Yezekiyele 17 - MUKANDA WA MYIDI MUKULU

Nyunyi wa tshiminyi ne muonji wa mvinyo

¹ Maweja-Nangila kungambila ne:

² — Muntu, wikala welele bena Izrayele mianu pa kubalondela bualu.

³ Ubambile ne: Maweja-Nangila Mvidi Mukulu, ke udi unuelela lusumuinu elu. Lusumuinu elu ludi nenku: “Kuvua nyunyi wa tshiminyi munene mupite. Uvua ne mapuapua manene, masala male a bungi, mikale makalu makalu. Uvua ubuka uya kuikila ku mikuna ya Lebanone. Kukosayemu lutonga lua mutshi wa Sedre,

⁴ luvua mu katongobela. Kuyaye nalu mu ditunga dia bangenda mushinga, kulutekaye mu tshimenga tshia bantu babanji.

⁵ Kuangataye kabidi lutonga lukuabu mu ditunga dia bena Izrayele, kuya nalu mu budimi busekuna. Kulukunaye ku muelelu wa mayi a bungi bua lukole bimpe.

⁶ Lutonga alu kutoloka kuenza muonji wa mvinyo munene, ulamba panshi. Matamba a muonji awu kubaluluka, kukola, kutangila too ne ku muaba uvua nyunyi wa tshiminyi. Miji ya muonji kubuela mu buloba. Muonji awu kusampila bikole, kuela ntonga mipiamipia.

⁷ Kadi nyunyi wa tshiminyi mukuabu, muikale kabidi munene, kufika. Uvua kabidi ne mapuapua manene, ne masala a bungi. Nanku muonji wa mvinyo kutangija miji yawu ne matamba kabidi kuvua nyunyi muibidi awu. Muonji uvua mutekemene mua kupeta mayi a bungi, mapite avuawu upeta mu buloba muvuawu.

⁸ Kadi bavua baukune kumpala mu buloba bufukisha ku muelelu wa mayi a bungi, bua wele matamba adi mua kukuama bimuma bia bungi, bua wikale wa mvinyo muimpe mutambe.”

⁹ Nanku, meme Maweja-Nangila Mvidi Mukulu, ndi nkonka ne: “Muonji wa mvinyo ewu udi mua kukola anyi? Nyunyi wa tshiminyi wa kumpala kena mua kujula miji yawu, kunyanga bimuma biawu, bua ntonga yawu mipiamipia ifube anyi? Tshiminyi katshiakukengela bukole bua bungi, nansha bena mudimu basule, bua kujula muonji ewu to.

¹⁰ Bushuwa, bavua bakuna muonji wa mvinyo awu bimpe. Kadi kawena mua kukola to. Bualu padi lupepele lua luseke ludi diba dipatukila lututa, neume onsu. Neumine anu muaba uvuawu mutolokele awu.”

Diumvuija dia lusumuinu

¹¹ Maweja-Nangila kungambila ne:

¹² — Ebeja bantomboji aba ne: “Nudi bu-mvue tshidi lusumuinu alu luamba anyi?” Ubavuluije mushindu uvua mukalenga wa bena Babilone mubuele mu Yerushalayime, mukuate mukalenga wa ditunga ne balombodi bende, muye nabu mu ditunga diende.

¹³ Uvua mukuate kabidi muntu wa mu diku dia bukalenga, mutue nende ndondu, umulombe kabidi bua aditshipe bua amuitabe. Uvua mumushe kabidi balombodi bonsu mu ditunga,

¹⁴ bua bukalenga kabuikadi ne bukole, kabaditambishi kabidi, bunemeke bimpe ndondu uvuabu bamane kutua ne mukalenga.

¹⁵ Kadi mukalenga mupiamupia uvua mutombokele usua mumutshimune. Uvua mutume bantu ne mukenji ku Ejipitu, ulomba bena mvita ba bungi ne nyama ya tubalu. Kadi muntu uvua muenze bionsu ebi neapete diakalenga anyi? Neasungidile ditunga anyi? Nansha kakese! Bualu muntu uvua munyange ndondu uvuabu batue, kabakupanga kumunyoka.

¹⁶ Meme Maweja-Nangila Mvidi Mukulu wa muoyi, ndi nditshipa ne: “Mukalenga ewu neafuile mu ditunga dia mukalenga uvua mumuteke mu nkuasa wa bukalenga. Bualu kavua munemeke mitshipu iwaye muditshipe, kabidi uvua munyange ndondu uvuabu batue nende. Nanku neafuile anu mu Babilone.

¹⁷ Nansha yeye muikale ne bena mvita ba bungi ba bukitu, mukalenga wa bena Ejipitu kena mua kumuambuluisha bua kuluisha bena Babilone badi bela mishiki ya buloba, bumbula mikidi bua bamone mua kukuata tshimenga, kushipa bantu ba bungi.

¹⁸ Bu mudi mukalenga ewu munyange ndondu uvuabu batue, uvua ubenga kunemeka bivuaye mulaye. Bu mudiye muenze nanku, yeye mumane kuditshipa, kena mua kupanda to!”

¹⁹ Meme Maweja-Nangila Mvidi Mukulu wa muoyi, ndi ngamba ne: “Mukalenga wa bena Izrayele mmunyange ndondu uvuaye mutue, uditshipa kumpala kuanyi. Nanku, pa bualu ebu nemmunyoke.

²⁰ Nemmuteye buteyi, mmukuate. Nemmufile mu Babilone bua mmunyokelemu, bualu uvua muntombokele, meme Maweja-Nangila.

²¹ Nebashipe bena mvita bende ba bukitu mu mvita. Badi bashale ne muoyi nebabatangalaje nseke inayi ya buloba. Nanku nenumanye ne: meme Maweja-Nangila, ndi nnumanyisha bionsu ebi.”

Maweja-Nangila udi ulaya

²² — Maweja-Nangila Mvidi Mukulu udi wamba ne: “Nendiangatshile meme nkayanyi lutonga lutekete lua mutshi wa Sedre. Nendukose ku lusongu lua mutshi. Nendukune pa mukuna udi mupite kutumbuka.

²³ Nendukunyine pa mukuna wa mu Izrayele udi mupite kutumbuka. Neluele matamba, lukuama ntete. Neluenze mutshi wa Sedre muimpe mutambe. Nyunyi ya mishindu yonsu neyibakile masua ayi mu matamba alu. Neyipete dileji dia kuikishila.

²⁴ Diba adi, mitshi yonsu ya mu mpata neyimanye ne: ndi Maweja-Nangila. Ndi ngipidija mitshi idi mitumbuke, ndi ndepesha idi mipi. Ndi ngumisha mitshi mibishi. Ndi ngelesha mitshi miume ntonga. Meme Maweja-Nangila ndi njadika nanku awu. Nenkumbaje anu mundi muambe amu.”