme Maweja-Nangila Mvidi Mukulu, ndi njadika nanku.”

Maweja-Nangila neasangishe bena Izrayele bonsu pamue

¹⁶ Maweja-Nangila kungambila ne:

¹⁷ — Yezekiyele, teleja. Patshivua bena Izrayele mu ditunga diabu, bavua ne nsombelu mubi. Ke muvuabu banyanga ditunga diabu. Bua bubi buabu bavua bapie mikiya, amu bu mudi bakaji badi bajimija mashi padibu ku tshijila.

¹⁸ Batata banyanga ditunga bualu bavua bashipa bantu, batendelela mvidie mikuabu. Ke pandi mubanyoke ne tshiji.

¹⁹ Mvua mubatangalaje munkatshi mua bantu bakuabu, mu matunga a bende. Ke mumvua mubanyoke bua bubi buabu, bua nsombelu wabu ne bua ngenzelu yabu.

²⁰ Nanku, mu bisamba bionsu muvuabu baye, bantu bavua bapepeja dina dianyi dia tshijila, bua tshilema tshivuabu benza. Bualu bantu bavua bamba ne: “Bantu aba mbantu ba Maweja-Nangila, kadi bavua ne bua kumuka mu ditunga diende.”

²¹ Nanku, mvua mumvue dikenga, pa kumona muvua bantu bakuabu bapetula dina dianyi dia tshijila, bua tshilema tshivua bena Izrayele benza bavua bafika mu matunga abu.

²² Nanku ubamanyishe tshindi meme Maweja-Nangila Mvidi Mukulu ngamba ne: “Malu andi musue kuenza, tshiena ngenza buenu nuenu bena Izrayele to. Kadi ndi ngenza bua bantu banemeke dina dianyi dia tshijila, dinuvua bapepeja mu bisamba munuvua baye.

²³ Nansha nuenu bamane kumpepeja kumpala kuabu, nembaleje mundi Maweja-Nangila Mvidi Mukulu munene ne wa tshijila. Nebamanye ne: ndi wa tshijila padibu bamona bindi nnuenzela. Meme Maweja-Nangila Mvidi Mukulu, ndi njadika nanku.

²⁴ “Pandi mumane kunumusha munkatshi mua matunga a bantu munuvua, nennusangishe, nnupingaja mu ditunga dienu.

²⁵ Nennupumuine mayi matoke pambidi penu bua kunumusha mikiya. Eyowa, nennumushe bubi buenu buonsu, ne bukoya bunuvua bapete pa kutendelela mvidie mikuabu.

²⁶ Nennupe muoyi mupiamupia. Nembueje mueyelu mupiamupia munda muenu. Nengumushe muoyi wenu mupape bu dibue, mpingaja muoyi wa muntu.

²⁷ Nenteke Mueyelu wanyi munda muenu. Nenku nennuambuluishe bua nuitabe meyi anyi, nulame mikenji imvua munupe, nuyikumbaja.

²⁸ Nanku, nenusombe mu ditunga dimvua mupeshe bankambua benu. Nenuikale bantu banyi. Meme nengikale Mvidi Mukulu wenu.

²⁹ Nengumushe bubi buonsu pambidi penu. Tshiena nnutumina kabidi tshiyole tshia nzala to. Kadi nemmeneshe ntete mimpe ya kuenza bukula. Nennupeshe bintu bia bungi mu madimi enu.

³⁰ Nemmeneshe mitshi, ikuama bimuma bia bungi. Nenupete biakudia bia bungi mu madimi. Nanku kanuakufua kabidi bundu ku mesu a bantu ba bisamba bikuabu bua nzala inudi nayi.

³¹ Nanku nenuvuluke munuvua basombe bibi, benza malu mabi. Nenunyingalale bua bilema bienu, ne bua malu enu mabi anuvua benza.

³² Numanye bimpe ne: tshiena ngenza bionsu ebi, bualu nuenu nudi bantu bimpe to. Meme Maweja-Nangila Mvidi Mukulu, ndi njadika nanku. Nuenu bena Izrayele, tshienu nkumvua bundu bua malu mabi anuvua benza.

³³ “Meme Maweja-Nangila Mvidi Mukulu, ndi ngamba ne: Pandi mumane kumusha mikiya yonsu inudi nayi bua malu enu mabi, nenteke bantu mu bimenga, nebibakulule miaba yonsu ivua minyanguke.

³⁴ Madimi avua bantu balekela, nebaadime tshiakabidi. Bapitshi ba mu njila kabakumona lububa ku muelelu wa njila to.

³⁵ Bantu nebambe ne: ‘Batua banyange ditunga edi, kadi mpindiewu dikadi bu lupangu lua Edene. Bimenga bivuabu babutula, bashiya makolu, mbamane kubiasulula. Bantu badi basombamu.’

³⁶ Nanku, bantu ba bisamba bidi bishale nenu mutumba, nebamanye ne: meme Maweja-Nangila, ndi ngasulula bimenga bivua bishale makolu. Ndi nkuna tshiakabidi biakudia mu mbuba. Meme Maweja-Nangila ndi njadika nanku. Nenkumbaje bimvua mulaye.

³⁷ “Meme Maweja-Nangila Mvidi Mukulu, ndi ngamba ne: Nengitabe bua bena Izrayele basengelele bua meme kubambuluisha. Nembavudije, bikale bungi bu tshisumbu tshia mikoku.

³⁸ Mu matuku a bibilu, mu Yerushalayime muvua nyama ya bungi ivuabu balambule. Bavua bafike nayi bisumbu ne bisumbu. Nanku bantu badi ne bua kuasa tshiakabidi mu bimenga bienu bidi bishala makolu mpindiewu, nebikale bungi bua nyama ayi. Nanku, bantu bonsu nebamanye ne: ndi Maweja-Nangila.”