Yezekiyele 19 - MUKANDA WA MYIDI MUKULU

Badi badila bua ntambue idi mu dikenga

¹ Maweja-Nangila kungambila bua kuela kasala ka madilu, bua kudila bakalenga babidi ba mu Izrayele. Meme kudila ne:

² Mamuebe uvua nyama wa ntambue wa dikima, uvuabu banemeka kudi ntambue mikuabu milume. Uvua mulale munkatshi mua bana bende, wamusha tuana tuende dibela.

³ Kukoleshaye nangananga umue wa ku bana bende. Yeye kuenza muana wa ntambue muimpe mutambe. Kumanyaye mua kukuata nyama, kudia kusukumina. Kushipaye bantu ba bungi.

⁴ Bantu benyi kumvua bakula bualu abu. Kukuatabu ntambue awu mu buteyi. Kuyabu nende mu ditunga dia Ejipitu, muela lukanu ku diulu.

⁵ Mamuende kuindila bikole. Kumonaye ne: tshiena mua kutekemena muananyi kabidi to. Nanku kuangataye muanende mukuabu. Kumukoleshaye bua ikale muana wa ntambue wa bukole.

⁶ Muana awu kulala munkatshi mua ntambue mikuabu. Kuenzaye nyama wa ntambue muimpe mutambe. Kumanyaye kabidi mua kukuata nyama, kudia kusukumina. Kushipaye bantu ba bungi.

⁷ Kushipaye bantu mu bimenga biabu, kunyangaye ne bimenga abi. Bantu ba mu ditunga bavua ne bowa, pavuabu bumvue ntambue ukungula.

⁸ Bantu benyi bavua bafume miaba yonsu, kudisangishabu bua kumuluisha. Kumunyungulukilabu, bamuadila bua kumukuata. Kumukuatabu mu buteyi.

⁹ Kumusuikabu lukanu ku diulu, kumubuejabu mu nsanji wa tshiamu, kuyabu nende kudi mukalenga wa Babilone. Kumuelabu mu nzubu wa lukanu bua kabunwu kabidi mudiye ukungula pa mikuna ya Izrayele.

Badi badila bua muonji wa mvinyo

¹⁰ Mamuebe uvua mufuanangane ne muonji wa mvinyo, mukuna ku muelelu wa mayi. Uvua mutoloke mabeji, mukuame bimuma, bualu uvua upeta mayi mavule.

¹¹ Uvua ne matamba mimpe makole. Bavua benza nawu makombu a bukalenga. Uvua mutumbuke ku mitshi yonsu. Bavua bakema bua bule buawu, ne bua bungi bua mabeji awu.

¹² Kadi bavua bajula muonji awu ne tshiji, bawimansha panshi. Lupepepe lua kudi diba dipatukila, kumisha bimuma biawu, kumatabi panshi. Matamba mimpe awu kuuma. Bantu kuwosha muiku.

¹³ Mpindiewu muonji wa mvinyo, mbaukune mu tshipela, mu ditunga diume kadiyi ne mayi.

¹⁴ Kapia kupatukila mu muonji ewu, kabutula matamba awu ne bimuma biawu. Kawena kabidi ne ditamba dimpe, didibu mua kuenza dikombu dia bukalenga. Kasala aka nka kuela, badila muadi.