Yeshaya 60 - MUKANDA WA MYIDI MUKULU

Lumu lupialupia lua Yerushalayime

¹ Yerushalayime, juka, ukenke bu diba! Bualu meme ndi mfika, meme butoke buebe. Lumu lua Maweja-Nangila nelukutokeshe, bu diba ditshidi dipatukilaku.

² Midima idi imbuikile buloba. Bantu badi benda mu miidima ya bufuku. Kadi wewe, Maweja-Nangila udi ukukenkesha, bu diba ditshidi dipatukilaku. Butumbi buende nebumuenekele pa mutu pebe.

³ Nenku bukua matunga nebuende butangila ku butoke buwakenkesha. Dinkenke dia butoke buebe nedikoke bakalenga kuudi.

⁴ Kenzakana ku nseke yebe yonsu, umone mudi bana bebe bonsu bafika. Badi badisangisha pabuipi nebe. Bana bebe ba balume badi bafume kule. Bantu badi bakupingajila bana bebe ba bakaji, babambula mu maboku.

⁵ Paudi ubamona, neukenke ne diakalenga. Neusanke, usangale. Mutshima webe neuwule ne disanka. Bualu biuma bidi bipitshila pa mayi manene, nebifike kuebe. Lupetu lua matunga a bantu neluvulangane kuebe.

⁶ Ditunga diebe nediuwule ne nyama ya tumelu tente. Bangenda mushinga ba mu Madiyane ne ba mu Efa nebafume ku Saba, bisumbu ne bisumbu, ne tumelu tuabu. Nebakutuadile tshiamu tshia mpawungi ne musenga wa kamonya. Nebende batumbisha Maweja-Nangila.

⁷ Nyama ya bena Kedare, neisangile kumpala kuebe. Mikoku ya bimpanga ya bena Nebayote neikale yebe. Nebaye nayi pa tshilambuilu tshia Maweja-Nangila. Neikale milambu idi ilengelela Maweja-Nangila. Mvidi Mukulu neavudije lumu lua nzubu wende bikole.

⁸ Aba bonsu mbanganyi? Badi baya lukasa bu mavuba, bu tshisumbu tshia nkudimba idi ipingana mu tshilamba tshiayi.

⁹ Ke matu adi afuma ku mielelu ya mayi a ku matunga a kule. Matu manene adi enda kumpala. Bana bebe badi pa matu aa, bafumine ku matunga a kule, bambule mpawungi yabu ne biamu bitoke bia mushinga mukole. Badi balua bua kutumbisha Maweja-Nangila, Mvidi Mukulu webe, wa tshijila wa bena Izrayele. Bualu Yeye ke udi ukusankisha nenku.

¹⁰ Maweja-Nangila udi wambila Yerushalayime ne: Benyi nebibakulule bimana biebe. Bakalenga babu nebikale bena mudimu bebe. Bualu mvua mukunyoke bushiwa, pamvua ne tshiji. Kadi ndi ne disanka mpindiewu, dia kukuleja mundi mukunange.

¹¹ Nebunzulule biibi biebe, kabayi babinjila nansha bufuku nansha munya. Nanku bantu nebamone mua kukutuadila biuma bia mu bukua matunga. Bakalenga babu nebalondangane, ewu ubuela, mukuabu ubuela.

¹² Kadi tshisamba tshionsu, nansha bukalenga buonsu, bidi bibenga kukuenzela mudimu, nebijimine. Bisamba abi nebibutuke.

¹³ Mitshi mimpe yonsu ya mu metu a Lebanone, mitshi ya siprese, ya pine, ne mikuabu, nebafike nayi muebe. Nebalengeje nayi nzubu wanyi wa tshijila, muaba undi nsomba, undi ndeja lumu luanyi.

¹⁴ Bantu bavua bakukengesha, nebasemene kuudi, nebiname panshi. Bantu bonsu bavua bakulembakaje, nebadiele ku makasa ebe. Nebakuinyike ne: “Ke tshimenga tshia Maweja-Nangila”, “Ke Siyone musoku wa wa tshijila wa bena Izrayele.”

¹⁵ Wewe uvua musoku uvua bantu kabayi banange, muntu nansha umue kavua mupitshile muebe. Kadi nenkuenze kabidi tshimenga tshidi tshisankisha bantu tshiendelele, tshidibu mua kuditemba natshi kashidi.

¹⁶ Bena matunga ne bakalenga babu, nebakukuatshile mudimu, mudi mamu wamusha muanende. Nenku neumanye ne: meme Maweja-Nangila ndi mukupandishi webe. Meme Mvidi Mukulu wa Yakobe, ndi mudiangatshile bualu buebe ne manza abidi.

¹⁷ Nenkutuadile kuebe tshiamu tshia mpawungi pa mutu pa tshiamu tshikunze, tshiamu tshitoke tshia mushinga mukole pa mutu pa tshia kabanda, tshiamu tshikunze pa mutu pa mabaya, tshiamu tshia kabanda pa mutu pa mabue. Bupole ne buakane ke bamfumu ne bakalenga, bambateka mu ditunga diebe.

¹⁸ Mu ditunga diebe, kabakumvua kabidi mutoyi wa mvita to. Munda mua ditunga diebe kamuena kabidi kabutu nansha tshinyangu. Kadi newinyike bimana biebe dina ne: “Lupandu”, ne biibi biebe ne: “Lumu lua Mvidi Mukulu”.

¹⁹ Bua wewe kuikala ne butoke, kuakukengela kabidi diba mu munya, nansha ngondu butuku. Bualu meme Maweja-Nangila Mvidi Mukulu webe, nentekeshe muebe matuku onsu, nenkukenkeshe ne butoke buanyi buonsu.

²⁰ Kanuakukengela kabidi diba, bua kuenda mu butoke munda munya. Kanuakukengela kabidi ngondu, bua kuenda mu butoke butuku to. Bualu meme Maweja-Nangila nenkutekeshe butuku ne munya. Dikenga diebe nedijike.

²¹ Bantu bebe bonsu nebalame meyi anyi. Kabakubipata kabidi mu ditunga diebe. Ke bantu bamvua mufuke ne bianza bianyi, bua baleje bantu bakuabu butumbi buanyi. Badi bu mitshi indi mukune mu lupangu luanyi.

²² Mu tshiota tshikese, nemuikale bantu tshinunu. Tshiota tshishadile ku bionsu, netshidiunde, tshienze tshisamba tshinene. Ke tshindi ngenza lukasa meme Maweja-Nangila, pakumbana tshikondu.