Yezekiyele 1 - MUKANDA WA MYIDI MUKULU

Maweja-Nangila udi udimanyisha kudi Yezekiyele

¹ Mu matuku atanu a ngondu muinayi wa tshidimu tshianyi tshia makumi asatu, meme Yezekiyele, muana wa mutuangaji Buzi, mvua musombe munkatshi mua bena tshimuangi ba bena Yuda, batata ku muelelu wa musulu wa Kebare. Meme kumona diulu diunzuluka, Maweja-Nangila undeja malu.

² Tshidimu atshi, tshivua tshitanu katshia mukalenga Yowakine wabuela mu bupika.

³ Nanku matuku atanu a ngondu, kuine aku, mu ditunga dia Babilone, ku muelelu wa musulu wa Kebare, Maweja-Nangila kungambila malu. Meme kumtua bukole buende pambidi panyi.

⁴ Bimvua mumone mbiebi: lupepele lukole lua mvunde, luvua lufumina ku mutu wa ditunga, lusaka dituba dinene dinyungulukila kudi bukenke. Mu divuba amu mutua mupatuka miele ya mvula. Munkatshi mua divuba edi, muvua kapia katema bu tshiamu tshiengelela.

⁵ Munkatshi mua kapia aka, meme kumona bu nyama inayi, kadi mifuanangane ne bantu.

⁶ Nyama yonsu itua ne mpala inayi, kabidi ne mapuapua anayi.

⁷ Mikolu yayi itua milulame. Makasa ayi avua mafuanangane ne bikonu bia muana wa nyama wa ngombe, bikenke bu tshiamu tshikunze tshiengulula.

⁸ Muinshi mua mapuapua ayi, meme kumona bianza binayi bia bantu, muinshi mua dipuapua dionsu muikale tshianza. Bianza, mpala ne mapuapua bia nyama ayi bivua bitangila ku nseke inayi ya buloba.

⁹ Nsongu ya mapuapua itua milengangane. Nyama eyi ivua yenda kumpala yonsu pamue buludi, mubidi wayi kauyi ukudimuka.

¹⁰ Nyama yonsu ivua ne mpala ya mushindu ewu: mpala wa muntu, wa nyama wa ntambue ku dia balume, wa nyama wa ngombe ku dia bakaji, ne mpala wa nyunyi wa tshiminyi.

¹¹ Mapuapua ayi abidi avua muolole mulu matuangane, mapuapua makuabu abidi avua mabuikile mibidi yayi.

¹² Nyama yonsu uvua wenda kumpala amu buludi. Bu muvua mpala inayi itangila ku nseke inayi ya buloba, nyama ivua mua kuya kumpala kudiyi misue ku luseke luonsu, kayiyi ikudimuna mubidi.

¹³ Munkatshi mua nyama inayi, muvua mumueneka bu makala a kapia akenka, bu bimunyi. Kapia kavua kakole, kavua kapenya.

¹⁴ Nyama ayi ivua inyema lubilu lukole, itua ipingana ne lubilu bu lua kapia ka nkuba.

¹⁵ Pamvua nkenketa nyama ayi, meme kumona ku luseke lua yonsu, nkata wa ndundu mutue ne panshi.

¹⁶ Mubidi wa nkata uvua wengelela bu dibue dia mushinga mukole. Nkata yonsu ivua mushindu umue, imueneka bu mudi nkata mitshiamakane.

¹⁷ Nkata ivua mua kuya ku nseke yonsu inayi, kayiyi inyunguluka.

¹⁸ Butumbuke buayi buvua bukuatshisha bowa, mesu avua ku nseke yonsu ya nkata.

¹⁹ Pavua nyama isemena, nkata ivua yenda isemena ku luseke luayi. Pavuayi ibuka mulu, nkata ivua kabidi ibuka mulu.

²⁰ Nyama ivua iya muaba onsu mmayi misue; nkata ivua ilonda musangu umue, bualu nyama ivua iludika nkata ya ndundu.

²¹ Nanku, pavua nyama isemena kumpala, imana kaba kamue, nansha ibuka mulu, nkata ivua yenza nanku pamue, bualu nyama ivua iludika nkata.

²² Pa mitu ya nyama inayi ayi, pavua tshintu bu tshisasa tshia tshijengu, tshikenka bu mudi mabue a mushinga mukole.

²³ Muinshi mua tshisasa atshi, nyama yonsu uvua muolole mapuapua abidi matuangane ne a nyama mukuabu. Mapuapua makuabu abidi avua mabuikile mubidi.

²⁴ Pavua nyama yenda, meme kumvua mutoyi wa mapuapua anu bu mutoyi wa mayi manene akungula, nansha bu mudi dikubakuba dikole dia Mvidi Mukulu wa bukole buonsu, nansha bu mudi mutoyi wa bena mvita bapite bungi. Pavua nyama imana, ivua ipuekesha mapuapua ayi.

²⁵ Pa mutu pa tshisasa tshinene atshi tshivua tshibuikila mitu ya nyama ayi, pavua kabidi mutoyi.

²⁶ Pavua kabidi dibue dia mushinga mukole dia Safire, divuabu basonge bu nkuasa wa bukalenga. Pa mutu pa nkuasa wa bukalenga apu, pavua pamueneka bu muntu.

²⁷ Meme kumona mubidi wende ukenka bu tshiamu tshiengelela, munyungulula kudi kapia. Kulu ne kuinshi kua tshimonu tshiende, kuvua kapia kavua katema bikole.

²⁸ Bukenke buvua bunyungulule kapia buvua bu muanzankongolu udi ukenka dituku dia mvula. Ke muvua butumbi bua Maweja-Nangila bumueneke. Musangu umvua mubumone, meme kudiela mpala panshi. Pashishe meme kumvua diyi dingambila malu.