Yezekiyele 21 - MUKANDA WA MYIDI MUKULU

Mvidi Mukulu neanyoke bena Izrayele

¹ Maweja-Nangila kungambila ne:

² — Muntu, tangila luseke lua kuinshi mu ditunga. Utandishe mu dina dianyi bantu badi basombe mu ditu didi kuinshi mu ditunga.

³ Ubambile bua bateleje miaku yanyi indi meme Maweja-Nangila Mvidi Mukulu, ntandisha nayi ditu didi kuinshi mu ditunga: “Nentemeshe kadilu bua kuosha mitshi yebe yonsu, mibishi nansha miume. Kakuena tshidi mua kujima ndimi ya kadilu aku to. Nekalambuke biangatshile kuinshi too ne ku mutu mu ditunga. Nekoshe bantu bonsu.

⁴ Muntu yonsu neamone ne: meme Maweja-Nangila mvua mutemeshe kadilu aku. Neamone kabidi ne: kakuena tshidi mua kukajima to.”

⁵ Meme kuandamuna ne: — Eyi! Maweja-Nangila Mvidi Mukulu, bakadi badila muadi, banjana ne: “Udi wakula anu mu mianu itudi katuyi mua kumvua.”

⁶ Maweja-Nangila kuamba kabidi ne:

⁷ — Yezekiyele, kudimuka utangile ku Yerushalayime. Ukanyine miaba ya kutendelela mvidie, utandishe ditunga dia Izrayele.

⁸ Umanyishe bena Izrayele ne: Maweja-Nangila udi unuambila ne: “Nennuluishe, nempatule muele wanyi wa mvita mu tshibubu bua kunushipa bonsu pamue, bimpe ne babi.

⁹ Ndi musue kunubutula bonsu. Ke pandi mupatule muele bua kushipa yonsu wa kunudi biangatshile kuinshi mu ditunga too ne ku mutu.

¹⁰ Bantu bonsu nebamanye ne: meme Maweja-Nangila mvua mupatule muele mu tshibubu tshiawu. Tshiena mua kuupingajamu kabidi to.”

¹¹ Kadi wewe Yezekiyele, winame panshi, bu muntu udi kayi kabidi mua kutekemena tshintu tshia nsongu, utua mikemu, bobu batangile.

¹² Nebakuebeje ne: udi utua mikemu bua tshinyi? Newandamune ne: “Ndi mupete lumu lubi, lukadi pa kukumbana. Bianza biabu nebilengelele kabiyi ne bukole. Binu biabu nebitutakanangane. Nebasukuile mu bilamba bua bowa. Mioyi neyitekete. Tshikondu tshia kubanyoka tshikadi pabuipi. Telejayi! Bionsu abi nebikumbane mpindiewu. Maweja-Nangila ke udi umanyisha malu awu.”

Muele neushipe bantu

¹³ Maweja-Nangila kungambila kabidi ne:

¹⁴ — Muntu, akula mu dina dianyi. Wambile bantu malu andi meme Maweja-Nangila mbamanyisha ne: “Tangilayi muele, muele mutue udi wengelela.

¹⁵ Mbausakishe bua kushipa bantu. Mbaupele, mbausukule bua wengelele, wele nsese.

¹⁶ Mvua muufile bua baupele, bua bamone mua kufuuna nawu. Bavua bausakishe, bausukule bua kuupesha mushipianganyi.

¹⁷ Wewe Yezekiyele, ela mbila ya dikenga. Mbatume muele bua kushipa bantu banyi, ne bamfumu bonsu ba bena Izrayele. Nebabashipe bonsu musangu umue. Uditute bianza pa tshiadi ne kanyinganyinga.

¹⁸ Dikenga nedikale dinene dipite. Ke tshindi ngamba meme Maweja-Nangila Mvidi Mukulu.

¹⁹ Mpindiewu, Yezekiyele, akula mu dina dianyi. Ukume bikashi. Ukume musangu umue, misangu ibidi, misangu isatu. Bualu muele ewu ke muele udi ushipangana. Neushipe bantu ba bungi, miaba yonsu.

²⁰ Muele udi utekesha mu maboku, uzakaja bantu bonsu. Kumpala kua tshiibi tshionsu, ndi muteke muele wa kushipa nawu bantu. Udi ukenka bu ndimi ya kapia, ukeba anu kushipa bantu.

²¹ Wewe muele mutue, ushipe bantu ku dia balume, ubashipe ku dia bakaji, ubashipe nseke yonsu!

