Yezekiyele 14 - MUKANDA WA MYIDI MUKULU

Bena Izrayele badi ne bua kubenga mvidie

¹ Dituku dikuabu, bakulu ba bena Izrayele kufika bua kungebeja malu.

² Nanku, Maweja-Nangila kungambila ne:

³ — Yezekiyele, muoyi wa bantu abu udi amu ku mvidie yabu mibi indi mbenga, idi ibafikisha ku bubi. Nanku, badi bela meji ne: ndi mua kuandamuna ku nkonku yabu anyi?

⁴ Ubambile bindi meme Maweja-Nangila Mvidi Mukulu mbamanyisha ne: “Padi muena Izrayele udi mutekemene amu kudi mvidie yende idi imufikisha ku bubi, ufika bua kumonangana ne muambi, kumukonka malu, meme Maweja-Nangila nemmuandamune, bilondeshile bungi bua mvidie idi muena Izrayele awu utendelela.

⁵ Diandamuna dianyi, nedinyingalaje bena Izrayele bavua bambenga, banange amu mvidie yabu ya bukoya.”

⁶ Ke paudi ne bua kumanyisha bena Izrayele ne: “Maweja-Nangila Mvidi Mukulu, udi unulomba ne: nudilengeje, nubenge mvidie yenu, nulekele malu enu onsu mabi.”

⁷ “Padi muena Izrayele nansha muenyi udi usomba mu bena Izrayele, umbenga, witaba mvidie udi umufikisha ku bubi, kadi pashishe udi uvua kukonka malu kudi muambi, bua kumanya mudi dijinga dianyi, meme Maweja-Nangila, meme nkayanyi nemmuandamune.

⁸ Nennyoke muntu awu, mmuteke tshilejilu, bua bantu bikale belelepu kasumuinu bualu buende. Nemmumushe munkatshi mua bantu banyi. Nanku nenujadike ne: meme ndi Maweja-Nangila.

⁹ “Padi muambi utupakana, wandamuna nkayende, ke meme Maweja-Nangila udi muanyishe bua kuakulaye nanku. Kadi nemmuleje bukole buanyi, nemmumushe munkatshi mua bantu banyi bena Izrayele.

¹⁰ Muambi wa nanku, ne muntu udi uya kumukonka malu, bonsu babidi mbena tshibawu tshia momumue. Nembanyoke.

¹¹ Nanku bena Izrayele kabakumuka kabidi kundi muaba mule bua kuya kujimina. Kabakupeta kabidi mikiya bua buenzavi buabu bupite bunene. Kadi nebikale bantu banyi, meme nengikale Mvidi Mukulu wabu. Meme Maweja-Nangila Mvidi Mukulu, ndi ngamba malu onsu aa.”

Maweja-Nangila nealumbuluishe bantu

¹² Maweja-Nangila kungambila ne:

¹³ — Yezekiyele, padi bena ditunga kampanda bapia tshibawu, bantombokele, nembaleje bukole buanyi. Nennyange biakudia bidibu balame mu mayeba, nembatumine tshiyole tshia nzala. Nembutule nanku bantu ne nyama bia mu ditunga.

¹⁴ Nansha bantu basatu aba, Nowa, Danele ne Yobe bikale munkatshi mua bantomboji aba, kadi amu basatu abu nkayabu nebasungidile mioyi yabu, bualu badi bangitaba. Meme Maweja-Nangila ndi ngamba nanku.

¹⁵ Misangu mikuabu, ndi mua kutumina bantomboji abu nyama ya lonji. Nanku ditunga diabu nedishale tshipela, bualu nyama ayi neyishipe bena ditunga bonsu. Bantu bakuabu kabakuendamu to, bualu nebatshine nyama.

¹⁶ Bantu basatu, batuvua bateela abu, bikale muaba awu, anu bobu nkayabu nebashale ne muoyi. Meme Maweja-Nangila Mvidi Mukulu wa muoyi, ndi njadika ne: kabena mua kusungidila nansha bana babu ba munda. Nanku ditunga nedishale tshipela.

¹⁷ Misangu mikuabu, ndi mua kutumina bantu aba mvita. Ndi mua kutuma bena mvita bua kunyanga ditunga, kushipa bantu ne nyama.

¹⁸ Nansha bantu basatu, batuvua bateela aba, basombamu, anu bobu nkayabu nebashale ne muoyi. Meme Maweja-Nangila Mvidi Mukulu, udi ne muoyi, ndi njadika ne: kabena mua kusungidila nansha bana babu ba munda.

¹⁹ Misangu mikuabu, ndi mua kutumina bantu aba disama dia tshiambu tshikole. Ndi mua kubaleja tshiji tshianyi, kubatumina tshipupu etshi tshia disama dia tshiambu, tshidi mua kushipa bantu ne nyama mu ditunga.

²⁰ Nansha Nowa, Danele ne Yobe basombe munkatshi mua bena ditunga, anu bobu nkayabu nebashale ne muoyi, bualu badi bangitaba. Meme Maweja-Nangila Mvidi Mukulu wa muoyi, ndi njadika ne: kabena mua kusungidila nansha bana babu ba munda to.

²¹ Pashishe, Maweja-Nangila kungambila ne: — Ndi mutumine Yerushalayime bipupu binene binayi! Ke mvita, tshiyole tshia nzala, nyama ya lonji, ne disama dia tshiambu tshikole, bua kubutula bantu ne nyama.

²² Bushuwa, bamue bantu balume ne bakaji, mbashale ne muoyi. Kadi mbamane kubapatula mu tshimenga. Nebafike nabu kunudi mu bupika. Nuenu bamone malu mabi adibu benza, nenumvue bimpe mundi mukengeshe Yerushalayime anu pa bualu.

²³ Kanuakubungama kabidi bikole to. Bualu nuenu bamane kubamona, nenumvue mundi munyoke bena tshimenga etshi anu pa bualu. Meme Maweja-Nangila ndi njadika bualu ebu.