Yezekiyele 20 - MUKANDA WA MYIDI MUKULU

Mvidi Mukulu udi ulombola bena Izrayele, nansha bobu bamutombokela

¹ Tshidimu tshia muanda mutekete, tshivuabu bamane kuya ne bena Izrayele mu bupika, dituku dia dikumi dia ngondu muitanu, bakulu bakuabu ba bena Izrayele kufika bua kunkonka ne: tshidi Maweja-Nangila musue menemene ntshinyi? Bobu kusomba panshi kuntangila.

² Nanku Maweja-Nangila kungambila ne:

³ — Yezekiyele, wambile bakulu ba bena Izrayele bindi meme Maweja-Nangila Mvidi Mukulu njadika ne: “Nudi bafike muaba ewu bua kumanya tshindi musue, ki mmomu anyi? Nanku meme Maweja-Nangila Mvidi Mukulu udi ne muoyi, ndi nditshipa ne: tshiena mua kuitaba bua nuenu kunkonka bualu to!”

⁴ Nansha wewe anu muntu, udilongolole bua kukosa tshilumbu tshiabu. Kutshinyi to. Ubavuluije malu mabi avua bankambua babu benze.

⁵ Ubavuluije miaku indi meme Maweja-Nangila Mvidi Mukulu mbambila ne: “Tshikondu tshimvua musungule bena Izrayele, mvua mutue nabu bonsu ndondu, muditshipe. Mvua mudileje kudibu mu Ejipitu. Mvua mubalaye bua kuikala Maweja-Nangila Mvidi Mukulu wabu.

⁶ Musangu awu, mvua mubalaye bua kubapatula mu Ejipitu, kubafikisha mu ditunga didi dipite matunga onsu ku buimpe. Ditunga dimvua musungule bua kubapesha anu bobu, divua ne mabele ne buitshi.

⁷ Meme kubela mikenji ne: muntu yonsu wa kunudi abenge mvidie ya dishima inudi nutendelela, bua kanupi mikiya pa kukukuila mvidie ya bena Ejipitu. Meme ndi Maweja-Nangila Mvidi Mukulu wenu.

⁸ “Kadi bena Izrayele kuntombokela, kubenga kungitaba. Muntu nansha umue kavua mubenge mvidie ya dishima ivuaye utendelela. Kavua muimanshe mpingu ya bena Ejipitu. Diba adi meme kushindika ne: nembanyoke ne tshiji. Nkavua musue kubabutuila mu Ejipitu mene.

⁹ Kadi, tshivua muenze nanku to, bua bena ditunga divua bena Izrayele basombe kabavu kumpepeja. Bualu bantu aba bavua bateleja mumvua mulaye bena Izrayele bua kubapatula mu Ejipitu.

¹⁰ Nanku, meme kubapatula mu Ejipitu, kubafikisha mu tshipela.

¹¹ Mvua mubalongeshe meyi ne mikenji bi-mvua muele bua bantu bonsu badi babilonda bikale ne muoyi.

¹² Mvua muele diyi kabidi bua banemeke dituku dia Dikisha, bua kuleja diumvuangana didi pankatshi panyi nabu, bua kubavuluija kabidi ne: meme Maweja-Nangila ndi mubajidile bua bangenzele mudimu.

¹³ Kadi bena Izrayele bavua bantombokela mu tshipela. Bavua balengulula mikenji yanyi. Bavua bapepeja meyi anyi adi afikisha muntu udi walama ku muoyi. Bavua banyange bikole dituku dia Dikisha. Nanku meme kuela meji tshiakabidi a kubajikijila tshiji tshianyi mu tshipela bua kubabutula.

¹⁴ Kadi tshiena muenze nanku to, bualu bantu bavua bammone mpatula bena Izrayele mu tshipela, bavua mua kumpepeja.

¹⁵ Kadi mu tshipela mvua muditshipe ne: tshiena mua kubafikisha mu ditunga dimpe dimvua mubatekele, didi ne mabele ne buitshi.

¹⁶ Mvua muditshipe nanku, bualu bavua babenge kulama meyi ne mikenji bianyi, kabidi bavua banyange dituku dianyi dia Dikisha. Bavua bitaba anu mvidie yabu.

¹⁷ Kadi meme kumvua luse lua bungi. Nanku, tshivua mubashipe, mubabutule mu tshipela to.”

Bena Izrayele bavua anu babenga kutumikila Mvidi Mukulu

¹⁸ “Mvua mukandike bana babu mu tshipela ne: Kanulondi meyi ne mikenji bivua bankambua benu badielela. Kunukukuidi mvidie yabu mibi imvua mubenge. Tshianana nudi nupia mikiya.

¹⁹ Meme ndi Maweja-Nangila Mvidi Mukulu wenu. Nulonde mikenji yanyi. Nukumbaje meyi anyi.

²⁰ Nujidile dituku dianyi dia Dikisha bua kuleja mutudi batue nenu ndondu, ne bua nuenu kuvuluka ne: meme ndi Maweja-Nangila Mvidi Mukulu wenu.

²¹ Kadi bana babu kabidi bavua bantombokela. Kabavua bakumbaje mikenji yanyi. Kabavua balame meyi anyi adi afikisha muntu udi walama ku muoyi. Bavua banyanga dituku dia Dikisha. Diba adi, mvua mujadike ne: nembanyoke ne tshiji. Ndi musue kubajikijilatshi mu tshipela.

²² Kadi tshiena muenze nanku, bua bantu bavua bammone mpatula bena Izrayele mu Ejipitu, kabavu kumpepeja.

²³ Kadi mu tshipela mvua muditshipe ne: nennumuangalaje munkatshi mua bisamba bikuabu mu matunga a bende.

