Yeshaya 64 - MUKANDA WA MYIDI MUKULU

¹ Pueka ne bukole bu kapia kadi kuosha nkunyi, kasabisha mayi. Nanku neuleje baluishi bebe bonsu, muudi Mvidi Mukulu bulelela! Bukua matunga nebuzakale kumpala kuebe,

² pawenza malu adi atukuatshisha bowa, atuvua katuyi batekemene. Eyowa, pawapueka, mikuna neizakale kumpala kuebe.

³ Katshia kabena banji kumvua bamba, ki mbanji kumanya, mesu katshia ki mmamone mvidie mukuabu udi wambuluisha, bantu badi batekemena kudiye, muudi wewe ubambuluisha.

⁴ Wewe udi wakidila bantu badi benza muudi wewe musue, badi bitaba ku diyi diebe ne disanka, badi bakeba kulonda njila iudi mubaleje. Uvua mufika munda, bualu tuvua bakutombokele. Kadi netupande, patuikala tulonda njila webe utuvua balonde kale.

⁵ Tudi bonsu bantu babi, katuena bakanyine kukukuatshila mudimu. Tudi bu tshintu tshipia mikiya. Nansha mianda mimpe ituvua tuenza, idi kabidi mikuatshike muendi bu tshilamba tshidi ne makeji a mashi. Bualu bua bilema bietu, tudi bu mabeji mume a mutshi, adi lupepele luambula luya nawu.

⁶ Kakuena muntu nansha umue udi ukeba kukulomba diambuluisha, ujinga kudilengeja, ukuitaba. Bualu wewe mene kuena musue kutumona kabidi. Ukadi mumane kutubenga bua bilema bietu.

⁷ Kadi wewe, Maweja-Nangila, udi amu tatu wetu. Tuetu tudi diima. Wewe ke udi mutufumbe, tudi bonsu bintu biuvua muenze ku bianza biebe.

⁸ Maweja-Nangila, kutuleji tshiji tshipite bukole. Kuvuluki kashidi ntupakanyi itudi nayi. Tudi tukusengelela ne: vuluka mutudi bonsu bantu bebe.

⁹ Bimenga biebe bia tshijila mbishale dikolu. Yerushalayime mmushale tshipela, ne Siyone mmubutuke.

¹⁰ Nzubu webe wa Tshijila, muvua batatuetu bakutumbishila, nzubu wetu mulengele wa kutendelela, mbamoshe mujima kudi kapia. Muaba ewu utuvua banange bikole, ukadi mpindiewu dikolu.

¹¹ Maweja-Nangila udi mua kushala upuwa amu nanku, paudi umona dikolu edi, anyi? Udi mua kushala mupuwilamu, utushiya mu dikenga didi ditupita anyi?