Yezekiyele 33 - MUKANDA WA MYIDI MUKULU

Mvidi Mukulu udi uteka Yezekiyele bua ikale mutentekedi

¹ Maweja-Nangila kungambila ne:

² — Yezekiyele, vuluija bena Izrayele malu adi enzeka misangu yonsu indi nduisha ditunga. Bantu ba mu ditunga badi basungula muntu munkatshi muabu bua ikale mutentekedi.

³ Padi mutentekedi umona tshiluilu tshia baluishi, diakamue udi wela mpungi bua kudimuja bana babu.

⁴ Padi muntu mumvue mpungi, ulengulula, baluishi bamukuate, bamushipe, yeye nkayende mmudikebele lufu.

⁵ Muntu awu mmufue bua tshilema tshiende, bualu uvua mumvue bamudimuja, yeye kulengulula. Bu yeye mudimuke, uvua mua kushala ne muoyi.

⁶ Kadi padi mutentekedi umona tshiluilu tshia baluishi kayi wela mpungi, kayi udimuja bana babu, baluishi bakuate muntu, bamushipe, tshilema ntshia mutentekedi. Meme nengase mutentekedi tshilumbu tshia pa lufu lua muntu awu.

⁷ Yezekiyele, wewe ke undi muteke mutentekedi bua kudimuja bena Izrayele. Uteleje mundi nkuambila, ubele bena Izrayele mu dina dianyi.

⁸ Meme mudimuje muntu ne: udi ufua bua bubi buebe, wewe kuyi mumubele bua akaje nsombelu wende, muntu ewu neafue bua bilema biende. Kadi wewe, nenkuase tshilumbu bua lufu lua muntu awu.

⁹ Kadi wewe mubele muena malu mabi bua akaje nsombelu wende, yeye kayi muakaje, neafue bua bilema biende. Kadi wewe neushale ne muoyi.

Muena malu mabi udi upingana kudi Mvidi Mukulu kena ufua to

¹⁰ — Yezekiyele, mpindiewu wambila bena Izrayele ne: “Nudi nudila, nuamba ne: bubi buetu ne ngenzelu yetu mibi mbipite bungi, mbifuane kutubutuisha. Nudi nudikonka ne: mutudi mua kushala ne muoyi mbishi?

¹¹ Nanku, telejayi mudibu banuambila kudi Maweja-Nangila Mvidi Mukulu udi ne muoyi. Tshiena musue bua bantu babi bafue nansha. Ndi njinga amu ne: balengeje nsombelu yabu, bikale ne muoyi. Nanku ndi nnulomba nuenu bena Izrayele ne: kanuenji kabidi bibi to! Nudi basue kufua bua tshinyi?”

¹² Yezekiyele, wambila bana benu kabidi ne: “Padi muntu wa nsongu ubanga kuenza malu mabi, bilenga bivuaye wenza kumpala, kabiena mua kumuepula ku lufu to. Kadi padi muntu mubi ulekela kuenza malu mabi, bubi buvuaye wenza bangabanga, kabuena mua kumujimija to. Padi muntu wa nsongu wenza malu mabi, kena upanda bua ditaba divuaye nadi bangabanga to.

¹³ Meme mulaye muntu wa nsongu ne: newikale ne muoyi, kadi muntu awu wela meji ne: ditaba divuaye nadi kale ndikumbane, utuadija kuenza malu mabi, kabena bavuluka kabidi malu ende mempe avuaye wenza kale to. Neafue bua bubi budiye wenza mpindiewu.

¹⁴ Kadi meme mubele muntu mubi ne: udi ufua, padi muntu awu udilengeja, utuadija kuenza malu mimpe, kena ufua to.

¹⁵ Padi muntu awu upingaja nansha bintu bivuaye muibe, kayi wenza kabidi bibi, kadi witaba ku mikenji idi mua kumusungidila, kakufua to. Neashale ne muoyi bulelela.

