Yezekiyele 18 - MUKANDA WA MYIDI MUKULU

Mvidi Mukulu udi ulumbuluisha muntu yonsu bilondeshile bidiye wenza

¹ Maweja-Nangila uvua unkonka ne:

² — Mmunyi munudi nuela kasumuinu mu ditunga dia Izrayele, nuamba nuambulula ne: Baledi bakadia tumuma tubishi, bana kumvua buanji ku menu.

³ “Meme Maweja-Nangila Mvidi Mukulu wa muoyi, ndi njadika ne: kanuakuambulula kabidi kasumuinu aka mu Izrayele to.

⁴ Bualu muoyi wa bantu bonsu ngwanyi meme. Muoyi wa baledi ngwanyi meme, anu bu mudi muoyi wa bana. Anu muena tshibawu wasangana kufua anyi? Wafua!

⁵ “Tuangate tshilejilu tshia muntu udi wenza malu onsu anu mimpe, ulonda anu njila mululame wa buakane.

⁶ Muntu awu kena udia bidibu balambule mvidie pa mikuna. Kena utendelela mvidie mibi ya bena Izrayele. Katshia kena ubuelakana ne mukaji wa bende. Kena ubuelela mukaji mu nzubu, padiye ku tshijila tshia bakaji.

⁷ Kena ukengesha muntu, nansha wiba muntu awu. Udi upingaja tshieya tshivua muena dibanza mumueyeke. Udi upesha muntu udi ne nzala biakudia, upesha muntu uvua butaka tshilamba.

⁸ Kena usombeshangana makuta bua kuvudija biuma biende, nansha bua kupeta makasa, Kena wambuluisha benji ba bibi. Kadi udi ukosa bilumbu anu pa biobi.

⁹ Mu tshikosu, udi witaba meyi ne mikandu bimvua muele, wenza anu bimpe. Nanku meme Maweja-Nangila Mvidi Mukulu, ndi njadika ne: muntu awu mmuntu wa nsongu, neikale ne muoyi.

¹⁰ “Kadi muntu awu udi mua kuikala ne muanende wa balume wiba, ushipa bantu, nansha wenza malu mabi a mishindu yonsu.

¹¹ Kena wenza malu mimpe bu muvua tatuende wenza nansha. Udi udia biakudia bivuabu balambule mvidie pa mikuna. Udi ubuelakana ne mukaji wa bende.

¹² Udi ukengesha bapela ne bena dikenga. Udi wiba bintu bia bantu. Kena upingaja tshieya tshivua muena dibanza mumueyeke. Udi utendelela mvidie, wenza malu mabi, andi mbenga.

¹³ Udi usombeshangana makuta bua kuvudija biuma biende ne kupeta makasa. Muntu wa nanku udi mua kushala ne muoyi anyi? Nansha kakese! Udi muenze malu mabi onsu aa andi mbenga. Nanku neafue. Yeye nkayende mmudikebele lufu luende.

¹⁴ “Kadi muntu awu udi mua kuikala ne muanende wa balume. Muana awu, nansha yeye mumone bilema bionsu bivua tatuende muenze, kena ubilonda.

¹⁵ Kena udia biakudia bidibu balambule mvidie pa mikuna. Kena utendelela mvidie mibi ya bena Izrayele. Kena ubuelakana ne mukaji wa bende.

¹⁶ Kena ukengesha muntu, kena wiba, kena wangata tshieya kudi bena mabanza ende. Udi upesha muntu udi ne nzala biakudia, upesha muntu udi butaka tshilamba.

¹⁷ Kena wambuluisha benji ba bibi. Kena usombeshangana makuta bua kuvudija biuma biende ne dipeta dia makasa. Mu tshikosu, udi witaba meyi ne mikandu bimvua muele. Nanku muntu awu kakufua bua bilema bia tatuende to. Bulelela neikale ne muoyi.

¹⁸ Amu tatuende ke uvua muenze bibi, muibe, mukengeshe bantu bavuaye nabu. Nanku tatuende neafue bua bilema biende.

¹⁹ “Nudi nukonka ne: kabena banyoka muana bua bilema bia tatuende bua tshinyi? Bualu, muana uvua muenze amu malu mimpe, muitabe ku mikenji yanyi yonsu. Nanku neikale ne muoyi.

²⁰ Anu muena tshibawu, wasangana kufua anyi? Wafua! Kabena mua kunyoka bana bua bubi bua baledi babu, nansha kunyoka baledi bua bubi bua bana babu. Muntu muimpe nebamufute bilondeshile buimpe buende. Muntu mubi nebamunyoke bilondeshile bubi buende.

Enzayi malu mimpe

²¹ “Padi muntu mubi ulekela bubi buende, utuadija kulama meyi, ulonda anu njila mululame wa buakane, muntu awu neapete muoyi bulelela, kakufua to.

²² Kabena mua kuvuluka kabidi bubi buende to. Neapete muoyi bua malu mempe adiye wenza.

²³ Nudi nuela meji ne: ndi nsanka pandi mmona muntu ufua bua malu mabi anyi? Meme Maweja-Nangila Mvidi Mukulu, ndi njadika ne: ndi njinga amu bua bena malu mabi badilengeje, bapete muoyi.

²⁴ Kadi padi muntu muimpe ubanga kuenza malu mabi, ulonda dikasa dia bantu babi, muntu awu udi mua kushala ne muoyi anyi? Nansha kakese! Kabena mua kuvuluka kabidi malu mempe avuaye wenza. Neafue bua malu mabi adiye wenza, bualu kena mungitabe to.

²⁵ Nudi nuamba ne: ‘Bidi Maweja-Nangila wenza kabiena bimpe to. Udi ukolesha malu!’ Nuenu bena Izrayele, telejayi bimpe, udi ukolesha malu mmeme anyi? Nansha kakese! Badi bakolesha malu bapitshisha, ke nuenu!

²⁶ Padi muntu muimpe ulekela kuenza bimpe, ubanga kuenza bibi, utulama, udi ufua bua bubi budiye wenza.

²⁷ Kadi muntu mubi udi ulekela kuenza malu mabi, ubanga kulonda njila wa buakane, neadisungidile.

²⁸ Neashale ne muoyi, bualu mmumone nuwuaye wenza bibi, mudilengeje. Nanku kakufua to.

²⁹ Kadi, nuenu bena Izrayele, nudi nuamba ne: ‘Maweja-Nangila udi ukolesha malu!’ Kadi udi wenza bibi, ukolesha malu ki mmeme nansha! Amu nuenu ke badi benza bibi bapitshisha.

³⁰ Meme nendumbuluishe yonsu wa kunudi bilondeshile malu adiye wenza. Meme Maweja-Nangila ndi njadika nanku. Enzayi malu mimpe. Lekelayi bibi bionsu binudi nuenza. Kanuenji bubi nansha bumue budi mua kunujimija.

³¹ Lekelayi kuenza malu mabi. Akajayi mioyi yenu, ne lungenyi luenu. Nuenu bena Izrayele nudi basue kufua bua tshinyi?

³² Bulelela, meme Maweja-Nangila, tshiena musue lufu lua muntu nansha umue. Lekelayi bubi buenu buonsu, nanku nenushale ne muoyi!”