Yeshaya 54 - MUKANDA WA MYIDI MUKULU

Mu Yerushalayime mudi bantu tshiakabidi

¹ Wewe Yerushalayime, ukavua bu mukaji uvua kayi ne bana. Ela mbila mikole ya disanka. Wewe uvua kuyi ulela kabidi bana ba balume, Sankaku amu kusanka. Bualu Maweja-Nangila udi wamba ne: “Wewe mukaji mudiombola, udi ne bana ba bungi mpindiewu, bapite ba mukaji udibu banange kudi bayende.”

² Diundisha munda mua ntenta webe, sakidila bilamba, ubivungulule. Kutangidi bungi bua biudi utula. Lepesha mionji ya kusuika nayi ntenta. Popela milonda bikole mu buloba.

³ Bualu neuvulangane ku nseke yonsu. Bana bebe ba balume nebangatulule maloba adi mu bianza bia bena mutumba. Nebasulule kabidi mu bimenga, muvua mushale dikolu.

⁴ Kutshinyi to. Kuena ufua kabidi bundu to. Kabakukupetula kabidi to. Nebakunemeke. Neupue muoyi bundu buuvua nabu ku bunsongakaji buebe. Kuakuvuluka kabidi kapeja ka diba diutshivua mukamba.

⁵ Bualu uvua mukufuke, ke washala bu bayebe. Ke yeye udibu binyika ne: “Maweja-Nangila muena bukole buonsu.” Yeye ke wa tshijila wa Izrayele, udi ukupandisha. Yeye mene ke udibu binyika ne: “Mvidi Mukulu wa buloba bujima.”

⁶ Maweja-Nangila uvua ukufuanyikija ne mukaji uvuabu bashiye kudi bayende, mushale ne kanyinganyinga kavule. Kadi Mvidi Mukulu webe udi wamba ne: “Mukaji uvuabu basungule mu bunsonga, mudibu mua kumulekela mmunyi?

⁷ Mvua mukutokele bushuwa, kadi amu bua katupa kipi. Kadi bu mundi nkunanga bikole, ndi nkuangata tshiakabidi.

⁸ Tshivua musue kukumona kabidi to. Bualu mvua ne tshiji tshikole. Kadi bivua bua katupa kipi. Kadi mpindiewu nenkuleje kashidi, mundi nkunanga bikole. Meme Maweja-Nangila, ndi nkujadikila bualu ebu. Meme nenkusungidile.

⁹ Nengenze lelu, bimvua muenze mu matuku a Nowa. Mvua muditshipe ne: mayi a mvula kaena mua kubuikila kabidi buloba to. Ndi nditshipa kabidi nanku lelu ne: tshiena nkufikila munda, tshiena nkutandisha kabidi to.

¹⁰ Nansha bu mikuna minene mua kutentemuka miaba yayi, nansha bu mikuna mikese mua kunyungakana, kadi dinanga dindi nkunanga nadi, katshia kadiakuandamuka to. Dilaya dindi nkulaya dia kukuvudijila diakalenga nendikumbaje kashidi. Meme Maweja-Nangila, ndi nkuambila bualu ebu. Meme ndi nkunanga.”

Muikala Yerushalayime mu matuku adi kumpala

¹¹ Wewe Yerushalayime udi mukengi, udibu banyungisha kudi tshipepele tshikole, kakuyi muntu udi ukusamba. Kadi meme Maweja-Nangila ndi ngamba ne: “Nenkuasulule ne mabue malengeja bimpe. Nengenzulule bitaku biebe ne mabue mafikuluke.

¹² Mitu ya bimana biebe nenyibake ne mabue makunze, mishiku ya mbelu ne mabue adi akenka. Nenkoleshe bimana bionsu ne mabue a mushinga mukole!

¹³ Bana bebe bonsu nembalongeshe meyi anyi. Nebasombe mu bupole.

¹⁴ Kuakutenkakana kabidi to. Kuakutshina kabidi tshintu to. Kabakukukengesha kabidi. Kuakukuatshika bowa. Muntu kakukutshinyisha nansha.

¹⁵ Padi muntu musue kukuluisha, mu mvita yende ayi, meme tshiakumuambuluisha to. Kadi muntu yonsu udi ukuluisha, neumutshimune.

¹⁶ Vuluka ne: ndi mufuke nsenda wa biamu, utu usonsola kapia, wenza bia mvita mishindu mishilangane. Udi mufuke muntu udi ushipa nabi bantu, mmeme kabidi!

¹⁷ Tshia mvita tshionsu tshidibu bafula, bua kukuenzela natshi bibi, katshiakukuenzela bualu to. Padi muntu musue kukufunda kudi bandumbulula, wewe neumupishishe. Ke tshindi ngenzela bena mudimu banyi bonsu. Ndi mbalama, mbambuluisha bua batshimune baluishi babu. Meme Maweja-Nangila, ndi ngamba nanku.”