Yeshaya 66 - MUKANDA WA MYIDI MUKULU

Bantu badi balamata Mvidi Mukulu

¹ Maweja-Nangila udi wamba ne: “Diulu didi nkuasa wanyi wa bukalenga, buloba ntshitekelu tshia makasa anyi. Nzubu unudi mua kungashila meme, nnzubu kaayi? Muaba undi meme mua kusomba mmuaba kaayi?

² Tshionsu tshinudi numona, meme ke udi mutshienze ne bianza bianyi. Ndi nnuambila ne: bionsu ebi mbianyi. Kadi muntu undi ntangila ne disanka, ke muena muoyi wa bupuekele, udi unyingalala bua mibi yende, udi uteleja diyi dianyi ne luzakalu, ungitaba.

³ Bualu bantu aba bua kulambula milambu, badi bashipa ngombe. Kadi badi mua kushipa kabidi muntu mene. Badi bakosa mukoku muminu, kadi badi bashipa kabidi ne mbua mene. Badi balambula mulambu wa bia pa madimi. Kadi badi amu mua kulambula nansha mashi a ngulube. Badi bosha manananshi, kadi badi banemeka kabidi mvidie ya dishima. Bualu bantu aba mbadisunguile njila udibu basue kulonda. Bidi bibasankisha ke bindi mbenga meme.

⁴ Meme kabidi nensanke padibu bakenga. Nembatumine makenga onsu, adibu batshina. Bualu ndi muele lubila, kadi muntu nansha umue kena mungitabe. Meme kubambila malu, kadi kabavua bateleja. Bavua benza amu bindi mubenge. Bavua basungula amu bidi kabiyi binsankisha.”

Maweja-Nangila udi wambuluisha bena Izrayele

⁵ Nuenu badi bateleja diyi dia Maweja-Nangila ne luzakalu, bamuitaba, umvuayi tshidiye unuambila. Nudi ne bena kuenu, badi banudiwula, banuipata munkatshi muabu, bualu nudi balamate Mvidi Mukulu. Badi banuamba, baseka ne: “Maweja-Nangila aleje bukole buende tumone munudi basanka!” Kadi bobu nebafue bundu.

⁶ Telejayi amu mutoyi udi mu tshimenga, mutoyi udi mu nzubu wa Mvidi Mukulu. Ke Maweja-Nangila udi unyoka baluishi bende, bua malu abu mabi.

⁷ Tshimenga tshianyi tshidi bu mukaji udi ukeba kulela. Makenga a pa lulelu kaayi manji kumukuata, udi ulela muana wa balume, kayi muanji kubuela mu dikenga dia pa lulelu.

⁸ Katshia bantu ki mbumvue bualu bua nanku to! Kabena banji kumona mudi malu a nanku enzeka to! Ditunga didi mua kumueneka dituku dimue anyi? Badi mua kulela tshisamba diba dimue anyi? Kadi ke bidi bienzekela Siyone. Utshibuelelaku mu makenga a pa lulelu, ukadi ulela bana bende!

⁹ Maweja-Nangila udi unukonka ne: “Meme mumane kufikisha mukaji ku tshikondu tshidiye mua kulela, ndi mua kumukandika bua kaledi muana anyi? Meme mumane kulongolola diledibua dia tshisamba, tshiena mua kukandika bua bualu ebu kabuenzeki to!”

¹⁰ Nuenu badi bananga Yerushalayime, sankayi nende pamue, sangulukayi bualu buende. Nuenu bonsu bavua mu madilu, bua pavuaye mu dikenga, sankayi nende mpindiewu.

¹¹ Nenku nutshionkomoke! Nenudie nuukute, padi Yerushalayime unusamba, unudisha, mudi mukaji wamusha muana dibele, bua bana banue dibele ne disanka.

¹² Maweja-Nangila udi wamba ne: “Ndi ntuma musulu wa diakalenga ku Yerushalayime, ne biuma bia matunga makuabu bungi bu musulu udi mupasalale mu tshisuku. Nenkukube mudi mamu wamusha muanende, umutuala ku lubese, umukongololuela pa bibelu biende.

