Yezekiyele 23 - MUKANDA WA MYIDI MUKULU

Bena Samariya badi benda tshiendenda

¹ Maweja-Nangila kungambila ne:

² — Yezekiyele, teleja tshilumbu tshia bana babidi ba bakaji, batuabu balela kudi mamu umue.

³ Pavuabu bansongakaji bavua benda tshiendenda mu Ejipitu, muvuabu basombe. Muaba awu, ke uvuabu bababonda ku mabele musangu wa kumpala. Ke muaba muabu batuadija kunaya nabu, babakuata ku mabele abu a bunsongakaji.

⁴ Muanabute uvua Okola, muanamukala Okoliba. Muanabute udi tshimfuanyi tshia Samariya, muibidi tshimfuanyi tshia Yerushalayime. Mvua mubasele bonsu babidi. Bobu kundelela bana ba balume ne ba bakaji.

⁵ Kadi Okola, nansha meme mumusele, uvua wenda amu buendenda. Uvua walakana bena mutumba nende bena Ashure. Kupetaye bananga bende momu amu.

⁶ Bantu abu bavua bavuale bilamba bikunze, bu mutotabu balombodi ba maloba ne balumbuluishi. Bavua bansongalume balengele, bamanye bimpe mua kubanda pa nyama ya tubalu.

⁷ Okola uvua mudifile kudi balombodi aba ba bena Ashure. Kadi misangu yonsu ivuaye upetangana ne umue wa kudibu, uvua utendelela mvidie yabu mibi indi mbenga.

⁸ Uvua mutungunuke ne tshiendenda, mutuaye wenza mu Ejipitu. Kuine aku patshituaye nsongakaji, balume bakavua benda nende tshiendenda, bamubonda ku mabele ende a bushika nkunde, bamusaka ku malu mabi.

⁹ Diba adi, meme kumulekela mu bianza bia bananga bende bena Ashure, bavuaye mupite kunanga.

¹⁰ Kumuvulabu bilamba bionsu, kumushiya butaka, kumutapabu muele, kumushipa. Bakatua bamane kukuata bana bende ba balume ne ba bakaji bua kuya nabu. Ke mmuabu bamunyoke nanku bua bakaji bakuabu bamone bionsu abi, badimuke.

Yerushalayime udi wenda tshiendenda

¹¹ — Okoliba utua mumone mmuabu banyoke muanabu, kadi mua muenze bibi mupite Okola. Utua wenda tshiendenda mupitshishe.

¹² Uvua walakana kabidi balombodi ba maloba ne balumbuluishi ba bena Ashure. Ke bena mutumba nende batua batuale bimpe, batshitua bansongalume balengele, bamanye mua kubanda pa nyama ya tubalu.

¹³ Yeye mene utua anu mubuele mu njila wa buendenda. Mvua mumone ne: bana ba bakaji babidi aba badi bena buenzavi bua mushindu umue!

¹⁴ Kadi Okoliba utua muenze bibi bipite. Dituku dikuabu, kumonaye bantu batuabu bazola ku tshimana, balaba mukubu mukunze. Bimfuanyi abi bitua bileja bena Babilone.

¹⁵ Batua babavuadike mikaba mu tshimonu ne bitambala bile ku mitu yabu. Bavua bamueneke bu bilobu bia mvita. Bimfuanyi abi bitua bileja bimpe bena Babilone, mushindu udibu basombe mu ditunga diabu.

¹⁶ Okoliba utua mualakane bantu abu bikole diakamue patuaye mubamone. Kubatuminaye mikenji mu ditunga diabu, ubabikila.

¹⁷ Nanku bena Babilone kufika bua kuenda nende tshiendenda. Kumunyangabu ne malu abu mabi a bundu. Yeye mumane kuenda nabu tshiendenda tshibi, kubabengaye.

¹⁸ Utua udileja patoke nuwuaye mukaji mudisombele, uleja bantu butaka buende. Nanku, kumbipilaye; meme kumubenga bu mumvua mubenge yayende.

¹⁹ Kadi kuvuaye kuenda tshiendenda kupitshisha. Kuenzaye bibi anu muvuaye muenze ku bunsongakaji buende mu Ejipitu.

²⁰ Muaba awu, uvua amu mualakane bananga bende bavua ne lukuka lua kuenda nende tshiendenda, bikale ne mibidi ya bulume bu ya nyama ya mpunde, nansha ya tubalu.

Badi banyoka Yerushalayime

²¹ “Okoliba, wewe kutuadija kuenza tshiakabidi malu mabi muuvua wenza ku bunsongakaji buebe, pauvua muanyishe bua bena Ejipitu bakunayile mu tshiadi, babonde mabele ebe a bunsongakaji.

²² Ke pandi meme Maweja-Nangila ngamba ne: Ndi ntuma bananga bebe baudi mubenge mpindiewu bua bakuluishe. Ndi mbabikila batuma miaba yonsu bua bakukengeshe.

²³ Ndi nsangisha bena Babilone, bena Kesede bonsu, bena Pekode, bena Showa, bena Kowa. Bena Ashure kabidi nebadisangishe nabu. Nanku nensangishe bansongalume bonsu aba ba malengele, balombodi ba ditunga ne balumbuluishi, bena mvita ne bantu banene, bonsu bikale bamanye mua kubanda bimpe pa tubalu.

²⁴ Nebafumine ku mutu wa ditunga ne matempu a mvita, matempu makuabu a mishindu yonsu, ne tshiluilu tshinene tshia bena mvita. Nebikale ne ngabu, bamane kuvuala kabidi bifulu bia tshiamu. Nebakuele munkatshi. Nembumvuije tshilumbu tshiebe. Nebakulumbuluishe bilondeshile mikenji yabu.