¹⁶ Nebapue bilema biende muoyi. Neapete muoyi bualu udi ulonda njila wa malu mimpe.

¹⁷ “Bana benu badi bangamba ne: Maweja-Nangila kena wenza bimpe to. Kadi badi benza bibi ki mbobu anyi?

¹⁸ Padi muntu muakane ulekela kuenza bimpe, utuadija kuenza bibi, neafue bua bubi buende.

¹⁹ Kadi padi muntu mubi ulekela kuenza bibi, utuadija kuenza malu mimpe, neapete muoyi, bualu udi wenza bimpe.

²⁰ “Nuenu bena Izrayele nudi nuamba ne: Maweja-Nangila udi ukolesha malu. Kadi numanye bimpe ne: Nendumbuluishe muntu yonsu bilondeshile malu adiye muenze!”

Ditunga dia bena Izrayele nedinyanguke

²¹ Dituku ditanu dia ngondu wa dikumi, tshidimu tshia dikumi ne tshimue tshivuabu bamane kuya netu mu bupika, muntu uvua mupanduke, pakuatshibu Yerushalayime, kutota kungambila ne: — Mbakuate tshimenga!

²² Dilolu muntu awu kayi muanji kufika, Maweja-Nangila uvua mundeje bukole buende, tshiyi mua kuakula kabidi to. Kadi pavua muntu, uvua munyeme, mufike kundi mu dinda, tshivua kabidi kamama to. Nkavua ngakula.

²³ Ke Maweja-Nangila kungambila ne:

²⁴ — Yezekiyele, bantu badi bashale mu bimenga bia mu ditunga dia Izrayele bivuabu babutula, badi bamba ne: “Abrahame uvua nkayende, kadi uvua mupete ditunga edi dijima. Nanku metu nangananga, nempete ditunga edi, bualu tudi ba bungi.”

²⁵ Ubambile tshindi meme Maweja-Nangila Mvidi Mukulu mujadike ne: “Nudi nudia munyinyi, nudia ne mashi. Nudi nukukuila mvidie mikuabu. Nudi nushipangana. Kadi munudi mua kuamba ne: nempete ditunga mbishi?

²⁶ Nudi batekemene anu ku bia mvita bienu. Nudi nuenza malu mabi, nubuelela bakaji ba bende mu nzubu. Kadi munudi mua kuamba ne: netupete ditunga mbishi?”

²⁷ Ubambile miaku eyi mu dina dianyi: “Meme Maweja-Nangila Mvidi Mukulu udi ne muoyi ndi nnumanyisha ne: Nebashipe bonsu badi bashala mu bimenga bivuabu babutula. Badi mu mpata nebabadie kudi nyama ya ditu. Badi basokome mu mikuna ne mu mbuebue, nebafue ku disama dia tshiambu.

²⁸ Nembutule ditunga, ndishiye tshipela. Bukole buvua bantu baditambisha nabu nebujimine. Mikuna ya mu Izrayele neyishale tshipela. Muntu kakupitshilamu kabidi to.”

²⁹ Pandi ngandamuna ditunga dijima tshipela bua kunyoka bena Izrayele, nebajadike ne: meme ndi Maweja-Nangila.

³⁰ Yezekiyele, banudi nabu mu bupika badi bayukidilangana, bakutela, ku bimana bia mu tshimenga nansha ku biibi bia ku nzubu yabu, bambilangana ne: “Tuyayi kuteleja bidi Maweja-Nangila utumanyisha.”

³¹ Nanku bantu ba mu tshisamba tshianyi badi basangila bua kukuteleja. Badi bakuteleja, kadi kabena benza biudi ubambila to. Badi benza anu bidibu basue, balonda majinga abu.

³² Wewe udi muimbi wa misambu ya diyi dimpe, muikale ne tshisanji tshimpe. Badi bateleja biudi ubambila, kadi kabena babikumbaja to.

³³ Kadi padi malu audi ubambila akumbana — akadi pa kukumbana mene — nebajadike ne: muambi uvua munkatshi muetu.