Yeshaya 55 - MUKANDA WA MYIDI MUKULU

Luayi, nansha kanuyi ne makuta

¹ Luayi, nuenu bonsu badi ne nyota. Ndi nnupa mayi a kunua. Nansha nuenu kanuyi ne makuta. Luayi, nuangate biakudia. Kanuena ne bua kubisumba to! Angatayi mvinyo nansha mabele anu tshianana, kanuyi nufuta!

² Tshinudi nutudila makuta bua diampa didi kadiyi didisha mubidi ntshinyi? Tshinudi nuditatshishila kanuyi mua kuukuta ntshinyi? Panuikala banteleje, nenupete tshiakudia, tshidi tshilengelela mubidi. Nenudie biakudia bidi bimpe bitambe, nuukuta.

³ Ntelejayi meme. Luayi kundi. Umvuayi diyi dianyi, nenuikale ne muoyi. Maweja-Nangila udi wamba ne: “Ndi ntua nenu ndondu wa kashidi. Ndi musue kunuenzela bilenga bimvua mulaye Davide.

⁴ Meme kumuteka, bua ikale mukalenga wa bukua matunga. Ke nuwuaye ne bua kushindika bumfumu buanyi munkatshi mua bisamba.

⁵ Ne wewe kabidi Izrayele, neubikile bantu benyi, baudi kuyi muanji kumanya. Bantu aba, badi kabayi banji kukumanya, nebafike kuudi. Nebafike kuudi amu bualu buanyi meme, Maweja-Nangila Mvidi Mukulu webe, wa tshijila wa Izrayele. Bualu meme ndi nkupesha lumu elu.”

Dilaya didibu bakumbaja

⁶ Nuye bonsu kudi Maweja-Nangila, bualu mpindiewu udi munuindile! Numuele lubila, bualu udi pabuipi nenu.

⁷ Muntu mubi alekele njila yende mibi. Udi kayi ne meji makane, alekele meji ende mabi! Bantu bapingane bonsu kudi Maweja-Nangila, bualu neabafuile luse! Bapingane kudi Mvidi Mukulu wetu, bualu neabalekele mibi yabu!

⁸ Maweja-Nangila udi wamba ne: “Bushuwa, meji anyi kaena bu enu to. Njila yanyi mmishilangane ne yenu.

⁹ Mudi mutantshi munene munkatshi mua njila yanyi ne yenu, munkatshi mua meji anyi ne enu, amu mudi mutantshi munene munkatshi mua diulu ne buloba.

¹⁰ Mvula ne mabungi bidi biloka. Kadi kabiena bipingana mulu, amu bianji kubolesha buloba, kubufukisha, amu bianji kumeneshamu ntete. Ntete eyi idi ipetesha mikuabu idibu mua kumiamina, ne mikuabu idibu mua kudia.

¹¹ Ke mudi kabidi muaku wanyi. Kawena upingana kundi patupu, kauyi upatula bipeta, kauyi ukumbaja bimvua muelele meji. Meme kutuma muaku wanyi, wowu kupeta amu tshimvua muipatshile.”

¹² Nenupatuke mu Babilone, nusanke. Nebanupingaje kuenu mu bupole. Diba adi mikuna minene ne mikese, neyele mbila ya disanka. Mitshi yonsu ya mu mpata neituute bikashi kumpa la kuenu.

¹³ Mitshi ya siprese neitoloke miaba ivua mitshi ya meba. Mutshi wa mirte neutoloke pavua mingonga. Bantu nebatumbishe Maweja-Nangila. Ke mudibu mua kuvuluka kashidi, bivua Maweja-Nangila munuenzele.