²² Meme kabidi nenkume bikashi, nentalaje tshiji tshianyi. Meme Maweja-Nangila, ndi ngamba nanku.”

Badi baluisha Yerushalayime

²³ Maweja-Nangila kungambila ne:

²⁴ — Muntu, leja njila ibidi idi mukalenga wa Babilone mua kupitshila ne muele wende wa mvita. Njila yonsu ibidi ipatukile anu mu ditunga dimue. Muaba udi njila yonsu utuadija, uteke tshimanyinu tshidi tshileja ditunga didi muntu mua kufika padiye ulonda njila eyi.

²⁵ Njila umue neafikishe bena mvita ba bena Babilone mu tshimenga tshia Raba, tshia bena Amone. Njila mukuabu neabafile mu tshimenga tshia Yerushalayime tshidi mu Yuda, tshivuabu bakoleshe ne bimana.

²⁶ Mukalenga wa mu Babilone udi wimana mu masangu a njila, muaba udi njila ibidi ituadija bua amone mua kutempa lubuku. Udi unyungisha mikete, webeja mvidie malu, ukenketa mitshima ya nyama.

²⁷ Mukete udi uleja Yerushalayime, udi mu tshianza tshiende tshia balume. Nanku mukalenga neatume diyi bua bena mvita baye ku Yerushalayime, benda bela bibingu bia mvita. Neateke biamu binene bia mvita, bua binyange biibi bia tshimenga. Neele mishiki ya buloba, neumbule mikidi.

²⁸ Bena mu Yerushalayime badi bela meji ne: “Bivua muena lubuku mumanyishe mukalenga wa bena Babilone kabiena mua kuenzeka to, bualu dilaya divuabu batulaye didi ditalama bimpe.” Kadi mukalenga wa bena Babilone udi ubavuluija mudibu batombokela Maweja-Nangila, kabidi mudibu ne bua kuya nabu mu bupika.

²⁹ Ke pandi meme Maweja-Nangila mbambila ne: “Nudi numvuluija bubi buenu matuku onsu, ku malu mabi anudi nuenza patoke. Malu onsu anudi nuenza, adi amvuluija munudi bena tshibawu. Nanku, bu munudi kanuyi basue kudilengeja, nenubuele mu bianza bia baluishi!

³⁰ “Wewe mukalenga wa bena Izrayele, udi muntu mubi, udi kayi ukumbaja bivuaye mulaye. Kadi tshikondu tshikadi tshifika, tshidi buenzavi buebe ne bua kujika.

³¹ Meme Maweja-Nangila Mvidi Mukulu ndi ngamba ne: kuakuikala kabidi ne bimanyinu bia bukalenga to. Nebakutale tshifulu tshia bumfumu. Malu onsu mmandamuke. Bantu bapuekele nebasombe miaba ya lumu. Bantu ba bukole nebabapuekeshe.

³² Nemuikale amu mbuwa pa mbuwa! Nenshiye mu Yerushalayime anu mbuwa. Tshimenga tshijima netshibutuke. Kadi nengenze bualu ebu, amu muntu undi mupeshe bumfumu bua kubutula tshimenga mumane kufika.”

Badi baluisha bena Amone

³³ Maweja-Nangila kuamba ne: — Wewe Yezekiyele, ambile bena Amone ne: “Maweja-Nangila Mvidi Mukulu udi unukanyina, bua bipendu binuvua bapende bena Izrayele. Muele udiku, munuindile bua kunushipa. Mbausakishe bua kushipa nawu bantu. Mbaupele anu bua wikale wele nsese.

³⁴ Panutshidi nuitaba malu a dishima avua bantu abu bamone mu ndota, nansha avuabu banuambile, mbamane kulongolola muele bua kukosa mitu yenu, nuenu benji ba bibi, badi kabayi bakumbaja tshi-vuabu balaye. Bualu tshikondu tshiakumbanyi tshidi malu enu mabi ne bua kujika.

³⁵ Mpindiewu, bakalenga ba bena Babilone, pingajayi miele yenu mu bibubu. Bualu nennubutuile anu muaba uvuabu banufukile, mu ditunga divuabu banulelele.

³⁶ Nennupumuine tshiji tshianyi. Netshinuoshe bu mudi kadilu. Nennufile mu bianza bia bantu ba lonji badi bamanye mua kukengeshangana.

³⁷ Nebanuoshe mu kadilu. Mashi enu neapuekele mu ditunga dienu. Pashishe muntu nansha umue kakunuvuluka kabidi to. Meme Maweja-Nangila ndi ngamba nanku.”