Yezekiyele 16 - MUKANDA WA MYIDI MUKULU

Yerushalayime uvua bu muana mulekela

¹ Maweja-Nangila kungambila ne:

² — Muntu, uleje bena mu Yerushalayime muvuabu benza bibi bitambe.

³ Ubamanyishe miaku indi meme Maweja-Nangila Mvidi Mukulu nkuambila ya ne: “Kenaane nditunga dia bankambua bebe, muaba uvuabu bakulelele. Tatuebe uvua muena Amore, mamuebe muena Iti.

⁴ Pavuabu bakulela muntu nansha umue kavua mukose mumfu webe to. Kabavua bakoweshe mayi, kabavua bakufite luepu, kabavua ba-kuvuadike mikaya.

⁵ Muntu nansha umue kavua mukumvuile luse. Muntu nansha umue kavua mukutangile ne mesu a luse bua kukukuatshila midimu eyi. Kabavua bakunange to. Bavua bakuimanshe panshi butaka, katshia bakulela.

⁶ Meme kupitshila pabuipi nebe, kusangana mulale amu mu mashi ebe. Nansha muuvua mudibonde mu mashi ebe pambidi ponsu, meme kukuambila ne: shala ne muoyi. Meme kuenza muanyi muonsu bua wikale anu ne muoyi.

⁷ Meme kukukolesha, wewe kuenza bu tshilongu tshidi tshitayika, tshilengela. Wewe kutantamana, kushala nsongakaji mulengele, wewe kuasa mabela, miosa yebe kupatuka pambidi. Kadi uvua anu butaka menemene.

⁸ Meme kupitshila pabuipi nebe tshiakabidi. Mvua mumone ne: ukavua mukumbaje bidimu bia kukubangila. Nanku, meme kukubikila ne tshinkutu tshianyi bua kujika butaka buebe. Meme kukulaya ne: nenshale webe ne muoyi umue. Meme kutua nebe ndondu. Ke mumua mushale wanyi meme. Meme Maweja-Nangila Mvidi Mukulu, ndi njadika bualu ebu.

⁹ “Meme kuangata mayi, kukowesha bua kumusha mashi auvua nawu pambidi. Pashishe, meme kukufita mafuta masambakaja ne manananshi.

¹⁰ Meme kukupesha bilamba bizola bimpe, ne bisabata bia tshiseba tshimpe, ne mukaba wa buanda bua ndanda, ne tshinkutu tshienza ne buanda bua miosa ya nyama.

¹¹ Meme kukuvuadika bilengejilu. Meme kukuela bikanu ku maboku, ne mabue mu nshingu.

¹² Meme kukuela kakanu ku diulu, ne tukanu tukuabu ku matshi ebe, kukuasa tshifulu tshia lumu ku mutu.

¹³ Bilengejilu biebe bivua bia tshiamu tshia mpawungi, ne bia tshiamu tshitoke tshia mushinga mukole. Bilamba biebe bisua bia buanda bua ndanda, ne bikuabu bia miosa ya nyama, bizola bimpe. Meme kukudisha ne bukula buimpe, buitshi ne mafuta a olive. Wewe kuakana, kulengela be. Kukusungulabu bua wewe kuikala mukalenga mukaji.

¹⁴ Lumu luebe kumuangalaka mu buloba bujima, bualu uvua mulengele, kuyi kalema. Kadi uvua mukulengeje bimpe nanku, mmeme. Meme Maweja-Nangila Mvidi Mukulu, ndi njadika bualu ebu.”

Yerushalayime kudienza mukaji muena tshiendenda

¹⁵ “Kadi uvua udikukula bua bulenga buebe, ne bua lumu luuvua nalu. Ke wewe kubanga kudifila kudi muntu yonsu udi upitshila mu njila.

¹⁶ Wewe kusungula bimue bia ku bilamba biebe bia mekala, bua kulengeja nabi miaba ya kutendelela mvidie. Wewe kudiolola pa bilamba ebi, kuditua mu buendenda. Bualu ebu ki mbuanji kuenzeka, ne kabuakuenzeka kabidi to.

¹⁷ Bilengejilu bia tshiamu tshia mpawungi, ne bia tshiamu tshitoke tshia mushinga mukole, bimvua mukupeshe, uvua mufule nabi mpingu ileja mubidi wa bantu balume. Wewe kuenda nayi buendenda.

¹⁸ Uvua muvuadike mpingu eyi bilamba bizola bimpe, bimvua mukupeshe. Wewe kulambula mvidie eyi mafuta ne manananshi bimvua mukupeshe.

¹⁹ Bua kuyisankisha, wewe kuyilambula biakudia bionsu bimvua mukupeshe bua wewe kudia: ke bukula buimpe butambe, mafuta ne buitshi. Meme Maweja-Nangila Mvidi Mukulu, ndi njadika bualu ebu.

²⁰ Uvua muyilambule kabidi bana ba balume ne ba bakaji bautua mundelele. Wewe kubafila bua mvidie ibadie yukute. Kabitua bikumbane bua wewe kuenda tshiendenda tshiebe patupu anyi?

