Yeshaya 59 - MUKANDA WA MYIDI MUKULU

Mikalu idi pankatshi penu ne Mvidi Mukulu

¹ Nudi nuela meji ne: maboku a Mvidi Mukulu kaena male makumbane bua kunusungidila anyi? Nudi nuela meji ne: matshi a Maweja-Nangila adi mapate, kaayi mua kunuteleja anyi?

² Nansha kakese! Kadi bubi buenu ke budi buasa tshimana pankatshi penu ne Mvidi Mukulu wenu. Bualu bua bilema bienu, Maweja-Nangila ukadi utangila kua tshianana, kayi musue kunuteleja.

³ Bualu bianza bienu bidi ne mashi. Minu yenu idi minyanguke ne malu mabi. Nudi nuakula amu bua kujana bantu, bua kushiminyinangana malu.

⁴ Nudi nufundangana ku tubadi amu ne muoyi mubi. Nudi nulumbululaku, kanuyi nukeba bulelela. Malu anudi nujadika adi amu a dishima. Bionsu binudi nuamba bidi amu bia patupu. Nudi amu nukeba kukengeshangana, nupatula munda muenu amu malu mabi.

⁵ Malu anudi bela meji bua kuenza, adi amu mabi bu makela a nyoka. Muntu udi walenga, udi ufuilaku diakamue. Dikela diodi ditayike, didi dipatula nyoka wa ntoka. Malu anudi nuenza adi amu bu buntande:

⁶ muntu kena mua kubuvuala, muntu kena mua kudibuikilabu. Buntande budi amu bupetesha bantu dikenga. Ke mudi bianza bienu bienza mudimu, amu bua kukengesha bantu.

⁷ Nudi nunyema lubilu, bua kuya kuenza malu mabi. Nudi nuambuluja makasa, bua kushipa badi kabayi ne bualu. Meji anudi nuela adi amu a kuenzela bakuabu bibi. Mu njila yenu nudi numiamina tshimvundu ne kabutu.

⁸ Kanuena bamanye njila wa bupole. Kuonsu kunudi nupitshila, nudi nudiatakaja buakane mu makasa. Nudi nulonda amu njila mikonyangale. Kadi muntu udi unulonda mu njila yenu ayi, kakupeta bupole to.

Bantu ba Mvidi Mukulu badi batonda mibi yabu

⁹ Ke mudi Mvidi Mukulu kayi utuambuluisha lukasa, kayi ukumbaja bivuaye mutulaye. Tuvua batekemene kumona butoke, kadi miidima idi miaba yonsu. Tuvua bindile bua diba dipatuke, kadi tudi tuenda amu mu miidima yabufuku.

¹⁰ Tudi tuenda tutetuka, bu mpofu udi wenda ulonda tshimana. Tudi tububuta bu muntu, udi kayi umona kudiye uya. Munda munya tudi tutetuka, bu badi benda mu njila munda nkulu. Tudi ne bukole bua mubidi, kadi tukadi bu bantu bafue.

¹¹ Tudi tupuma bonsu bu nyama wa lonji, tudila muadi bu kamandankutshi. Tuvua batekemene kudi Mvidi Mukulu, bua atuambuluishe, kadi kena muenze kalu to. Tuvua bindile lupandu, kadi ludi netu kule.

¹² Maweja-Nangila, misangu mivule, tuvua bakutombokele. Bilema bietu bidi bibipisha. Buntomboji buetu mbutulamate. Tudi bamanye bimpe ntupakanyi yetu.

¹³ Tuvua bakutombokele. Tuvua bakutonuene mesu. Tuvua babenge kukulonda, wewe Mvidi Mukulu wetu. Tuvua bakule amu bua kukengeshangana, ne bua kutomboka. Tshitudi tuelangana meji munda, tshitudi natshi mu lungenyi, tshidi amu dishima.

¹⁴ Nenku bantu kabena benza bimpe to. Kabena bakumbaja bidi Mvidi Mukulu musue. Mu bisalu kamuena kabidi muntu wa muoyi muimpe, kamuena udi wamba malu patoke.

¹⁵ Eyowa, bulelela kabuena bumueneka kabidi to. Muntu udi musue kushala wa muoyi mulenga, badi bamuiba bionsu bidiye nabi. Maweja-Nangila mmumone bionsu bidi bienzeka. Kena wanyisha bua bantu badiatakaje buakane.

Maweja-Nangila neenze bualu

¹⁶ Maweja-Nangila uvua mumone muvua muntu nansha umue kayi wambuluisha bavuabu bakengesha. Uvua ukema, bua pavua bantu kabayi bambuluishangana. Ke mudiye musue kukuata mudimu yeye mene. Bu mudiye unanga bantu, udi ukeba kubasungidila.

¹⁷ Maweja-Nangila udi uvuala buakane, mudibu bavuala kazaku ka tshiamu ka mvita. Udi wasa lupandu, mudibu basa tshifulu ku mutu. Uvua uvuala dijinga dia kulongolola malu mimpe, amu mudibu bavuala bilamba. Tshinkutu tshidiye mudibuikile, ke disuminyina didiye nadi dia kuluangana mvita.

¹⁸ Neafute bantu bilondeshile malu avuabu benze. Neatekele bena lukuna bende bonsu tshiji tshikole. Neabanyoke nansha bobu base kule.

¹⁹ Nenku bantu nebatshine Maweja-Nangila. Nebanemeke butumbi buende, bituadije luseke ludi diba dipatukila, too ne luseke ludidi dibuelela. Neafike lubilu, bu musulu wa muenji mukole, udibu basakila kudi tshipepela.

²⁰ Maweja-Nangila nealue bua kupikula Yerushalayime, ne bena Izrayele bonsu badi bakudimuna nsombelu yabu. Ke yeye mene udi ujadika bualu ebu.

²¹ Maweja-Nangila kuamba kabidi ne: “Monayi ndondu undi ntua nenu: Mueyelu wanyi neunutulukile. Ndi nnulongesha malu anyi bituadije ku mpindiewu ne kashidi. Tshiena ngumusha dilongesha edi kunudi, nansha kudi bana benu, nansha kudi biikulu benu. Meme Maweja-Nangila ndi njadika nanku awu.”