²⁴ Mvua muditshipe nanku, bualu kabavua balame meyi ne mikenji bianyi, kabavua banemeka dituku dia Dikisha. Kadi bavua batendelela mvidie mibi ya batatuabu.

²⁵ Meme kubapesha kabidi mikenji, kadi kayivua mibenzele bimpe to. Mvua mubapeshe meyi avua kaayi abapesha muoyi.

²⁶ Mvua muanyishe bua bapie mikiya, padibu balambule ba muanabute, babashipa. Bionsu abi bivua bibakuatshisha bowa, bua bavuluke ne: meme ndi Maweja-Nangila.”

Mvidi Mukulu neakandike bena Izrayele bua kabatendeledi mvidie

²⁷ — Wewe Yezekiyele, ambile bena Izrayele bindi meme Maweja-Nangila Mvidi Mukulu mbamanyisha ne: “Bankambua benu bavua bantombokela, babenge kungitaba.

²⁸ Meme kubafikisha mu ditunga dimvua muditshipe bua kubapesha. Kadi, kuaka kuayibu, mbamone nsongu ya mikuna ivua ne mitshi ya bifufu. Kubandabu kuine aku bua kulambula milambu. Bavua bamfikisha munda ne bintu bivuabu balambula, manananshi avuabu bosha, ne maluvu avuabu balambula muaba awu.

²⁹ Ke meme kubakonka ne: ‘Tshinudi nuya kukeba pa mikuna mitumbuke ntshinyi?’ Biangatshile musangu awu, badi binyika miaba ayi ne: mmiaba ya kutendelela mvidie.

³⁰ Wambile bena Izrayele ne: Maweja-Nangila Mvidi Mukulu udi unukonka ne: Nudi nulonda tshibidilu tshia bankambua benu, nupia mikiya, nuntombokela, nunemeka mvidie yabu indi mubenge bua tshinyi?

³¹ Nansha mpindiewu nudi nupia mikiya, panudi nuyilambula bintu, nuyishipela bana benu. Nuenu bena Izrayele, nudi nuela meji ne: panudi nuenza nanku, ndi mua kuitaba bua nuenu kunkonka bualu anyi? Kabiena mua kuenzeka to! Meme Maweja-Nangila Mvidi Mukulu wa muoyi, tshiena mua kuitaba bua nunkonke bualu to.

³² Nudi nuela meji ne: nudi mua kuikala bu bantu ba bisamba bikuabu, badi batendelela mitshi ne mabue anyi? Nansha kakese! Kabiakuenzeka to.

³³ Ndi Maweja-Nangila Mvidi Mukulu udi ne muoyi. Nennukengeshe ne bukole buonsu. Tshiji tshianyi netshinunyoke bikole. Ke mundi nnuleja ne: ndi mfumuenu.

³⁴ Nennumushe munkatshsi mua bisamba ne mua matunga munuvua batangadika. Nennusangishe kaba kamue bua numanye bukole buanyi, mimanye tshindi ngenza pandi mufike munda.

³⁵ Netuye nenu mu tshipela, muaba udi kauyi bantu bakuabu. Nennuimanyike kumpala kuanyi bua kunulumbuluisha.

³⁶ Nennunyoke bu mumvua munyoke bankambua benu mu tshipela tshidi pabuipi ne Ejipitu. Meme Maweja-Nangila Mvidi Mukulu, ndi ngamba nanku awu.

³⁷ Nenkuate mudimu bua nuikale tshiakabidi tshisumbu tshianyi tshia mikoku, ne bua nunemeke malu onsu anuvua balaye pa kutua nanyi ndondu.

³⁸ Nengumushe munkatshi muenu bantu bavua bantombokela kabayi bangitaba. Nembumushe mu matunga adibu basombe. Kadi kabena bapingana mu buloba bua Izrayele bua kusombamu to. Nanku nenujadike ne: meme ndi Maweja-Nangila.

³⁹ Meme Maweja-Nangila Mvidi Mukulu, ndi nnuambila ne: Nuenu bena Izrayele, muntu yonsu wa kunudi, nansha yeye mukukuile mvidie yende mibi indi mubenge, kadi dikuabu dituku nenuikale anu ne tshilumbu tshia kungitaba. Nenulekele kupepeja dina dianyi dia tshijila, nulekele kulambula mvidie milambu.

⁴⁰ Nanku, bena Izrayele bonsu badi mu ditunga nebantendelele pa mukuna munene wa Izrayele, udibu bajidile mu dina dianyi. Muaba awu, nennuakidile bimpe; nennulombe bua nuntuadile bionsu binudi basue kundambula, nyama ne bintu bimpe bia pa madimi enu.

⁴¹ Meme mumane kunumusha munkatshi mua bisamba ne matunga anuvua bamuangalake, nennusangishe kaba kamue. Nengitabe milambu yenu ya dipembu dimpe. Nanku, malu onsu andi nnuenzela, nealeje bantu bakuabu ne: meme ndi Mvidi Mukulu wa tshijila.

⁴² Nuenu kabidi, nenujadike ne: ndi Maweja-Nangila, bualu nennufikishe mu ditunga dia Izrayele dimvua muditshipe, mulaye bua kupesha bankambua benu.

⁴³ Muaba awu nenuvuluke malu enu a kale avua manupishe mikiya. Bundu nebunukuate bua malu mabi onsu anuvua benze.

⁴⁴ Nuenu bena Izrayele, tshiena nnunyoka bilondeshile malu mabi anuvua benze nansha. Kadi nengenze bionsu bua nunemeke dina dianyi. Nenujadike ne: meme ndi Maweja-Nangila. Nuamanyi kumvua malu amvua musue kunuambila meme Maweja-Nangila Mvidi Mukulu.”