²¹ Muuvua ukimina kukosa bana banyi mitu, bua kubalambula mvidie yebe mbishi?

²² Matuku audi wenda tshiendenda tshiebe tshibi atshi, kuena mutuluke musangu nansha umue buana buebe, tshikondu tshiutua butaka, tshiutua mudibonde mu mashi.

²³ “Udi muena diakabi. Diakabi adi neudipete bua malu mapite bubi audi muenze. Meme Maweja-Nangila Mvidi Mukulu, ndi njadika bualu ebu.

²⁴ Kadi wewe utua anu mutungunuke ne malu ebe mabi. Wewe kudiashila bibumba miaba yonsu, miaba mitumbuke idi bantu mua kumona bimpe.

²⁵ Ku tshibuelelu tshia musesu onsu, wewe kuasa tshibumba. Wewe kuela bulenga buebe mu bitotshi, kuleja muntu yonsu utua upita mu njila butaka buebe. Wewe kuenda tshiendenda, kuyi ulekela.

²⁶ Wewe kuenda tshiendenda ne bena Ejipitu, bena mutumba bebe badi ne bukole. Wewe kumfikisha munda ne buendenda buebe buvule.

²⁷ Ke meme kukuleja panyi bukole buanyi, kukupala biakudia, kukufila mu bianza bia baluishi bebe, bua baye nebe mu bimenga bia bena Peleshete, batua bumvua bundu bua malu mabi auvua muenze.

²⁸ Kadi lukuka luebe kalutua lujika to. Wewe kuenda tshiendenda ne bena Ashure. Kadi nansha bobu kabavua mua kukusankisha to.

²⁹ Ke wewe kuenda tshiendenda tshia mishindu yonsu mu ditunga dia bena Babilone, bangenda mushinga. Kadi bionsu ebi kabivua bijikije lukuka luebe to.

³⁰ Eyi, lukuka lua bisankasanka udi nalu bushuwa. Meme Maweja-Nangila Mvidi Mukulu, ndi njadika bualu ebu. Ke paudi wenza malu a bundu onsu, adi muena tshiendenda mukuabu kayi nansha mua kuenza!

³¹ Wewe kuasa tshibumba ku tshibuelelu tshia musesu onsu. Uvua muakaje, mu bisalu bionsu, muaba mutumbuke bua umueneke bimpe. Kuuvua nansha mulombe bua bakufile, bu mudibu bonda muena tshiendenda yonsu!

³² Uvua mufuanangane ne mukaji wa bende udi unanga balume bakuabu pa mutu pa kunanga bayende.

³³ Bakaji bonsu bena tshiendenda, badi babafuta, kadi wewe mene utua onda bananga bebe. Wewe kubafuta, bua balume ba miaba yonsu baku-vuile bua balale nebe.

³⁴ Biuvua muenze mbishilangane ne bidi bakaji bakuabu bena tshiendenda benza. Balume kabatua bakukeba, kabavua bakonda. Kadi wewe ke uvua onda balume. Nenku, wewe utua mukudimune malu.

³⁵ “Wewe Yerushalayime, muena tshiendenda, teleja diyi dia Maweja-Nangila.

³⁶ Teleja tshindi meme Maweja-Nangila Mvidi Mukulu nkuambila ne: Utua muvule bilamba biebe bionsu, muleje bitupa bionsu bia mubidi webe kudi bananga bebe, mvidie yebe indi mbenga. Wewe kupumuna mashi a bana bebe bauvua mulambule mvidie yebe.

³⁷ Ke pandi nsangisha balume bonsu bauvua udisankisha nabu, ne bauvua munange, ne bauvua mubenge. Meme mumane kubasangisha bafume nseke yonsu, nenkuteke kumpala kuabu, nenkuvule bilamba biebe bionsu, bobu batangile.

³⁸ Nenkunyoke mudibu banyoka bakaji bena buendenda ne bashipianganyi. Nenkufundile tshibawu tshia lufu, bualu udi mujule tshiji tshianyi ne mukawu wanyi.

³⁹ Nenkufile mu bianza bia bananga bebe. Nebupule bibumba bionsu ne bilambuilu biuvua muenze. Nebakuvule bilamba, bakukopola bilengejilu biebe bionsu, bakushiya butaka menemene.

⁴⁰ Pashishe nebasonsole musumba wa bantu bua bakuase mabue. Nebakusaye ne miele yabu ya mvita.

⁴¹ Neboshe nzubu yebe. Nanku nebakumbaje tshibawu tshivuabu bakufundile, bakaji ba bungi batangile. Nenjikije buendenda buebe. Kuakonda kabidi balume to.

⁴² Ke mundi mua kutalaja tshiji tshianyi, tshiyi nkumvuila kabidi mukawu. Nensombe talala. Tshiakufika munda kabidi to.

⁴³ Kuena muvuluke tshimvua mukuenzele ku buana buebe to. Udi mumfikishe munda ku bionsu biuvua muenze. Ke mundi ne bua kukunyoka bua buenzavi buebe! Meme Maweja-Nangila, ndi njadika bualu ebu. Kuvua musakidile buenzavi bua bundu ebu ku malu ebe mabi makuabu a kutendelela mvidie anyi?”