¹³ Eyowa, meme kabidi nenkusambe mudi mamu usamba muanende, — nenkusambe nansha mu Yerushalayime! —

¹⁴ Bushuwa, nenumone bionsu abi. Diba adi nenusanke. Bukole nebupingane mu mifuba yenu, mudi bisosa bipeta muoyi mu mvula mbedi.” Maweja-Nangila nealeje bantu bende mudiye ne bukole. Kadi nealeje baluishi bende tshiji tshidiye natshi.

¹⁵ Tangilayi Maweja-Nangila udi ufika mu kapia. Matempu ende a mvita adi afika bu mvula wa tshipupu. Maweja-Nangila mmuwule ne kanyinganyinga, udi ufika bua kujikija tshiji tshiende, kukumbaja mu ndimi ya kapia bivuaye muambile bantu ne mikanu.

¹⁶ Ku kapia ne ku muele wa mvita, ke kudi Maweja-Nangila ukosela nsambu mu bukua bantu. Bantu nebafue bapite bungi.

¹⁷ Ndi ngamba apa bua bantu badi bumusha mikiya, bua kubuelabu mu mpangu mikuabu bua kutendelela mvidie. Badi bimane panyima pa muntu udi munkatshi, badia munyinyi wa ngulube, nansha wa mpuku, nansha bintu bikuabu bidibu kabayi mua kudia. Bantu aba nebabutuke tshiapamue. Maweja-Nangila ke udi wakula awu.

¹⁸ Udi mumanye malu mabi adibu benza, ne meji adibu bela. Maweja-Nangila udi wamba ne: Ndi makasa mu njila. Nkadi pa kusangisha bantu ba mu bisamba bionsu, ba miakulu yonsu, bua bamone lumu lundi nalu.

Mvidi Mukulu neasangishe bantu bende bonsu

¹⁹ Nembaleje mundi ne bumfumu. Kadi bantu bakuabu bandi mumane kupandisha, nembatume mu bisamba bia bena Tarshishe, bena Pule, bena Lude, — ke bantu badi bamanye bikole mua kuela mikete, — bia bena Tubale ne bena Yavane, ne mu bidiila bidi kulekule. Miaba yonsu ayi bantu kabena banji kumvua butumbi buanyi. Kadi bantu bambatuma, nebamanyishe bena bisamba ebi butumbi buanyi.

²⁰ Nenku bisamba ebi nebipingaje kuabu bana benu bonsu bavua muabu. Nebabande pa tubalu, mu matempu a mvita, ne pa bipoyi. Nebende panyima pa mpunde ne pa tumelu. Nebafike ku mukuna wanyi wa tshijila mu Yerushalayime. Maweja-Nangila udi wamba ne: ke mulambu udibu bandambula. Nenguanyishe amu mundi nganyishe mulambu udi bena Izrayele bantuadila mu nzubu wanyi, mu ngesu milengeja.

²¹ Maweja-Nangila udi wamba ne: nensungule kabidi munkatshi mua matunga a bende aa, batuangaji banyi ne bena Levi babambuluishi.

²² Maweja-Nangila udi wamba ne: ndelanganyi yebe ne dina diebe nebishale kashidi kumpala kuanyi, amu mudi diulu dipiadipia ne buloba bupiabupia bindi mfuka bua kashidi.

²³ Maweja-Nangila udi wamba ne: Nenku ku ngondu ku ngondu, dituku dia Dikisha dionsu, bantu ba pa buloba bujima nebafike bua kuntendelela.

²⁴ Nenku nebafike bua kumona bitalu bia bantu bavua bantombokele. Tshikusu tshidi tshibikunya katshiena mua kufua to. Kapia kadi kabiosha, kakena kajima lukasa to. Bidibu bamone nebikuatshishe bantu bonsu buowa.