Yezekiyele 24 - MUKANDA WA MYIDI MUKULU

Badi bafuanyikija Yerushalayime ne luesu lua dimoma

¹ Matuku dikumi a ngondu wa dikumi tshidimu tshia tshitema tshi vua bena Izrayele bamane kuya mu bupika, Maweja-Nangila kungambila ne:

² — Muntu, funda dituku dia lelu pa mukanda, bualu lelu ke udi mukalenga wa Babilone ubanga kuluisha Yerushalayime.

³ Londela bantu banyi badi bantombokela lusumuinu elu. Ubambile ne: Maweja-Nangila Mvidi Mukulu ke udi mutume diyi bua kunulongeshalu. Uteke luesu peku. Welamu mayi.

⁴ Utekemu mabulu a munyinyi, onsu a munyinyi muimpe wa ku tshibelu ne wa ku diboku. Uluwuje ne mifuba mimpe.

⁵ Wangata munyinyi amu wa mikoku mimpe. Ela nkunyi kuinshi kua luesu. Wipike bionsu, bipie bisaba. Nansha mifuba idi ne bua kupia.

⁶ Meme Maweja-Nangila Mvidi Mukulu ndi ngamba ne: Tshimenga tshia bashipianganyi netshipete diakabi, tshidi bu luesu lukuate dimoma, ludibu kabayi mua kusukula kabidi to. Sabula munyinyi udi mu luesu, ku dibulu ku dibulu, lushale munda mutupu. Kuena mua kusunguluja diudi usabula.

⁷ Mashi avuabu bela panshi atshidi mu tshimenga. Bavua baela pa mabue, kabayi nansha baajibikila ne buloba. Buloba ki mbuanji kunua mashi aa to.

⁸ Meme ndi nshiya mashi pa dibue edi, muaba udiwu amueneka bimpe, bua ajule tshiji tshianyi, ambikile bua nsombuele.

⁹ Eyowa, meme Maweja-Nangila Mvidi Mukulu ndi ngamba ne: Diakabi ndia tshimenga tshia bashipianganyi! Bualu ndi ngasa tshioshelu tshinene!

¹⁰ Ela nkunyi minene, sonsola kapia, ulambe munyinyi, upie umana, welamu ndungu, mifuba ipie ibobe.

¹¹ Pashishe uteke luesu lua munda mutupu pa mbabula, bua lupie, lukunze, bua mikiya idi munda mualu ijike, bua dimoma diumbuke.

¹² Kadi bionsu bindi ngenza kabiena biambuluisha. Dimoma ndikuate ku luesu bikole, kadiena mua kumuka nansha ku kapia.

¹³ Yerushalayime we, udi munyanguke bua malu mabi auvua muenze. Mvua musue kukulengeja, kadi kuvua muanyishe to. Nanku, bua wewe kulengela, anu meme muanji kukunyoka ne tshiji tshianyi tshionsu.

¹⁴ Meme Maweja-Nangila Mvidi Mukulu ndi njadika ne: bionsu ebi nebikumbane. Nenkunyoke tshiyi mpingana panyima, tshiyi ngunwua kanyinganyinga, nansha luse. Nebakunyoke bua malu ebe mabi. Meme Maweja-Nangila Mvidi Mukulu ndi ngamba nanku.

Yezekiyele udi upeta madilu

¹⁵ Maweja-Nangila kungambila ne:

¹⁶ — Yezekiyele, ndi nkunyenga mukajebe uudi utangila, usankidila. Neafue lufu lua tshikosu. Kadi kuena mua kudila muadi, kuena mua kutua mikemu, kuena mua kupuekesha binsonji to.

¹⁷ Udidile anu munda munda. Kadi kutekeshi madilu to. Vuala tshitambala tshiebe ku mutu, ne bisabata biebe bu matuku makuabu. Kusokoki mpala, kudi biakudia bidi bena mutumba bakutuadila bua madilu.

¹⁸ Mvua muyukile ne bantu dinda, dilolu mene mukajanyi kufua. Butshia dinda meme kuenza muvua Maweja-Nangila mungambile.

¹⁹ Bantu bavua bangebeja bua kubumvuija mumvua muenze amu.

²⁰ Meme kubandamuna ne: — Maweja-Nangila udi mungambile bua meme kunumanyisha,

²¹ nuenu bena Izrayele, ne: “Meme Maweja-Nangila Mvidi Mukulu nennyange nzubu wanyi wa tshijila. Nudi nudisua nende, numutangila nusanka. Ke muaba unudi nutekemena bua kupetela muoyi. Nebashipe bana benu ba balume ne ba bakaji banuvua bashiye mu Yerushalayime.

²² Diba adi nenuenze bu muvua Yezekiyele muenze. Kanuakusokoka mpala, kanuakudia biakudia bidi bena mutumba bafike nabi mu madilu.

²³ Nenuikale basuike bitambala bienu ku mitu, bavuale bisabata ku makasa enu. Kanuabakanyi, kanudidi muadi. Kadi nenufubidile bua bilema bienu. Muntu yonsu neatue mikemu bualu bua dikenga didi muena mutumba nende nadi.

²⁴ Nenulonde tshilejilu tshia Yezekiyele. Nenuenze bionsu amu mutuaye muenze. Nanku, pakumbana malu andi ngamba aa, nenumanye ne: meme ndi Maweja-Nangila.”

²⁵ Pashishe, Maweja-Nangila kungambila ne: — Yezekiyele, nembanyenge nzubu wanyi wa tshijila, muaba udibu basokomena, udibu batangila basanka, udibu badisua nawu, udibu batekemena bikole. Nembanyenge kabidi bana babu ba balume ne ba bakaji.

²⁶ Diba didi bionsu ebi bikumbana, muntu udi mupanduke ku tshipupu etshi, neafike bua kukuambila bivua bienzeka.

²⁷ Dituku adi, kuakuikala kabidi kamama to. Newakule tshiakabidi bua umone mua kuyukila ne muntu uvua mupanduke ku tshipupu atshi. Ke muudi uleja bantu tshilejilu bua bamanye ne: meme ndi Maweja-Nangila.