Tshimenga tshia Yerushalayime ntshibi tshipite bimenga bikuabu

⁴⁴ Maweja-Nangila kuamba kabidi ne: — “Yerushalayime, bedi ba nsumuinu nebakuambe ne: ‘Tshiowa katshitu tshilela munga nyunyi’.

⁴⁵ Bushuwa, udi muana wa bakaji udi mufuane mamuebe. Mamuebe uvua mubenge bayende ne bana bende. Wewe udi mufuanangane kabidi ne bana benu ba bakaji, bavua babenga babayabu, ne bana bavuabu balele. Mamuebe mmuena Iti. Tatuebe mmuena Amore.

⁴⁶ Yayebe, ku mutu wa ditunga, ke tshimenga tshia Samariya, ne misoku idi natshi mutumba. Muakunyebe wa bakaji, kuinshi kua ditunga, ke Sodome, ne misoku idi nayi mutumba.

⁴⁷ Kuena muidikije amu bibi bivuabu benze bobu nansha. Kuvua mulonde anu dikasa diabu dibi. Kadi uvua muenze wewe bibi bipite biabu kashidi.

⁴⁸ Meme Maweja-Nangila Mvidi Mukulu wa muoyi, ndi njadika ne: Sodome, muanenu wa bakaji, ne misoku idi nayi mutumba, katshia kabena banji kuenza bubi buuvua muenze wewe, ne misoku idi nebe mutumba.

⁴⁹ Teleja, bilema bivuabu benze bobu mbiebi: bavua baditambisha, badia buukuta, kabayi ne lutatu. Kadi kabavua bambuluishe bapele ne bena dikenga.

⁵⁰ Bavua ne kapeja, benza malu mabi andi tshiyi mua kuitaba. Nanku meme kubabutula pa buloba, bu muudi mumanye amu.

⁵¹ Kadi bubi buvua Samariya muenze mbukese. Kabuena nansha tshia bibidi tshia buuvua wewe muenze. Malu mabi auvua muenze mmapite abu bobu. Padibu babafuanyikija nebe, bobu bana benu bena Samariya ne Sodome, mbamueneke bu badi kabayi ne bualu.

⁵² Nebakutuishe wewe bundu! Wewe udi mubingishe bana benu ba bakaji! Bualu uvua muenze bubi mubapite bobu. Nanku, bobu mbamueneke bu bakane, patudi tubafuanyikija nebe. Wewe neufue bundu. Nebakupuekeshe, bualu bubi buebe mbupite. Ke muudi mubingishe bana benu ba bakaji!

⁵³ Nendongolole bimenga ebi. Nengakaje tshimenga tshia Sodome, ne misoku idi natshi mutumba. Nengakaje tshimenga tshia Samariya, ne misoku idi natshi mutumba. Nengakaje nansha malu ebe wewe udi musombe munkatshi muabu.

⁵⁴ Ndi ngenza nanku bua umone muuvua muenze bibi bipite, bua utue bundu bua paudi mupite bana benu ba bakaji ku bubi.

⁵⁵ Sodome, Samariya, ne misoku idi mutumba, nebapete lumu luabu lua kale. Kabidi wewe mene ne misoku iudi nayi mutumba nenulupete!

⁵⁶ Pautua uditambisha, uvua utela Sodome ne kapeja.

⁵⁷ Bubi buebe wewe kabuvua buanji kumueneka. Mpindiewu, nebakuseke kudi bimenga bia bena Edome, ne kudi bimenga bidibu nabi mutumba. Nebakupende ne kudi bimenga bia bena Peleshete, nebakupepeje nseke yonsu.

⁵⁸ Ke muudi ufuta tshibawu tshia malu ebe a bundu andi mbenga. Meme Maweja-Nangila Mvidi Mukulu, ndi njadika bualu ebu.

⁵⁹ “Teleja tshindi meme Maweja-Nangila Mvidi Mukulu ngamba ne: kuena munemeke malaya auvua mulaye. Kadi udi munyange ndondu wetu. Nanku nenkunyoke bilondeshile biuvua muenze.

⁶⁰ Kadi, meme nennemeke ndondu umvua mutue nebe ku buana buebe. Nengenze bua ndondu wetu nebe ashale kashidi.

⁶¹ Neuvuluke biuvua muenze. Bundu nebukukuate paudi upetangana ne bayayebe ne bakunyi bebe ba bakaji. Nenkupeshabu bua bakuitabe bu bana bebe ba bakaji, nansha biobi kabiyi bitangila malu amvua mukulaye.

⁶² Nentue tshiakabidi nebe ndondu. Neujadike ne: meme ndi Maweja-Nangila.

⁶³ Nanku, neuvuluke malu a kale. Bundu nebukukuate. Kuakuakula kabidi to. Kadi meme, nenkufuile luse ku bubi buonsu buuvua muenze. Meme Maweja-Nangila, ndi njadika bualu ebu.”