Yeshaya 63 - MUKANDA WA MYIDI MUKULU

Mvidi Mukulu udi utshimuna baluishi bende

¹ Nganyi ewu udi ufuma ku Edome, mu tshimenga tshikulu tshia Bosra, ne bilamba bikunze kunzuu? Udi muvuale tshinkutu tshiende. Udi wenda mpala muele mulu, mudiumvue mudiye ne makanda! Maweja-Nangila udi wandamuna ne: — Ke meme! Ndi mufike bua kukosa nsambu, ndi mufike bua kunyoka bukua matunga, bua nsungidile bantu banyi.

² — Kadi mudi bilamba biebe bikunze kunzuu mbishi? Makeji makunze awu mmafume penyi? Bidi bifuanangane ne bilamba bia muntu uvua ukama tumuma tua mvinyo mu tshiamu.

³ — Eyowa, ndi mukame tumuma mu tshiamu nkayanyi. Tshivua ne muena kuetu nansha umue uvua ungambuluisha. Mvua ne tshiji ne lonji. Meme kudiata bantu, kubatua miseba. Mashi abu avua mansampukile ku bilamba, ke mudi bilamba bianyi ne makeji makunze nanku.

⁴ Mvua ne dijinga munda muanyi dia kusombuela bantu banyi lelu. Bualu tshikondu tshia kupikula bantu banyi tshiakumbanyi.

⁵ Meme kukenzakana, kukeba muntu wa kungambuluisha! Kupanga! Meme kukema, kupanga muntu uvua mua kunkolesha ku muoyi. Kadi meme kushindika bua kukuata mudimu nkayanyi. Tshiji tshianyi tshivua tshimpesha dikanda.

⁶ Meme kuzaaza bantu, bualu mvua ne tshiji. Meme kubalembakaja ne tshiji tshianyi, kutangalaja mashi abu panshi.

Maweja-Nangila udi unanga Izrayele

⁷ Ndi musue kuvuluija bantu muoyi mulenga udi Maweja-Nangila nawu. Ndi musue kumutumbisha, bua bionsu bidiye mutuenzele. Uvua muenzele tshisamba tshia Izrayele bimpe bitambe, bualu udi utshinanga kashidi, utshifuila luse misangu yonsu.

⁸ Maweja-Nangila uvua muambe ne: “Bena Izrayele mbantu banyi, mbana banyi, badi kabayi mua kundinga to.” Nanku Mvidi Mukulu kubasungidila.

⁹ Mu makenga abu onsu, kena mutume muntu mukuabu bua kubambuluisha. Kadi uvua mubasungidile amu yeye mene. Yeye uvua muangate bualu buabu ne manza abidi, bualu uvua mubanange, ubumvuila luse. Yeye ke uvua mudiangatshile malu abu, mubambule mu maboku ende, ku tshikondu ne ku tshikondu.

¹⁰ Kadi bavua bamutombokela, bavua banyingalaja Mueyelu wende wa Tshijila. Nanku Maweja-Nangila kudienza muluishi wabu, kubanga kuluangana nabu mvita.

¹¹ Amu diba adi, bantu bende kuvuluka Moshe, ne malu avua menzeke kale. “Mvidi Mukulu uvua musambuishe kale bantu bende ne balombodi babu mu mayi manene, mpindiewu udi penyi? Mvidi Mukulu uvua mutume Mueyelu wende munkatshi muabu, udi muaba kaayi?

¹² Ke yeye uvua wenda ku dia balume dia Moshe, umuambuluisha ne diboku diende dikole. Uvua mupandulule mayi, bena luendu batangile. Ke muvuaye mupete lumu kashidi.

¹³ Yeye ke uvua mubafile, munkatshi mua mayi manene. Batata benda amu bimpe, kabayi nansha batetuka, amu bu mudi nyama ya tubalu yenda mu mpata.

¹⁴ Bavua amu bu mudi ngombe ipueka mu tshibandabanda. Mueyelu wa Maweja-Nangila uvua ubafikisha ku muaba uvuabu mua kuikishila.” Nenku, Maweja-Nangila, ke muuvua muludike bantu bebe nanku. Pa bualu ebu bantu nebakutumbishe kashidi.

Ditendelela

¹⁵ Maweja-Nangila nansha wewe musombe mu diulu, mu muaba webe muimpe wa tshijila, tangila bidi bituenzekela panu panshi. Dinanga diebe dikole, diuvua mutunange nadi didi penyi? Bukole buebe buuvua nabu mu mvita butshidiku anyi? Kuena kabidi musue kutufuila luse anyi? Maweja-Nangila kubengi kutuleja muudi utunanga.

¹⁶ Bualu amu wewe ke udi Tatu wetu. Abrahame nkambua wetu, kena mubimanye. Yakobe kena mutuvuluke. Kadi wewe, Maweja-Nangila, udi Tatu wetu, wewe ke udibu binyika ku kale kuonsu aku ne: “Mutusungidi wetu.”

¹⁷ Maweja-Nangila, uvua muanyishe bua tupambuke, tulekele njila webe, tuikale ne tshitunu, tubenge bumfumu buebe bua tshinyi? Pingana kutudi, bualu tudi bena mudimu bebe, bantu baudi mudisunguile.

¹⁸ Tuetu bantu bebe ba tshijila, tuvua ne bumfumu mu dietu ditunga amu bidimu bikese. Baluishi betu kufika, kunyanga nzubu webe wa tshijila.

¹⁹ Kukadi bidimu bivule, tudi amu bamueneke bu bantu baudi kuyi uludika, baudi kuyi muinyike dina diebe. Eyi! Bu wewe mua kupanda diulu, bu wewe mua kupueka panuapa! Mikuna ivua mua kuzakala kumpala kuebe.