Yezekiyele 3 - MUKANDA WA MYIDI MUKULU

¹ Utua ungakuisha kungambila ne: — Wewe, muntu, diaku mukanda undi mukutuadile ewu. Pashishe, uye kuambila bena Izrayele malu.

² Meme kubulula mukana. Kundishaye mukanda awu.

³ Kungambilaye kabidi ne: — Muntu, diaku mukanda undi nkupa ewu ukute difu tente. Meme kuudia. Utua musheme mukana muanyi bu buitshi.

⁴ Pashishe kuambaye tshiakabidi ne: — Yezekiyele, juka, uye kudi bena Izrayele, ubambile miaku yanyi.

⁵ Tshiena nkutuma kudi bantu badi bakula muakulu wa benyi uudi kuyi umvua. Kadi ndi nkutuma kudi bana benu bena Izrayele.

⁶ Bu meme mukutume kudi bisamba bivule bia bantu benyi badi bakula muakulu mukole, uudi kuyi nansha mua kumvua, bantu abu batua mua kukuteleja.

⁷ Kadi bena Izrayele kabena mua kukuteleja to. Bualu kabena basue kunteleja meme. Badi bantu ba tshitunu, badi ne muoyi mupape.

⁸ Kadi nenkupeshe tshitunu tshikole bu tshiabu, ne muoyi mupape bu wabu.

⁹ Newikale ne bukole bu bua dibue dia mbongo, didi dikole dipite lubuebue. Kadi kuikadi ne bowa, kubatshinyi. Vuluka mudibu bantu ba tshitunu.

¹⁰ Pashishe kungambilaye ne: — Yezekiyele, ungunzuluile muoyi webe, ne matshi ebe. Uteleje bionsu bindi nkuambila, ubivuluke bimpe.

¹¹ Pashishe, uye kudi bantu ba mu tshisamba tshienu, badibu bakuate munemu mu bupika. Ubambile ne: “Telejayi bidi Maweja-Nangila Mvidi Mukulu wamba.” Ubambile nanku, nansha bakuteleje, nansha babenge kukuteleja.

¹² Nanku, Mueyelu wa Mvidi Mukulu kungambula pa buloba. Meme kumvua panyima panyi tshiona tshikole tshia diyi, diamba ne: “Tutumbishe Maweja-Nangila, muaba udiye uleja butumbi buende!”

¹³ Meme kumvua kabidi mutoyi wa mapuapua a nyama avua atutakana, ne mutoyi wa nkata ivua ku luseke luayi. Bivua bienza mutoyi munene bu wa tshikumina.

¹⁴ Mueyelu wa Mvidi Mukulu uvua mungambule pa buloba, muye nanyi. Bukole bua Maweja-Nangila buonsu buvua bumbuele munda, tshiyi mua kubenga. Ke meme kudiunwua mubungame, mudiumvue bibi.

¹⁵ Meme kufika ku Tele-Abibe, pabuipi ne bantu bavua basombe mu bupika, ku muelelu wa musulu wa Kebare. Meme kushala nabu matuku muanda mutekete, muikale nzakala, tshiyi mumanye tshia kuenza.

Yezekiyele neikale mutentekedi

¹⁶ Matuku muanda mutekete mamane kupita, Maweja-Nangila kungambila ne:

¹⁷ — Muntu, ndi nkuteka mutentekedi bua kudimuja bena Izrayele. Neuteleje miaku yanyi. Neuyimanyishe bena Izrayele bua badimuke.

¹⁸ Meme mukuambile ne: muenji wa bibi ukadi pa kufua, wewe kuyi mudimuje muntu awu bua alekele ngenzelu yende mibi, ashale ne muoyi, nanku muntu awu neafue bua bubi buende, kadi nenkuase wewe tshilumbu tshia lufu lua muntu awu.

¹⁹ Kadi wewe mumudimuje, yeye mubenge kulekela bilema biende ne ngenzelu yende mibi, neafue bua mibi yende. Kadi wewe neushale ne muoyi.

²⁰ Muntu muakane meme mumutete, kadi yeye kulekela buakane, kuenza bibi, nealue bua bubi buende. Wewe kuyi mumuleje njiwu, nealue bua bubi buende. Tshiena mvuluka kabidi malu mempe avuaye wenza ku kale. Kadi wewe nenkuase tshilumbu tshia lufu luende.

²¹ Kadi wewe mudimuje muntu muakane bua alekele bibi, yeye muitabe bua kubilekela, neashale ne muoyi bualu bua mibelu yebe. Nanku wewe pebe kuakufua to.

Yezekiyele udi ne bua kupuwa

²² Bukole bua Maweja-Nangila kuntulukila kabidi. Kungambilaye ne: — Juka, uye mu tshibandabanda, nenkuambilemu bualu.

²³ Meme kupueka mu tshibandabanda. Butumbi bua Maweja-Nangila kumuenekamu, bu mumvua mumane kubumona ku muelelu wa musulu wa Kebare. Meme kutua mpala panshi.

²⁴ Nanku, Mueyelu wa Mvidi Mukulu kumbuela munda, kungimanyika. Maweja-Nangila kungambila ne: — Ndaku, udinjidile mu nzubu muebe.

²⁵ Muaba awu, Yezekiyele, nebakusuike mionji bikole, kuyi mua kupatuka pambelu to.

²⁶ Nendamakaje ludimi luebe mu tshilakalaka, ushale kamama, upange bukole bua kubela bantu bena tshitunu aba.

²⁷ Kadi, pandi musue kukuambila bualu bua kumanyisha bantu, nenganyishe bua wewe kuakula tshiakabidi. Nanku neubamanyishe ne: “Telejayi bidi Maweja-Nangila Mvidi Mukulu wamba.” Bamue bantu nebateleje, banga nebabenge mua kuteleja, bualu mbantu ba tshitunu.