Yezekiyele 31 - MUKANDA WA MYIDI MUKULU

Badi bafuanyikija mukalenga wa bena Ejipitu ne mutshi wa sedre

¹ Dituku dia kumpala dia ngondu muisatu wa tshidimu tshia dikumi ne tshimue tshivua bena Izrayele bamane kuya mu bupika, Maweja-Nangila kungambila ne:

² — Yezekiyele, uye kuambila mukalenga wa bena Ejipitu, kabidi ne bantu bonsu badiye ulombola, ne: “Wewe udi ne bukole bua bungi. Ndi mua kukufuanyikija ne tshinyi?

³ Udi mufuanangane ne mutshi wa sedre wa mu Lebanone, udi matamba manene mimpe, adi afila dileji dia bungi. Udi mutshi wa sedre mupite kutumbuka, lusongu luawu lufika ne mu mavuba.

⁴ Mvula uvua mukoleshe mutshi awu. Mayi a muinshi mua buloba kuumenesha. Mayi avua matengebela ku miji yawu. Pashishe avua atangalaka, aya too ne ku mitshi yonsu ivua mu mpata.

⁵ Mayi onsu avua mutshi upeta avua audisha. Nanku uvua mutumbuke, mule mupite mitshi mikuabu. Matamba awu avua a bungi, malabale:

⁶ Nyunyi ya mishindu yonsu ivua ibakilamu masua ayi. Nyama ya ditu ivua ilelela bana muinshi mua matamba awu. Bantu ba bisamba bionsu bavua bikishila muinshi muawu.

⁷ Uvua mutshi muimpe mutambe, uvua mule, muikale ne matamba malabale. Bualu miji yawu ivua mibuele mu buloba muvua mayi a bungi.

⁸ Mu lupangu lua Mvidi Mukulu, kamuvua mutshi wa sedre mufuanangane nawu. Mutshi wa siprese nansha umue kauvua ne matamba mimpe bu awu. Mutshi wa platane kamata ne mabeji a bungi bu awu. Mutshi nansha umue kamata mufuanangane nawu ku bulenga.

⁹ Mvua muulengeje ne matamba mimpe. Nanku mu Edene, lupangu lua Mvidi Mukulu, mitshi yonsu ivua ibaba mutshi awu.”

Nebatshibule mukalenga wa bena Ejipitu bu mutshi wa sedre

¹⁰ “Mpindiewu, meme Maweja-Nangila ndi ngamba ne: Mutshi wa sedre kukola, kulepa, kuya too ne mu mavuba. Kadi mua kabidi uditambisha amu kuditambisha.

¹¹ Ke pandi muubenge, muufile kudi mukalenga wa pa buloba udi ne bukole bupite. Mukalenga awu neaunyoke bua bubi buawu.

¹² Bavua baukose kudi bantu benyi kamuyi luse. Kuushiyabu panshi muaba awu. Matamba awu avuabu batshibule mmapone panshi. Adi matangalake pa mikuna ne mu bibandabanda bia mu ditunga. Bantu ba mu bisamba bionsu bavua bikishe mu dileji diawu, mbaushiye, banyema.

¹³ Nyunyi ya mishindu yonsu neyikile pa tshikuku tshia mutshi udi mukoseke awu. Nyama yonsu ya muitu idiate matamba awu.

¹⁴ Mbienzeke nenku bua mutshi mukuabu nansha umue udi upeta mayi a bungi kaulepi too ne mu mavuba, kauditambishi bua bule buawu. Bualu mitshi ne bantu bidi ne bua kufua, kujimina muinshi mua buloba, kupetangana ne bikadi bimane kufua.

¹⁵ “Meme Maweja-Nangila ndi ngamba ne: Dituku divua mutshi wa sedre muye mu dijimba dia bafue, meme kuenzeja madilu bua mutshi awu. Bualu bua mutshi awu, meme kuimanyika mayi a musulu wa muinshi mua buloba, ne a tusulu tuonsu. Bualu bua mutshi awu, ndi mutume midima pa mikuna ya Lebanone, mumishe mitshi yonsu ya mu mpata.

¹⁶ Pamvua ngupula mutshi ewu bua uye kumonangana ne bakadi bafue, bantu bonsu bavua bumvue pavuawu mupuke, kuzakalabu ne bowa. Mu dijimba dia bafue, mitshi yonsu ya mu Edene, mitshi mipite buimpe ya mu Lebanone ivua mipete mayi a bungi, kusanka.

¹⁷ Yonsu ayi ivua mibuele muinshi mua buloba, muaba udi bantu bavuabu bashipe ku mvita. Bobu ke bavua bambuluisha mutshi awu, basombe munkatshi mua bisamba, mu dileji dinene diawu.

¹⁸ “Kakuena mutshi nansha umue wa mu Edene mufuanangane nebe ku lumu ne ku bunene. Kadi nebakujike ne mitshi mikuabu muinshi mua buloba. Newikale munkatshi mua bantu ba bisamba bikuabu, ne munkatshi mua bantu bavuabu bashipe ku mvita. Nenku ke muenzelabu mukalenga wa bena Ejipitu ne bantu ba mu Ejipitu. Meme Maweja-Nangila ndi njadika nanku.”