²⁵ Bu mundi mukufikile munda, nenganyishe bua bakunyange ne tshikisu. Nebakukose diulu ne matshi, bakutapa ne miele yabu, bakushipe. Nebangate bana bebe ba balume ne ba bakaji; badi bashale, nebaboshe batshikale ne muoyi.

²⁶ Nebakuele bilamba biebe, bumushe ne bilengejilu biebe.

²⁷ Nenkutekeshe malu a bundu ne a buendenda auvua mutuadije kuenza mu Ejipitu. Kuakualakana kabidi muntu, kuakujinga kabidi bena Ejipitu to.

²⁸ “Meme Maweja-Nangila ndi ngamba ne: nenkufile mu bianza bia bantu baudi udiombola, baudi ubenga.

²⁹ Nebakukengeshe ne lukinu. Nebakunyenge bintu biudi mupete ku mudimu webe. Nebakushiye butaka, kuyi bilamba bu mukaji mudisombele, bua bonsu bakumone. Lukuka luebe ne buendenda buebe

³⁰ ke bivua bikukebela bionsu abi. Uvua muende tshiendenda ne bantu ba matunga a benyi. Wewe kudinyanga, kutendelela mvidie yabu mibi indi mubenge.

³¹ Uvua mulonde tshilejilu tshia yayebe. Nanku nenkunuishe dikopu dia tshiji tshianyi, bu mumvua mudinuishe yayebe.

³² Meme Maweja-Nangila Mvidi Mukulu ndi nkuambila ne: Neunue dikopu dia tshiji divua yayebe munue, dikopu dinene, diondoke. Nebakuseke bakulembakaje, bualu dikopu edi didi diuwule tente!

³³ Neukuatshike, upete makenga. Dikopu edi ndia bowa ne luzakalu. Yayebe Samariya, mmumane kudinua, mujikije.

³⁴ Neudinue too, umana ne ku ndekelu. Neudiboze ku menu ebe. Neuditape mputa pa tshiadi ne bitata biadi. Ke mundi njadika meme Maweja-Nangila Mvidi Mukulu!

³⁵ Ndi ngamba ne: bu muudi mumpue muoyi, mumbenge, nenkunyoke bua tshiendenda ne bua buenzavi buebe.”

Maweja-Nangila udi udiwula Samariya ne Yerushalayime

³⁶ Maweja-Nangila kungambila ne: — Yezekiyele, udilongolole bua kulumbuluisha Okola ne Okoliba. Ubafunde patoke ku tshilumbu bua malu mabi avuabu benze.

³⁷ Badi bakaji bena tshiendenda, bena tshinyangu. Badi benda tshiendenda, batendelela mvidie mibi indi mubenge. Badi bashipa bana babu ba balume bavuabu bandelela, babalambule mvidie.

³⁸ Kadi mbenze kabidi malu mabi makuabu! Dituku mene adi bavua bapishe kabidi muaba wanyi wa tshijila mikiya, bapepeje dituku dia Dikisha dinjidila meme.

³⁹ Bualu dituku mene divuabu balambule mvidie yabu bana babu ba balume, bavua babuela muaba wanyi wa tshjila, mu nzubu wanyi meme, bamupisha mikiya.

⁴⁰ Bavua batume kabidi mikenji bua kubikila bantu ba matunga a kule. Bantu abu bamane kupeta mukenji awu, kufikabu lukasa kudibu. Samariya ne Yerushalayime kuowa mayi, kudilengeja bualu buabu, kudilaba bilabu ku mesu, kuvuala bilengejilu.

⁴¹ Pashishe kusombabu mu nkuasa ya tshisaka mimpe minene, bateka mesa kumpala kuabu. Pa mesa apu pavua musenga wa kamonya, ne mafuta masambakaja ne manananshi, bivuabu bapete kundi.

⁴² Musumba munene wa bantu kufika kudibu, bakula, basanka talala bu mu tshibilu. Kuvua nangananga bantu bafume ku nseke yonsu ya mu tshipela. Kuelabu nsongakaji ibidi ayi lukanu ku maboku, kubasabu bifulu bimpe bia lumu ku mitu.

⁴³ Nanku meme kuamba ne: “Nansha udi ne mubidi wende munyanguke menemene ne tshiendenda, udi anu musue kuenza kabidi malu a buendenda.

⁴⁴ Balume badi bamutantshila! Badi bangata Okola ne Okoliba, benza nabu malu mabi babasunsula, amu bu mudibu benza ne bakaji badisombele.

⁴⁵ Kadi bantu ba nsongu nubafundile bakaji aba tshibawu, bua tshiendenda tshiabu, ne bua bantu bavuabu bashipe. Bualu mbende tshiendenda, badi kabidi ne mashi ku bianza!”

⁴⁶ Meme Maweja-Nangila ndi ngamba ne: “Sangisha bantu bua kubaluisha. Babazakeje, babanyenge bintu biabu!

⁴⁷ Nubase mabue, nubasaye ne miele yenu. Nushipe bana babu ba balume ne ba bakaji, nuoshe nzubu yabu.

⁴⁸ Nenjikije malu mabi adi matampakane mu ditunga edi. Bakaji bonsu nebadimuke. Kabakuidikija kabidi malu mabi avua nsongakaji ibidi eyi yenza to.

⁴⁹ Bakaji babidi aba mbabanyoke bua malu abu mabi a bundu, ne bua mvidie ivuabu batendelela. Nenku nenujadike ne: meme ndi Maweja-Nangila.”