Yezekiyele 30 - MUKANDA WA MYIDI MUKULU

Maweja-Nangila neanyoke bena Ejipitu

¹ Maweja-Nangila kungambila kabidi ne:

² — Muntu, akula, umanyishe bindi meme Maweja-Nangila Mvidi Mukulu ngamba ne: “Nuenu bena Ejipitu, asayi miadi ya madilu, bualu dituku dikadi pabuipi, didi Maweja-Nangila uleja tshiji tshiende.

³ Nedikale dituku didi ne mavuba adi akuatshisha bowa. Nedikale dituku dia kulumbuluisha bisamba.

⁴ Mvita neyenzeke mu Ej ipita. Bantu nebazakale too ne mu ditunga dia bena Kushe. Nebashipe bena Ejipitu; nebabanyenge bubanji buabu. Ditunga diabu nedishale makolu.

⁵ Bena mvita ba bena Kushe, ba bena Pute, bena Lude, bena Arabe, bena Libiya too ne ba mu bantu banyi nebafue mu mvita.

⁶ Meme Maweja-Nangila ndi njadika ne: biangatshile ku Migdole, tshimenga tshidi ku mutu too ne ku Ashuwane, kuinshi mu ditunga, bena mvita badi bambuluisha bena Ejipitu, nebafuile mu mvita. Tshiluilu tshivua bena Ejipitu baditambisha natshi netshibutuke. Eyowa, meme Maweja-Nangila Mvidi Mukulu, ndi njadika bualu ebu.

⁷ Ku matunga onsu a pa buloba, ditunga diabu nedishale tshipela. Bimenga biabu nebishale anu makolu.

⁸ Pandi ngosha ditunga dia bena Ejipitu, nshipa bena mvita bonsu badi babambuluisha, bantu nebajadike ne: meme ndi Maweja-Nangila.

⁹ Dituku dindi mbutula Ejipitu, nentume bantu mu buatu, baya kuambila bena Kushe bivua bienzeka. Nanku, bena Kushe nebakuatshike bowa, nebazakale. Dituku adi dikadi pabuipi.

¹⁰ “Meme Maweja-Nangila Mvidi Mukulu ndi njadika ne: Nentume Nebukadnesare, mukalenga wa mu Babilone, bua kubutula bena mvita ba bungi badi mu Ejipitu.

¹¹ Nebukadnesare neavue kunyanga ditunga edi ne bantu ba tshikisu ba mu ditunga diende. Nebatape bena Ejipitu, babashipe ku muele. Mu ditunga nemuikale anu bitalu.

¹² Nengumishe misapa ya musulu wa Nile. Nemfile bena Ejipitu kudi bantu ba tshinyangu. Nentume bantu benyi abu bua kudinyanga, kudishiya munda mutupu, kuangata bionsu bidimu. Meme Maweja-Nangila ndi ngenzeja bionsu ebi.

¹³ “Meme Maweja-Nangila ndi njadika ne: Nembutule mpingu ne mvidie ya dishima ya mu tshimenga tshia Memfise. Kamuakuikala kabidi muntu udi ulombola Ejipitu. Nenkuatshishe bena ditunga bonsu bowa.

¹⁴ Nennyange Patrase. Nengoshe tshimenga tshia Sowane. Nennyoke ne tshimenga tshia No.

¹⁵ Nembutule ne tshiji tshimenga tshia Sine, tshivuabu bakoleshe ne bimana, tshidi tshilama mikalu ya ditunga dia Ejipitu. Nenshipeshe bantu ba bungi ba mu No.

¹⁶ Nengoshe ditunga dia Ejipitu, bantu nebafue. Bena mu Sine nebapapuke, bazakala. Nebanyange bimana bia mu No; tshimenga tshijima netshiyanguke.

¹⁷ Bansongalume ba mu tshimenga tshia One ne tshia Pi-Beshete nebafue mu mvita. Nebakuate bantu bakuabu, baye nabu mu bupika.

¹⁸ Butuku kabuakutshia ku Tapanese, tshiyi muanji kubutula bukole bua bena Ejipitu. Nenjikije ditambisha divuabu nadi. Divuba nedifike dibuikile tshimenga. Bantu ba mu ditunga nebaye mu bupika.

¹⁹ Nennyoke bena Ejipitu. Nanku nebajadike ne: meme ndi Maweja-Nangila.”

Mukalenga wa Babilone ntshiamu tshia mudimu tshia Mvidi Mukulu

²⁰ Mataku muanda mutekete a ngondu wa kumpala, tshidimu tshia dikumi ne tshimue tshitua bena Izrayele bamane kuya mu bupika, Maweja-Nangila kungambila ne:

²¹ — Yezekiyele, ndi mutshibule diboku dia mukalenga wa bena Ejipitu. Muntu kena mumusuike mukaba pa mputa, nansha mumupeshe buanga. Muntu kena mumusuike mukaba ku diboku, bua apete bukole bua kuluangana ne muele wa mvita.

²² Mpindiewu, meme Maweja-Nangila Mvidi Mukulu, ndi ngamba ne: “Nennyoke mukalenga wa bena Ejipitu. Nemmutshibule maboku onsu abidi, ne dikadi ditshibuke, ne ditshidi ne bukole. Muele wende wa mvita neufinuke ku tshianza umata panshi!

²³ Nanku, nentangalaje bena Ejipitu mu matunga a bende.

²⁴ Nemvudije Bukole bua mukalenga wa mu Babilone. Nemmupeshe muele wanyi mu bianza. Mukalenga wa bena Ejipitu undi mutshibule diboku, neatue mikemu, padiye ufua muluishi wende mutangile.

²⁵ Eyowa, maboku a mukalenga wa bena Ejipitu nealembelele kaayi ne bukole. Kadi nempeshe maboku a mukalenga wa bena Babilone bukole bua bungi. Nemmupeshe muele wanyi mu bianza. Neafune bua kuluisha bena Ejipitu. Bantu bonsu nebamanye ne: meme ndi Maweja-Nangila.

²⁶ Nentangalaje bena Ejipitu mu matunga a bende. Nebashindike ne: meme ndi Maweja-Nangila.”