Yeshaya 46 - MUKANDA WA MYIDI MUKULU

Mvidie ya dishima ya bena Babilone mmishilangane ne Mvidi Mukulu

¹ Mvidie Bele kena kabidi ne bukole to. Mvidie Nebo udi mufuane kudishinda. Nanku mpingu yabu badi bayiteka panyima pa nyama idi yambula majitu. Badi bayambula bu mudibu bambula majitu. Idi ne bujitu bunene, panyima pa nyama eyi ikadi mipungile.

² Mvidie idi iteketa, mifuane kudishinda panshi. Kayena mua kusungidila mpingu yayi. Badi baya ne mvidie mene ayi mu bupika.

³ Nuenu bena Izrayele, ntelejayi, nuenu bena Yakobe badi bashala ne muoyi, nuenu bandi mulame katshia banulela, katshia nuamona diba.

⁴ Nengikale amu nnulama nenku too ne munuakulakaja. Nennulame bo bo bo, too ne munuatoka nsuki. Meme ke uvua munuambule kale, ntshidi amu nnuambula ne ku lelu. Eyowa, nuenu ke bandi mulame. Nennusungidile.

⁵ Nenumfuanyikije ne nganyi? Nenungidikije ne nganyi? Nenumfuanyikije ne nganyi, bua tuetu kufuanangana nende?

⁶ Bantu badi batula mpetu yabu yonsu. Badi bapima nkanu mitoke ya mushinga mukole, ne biamu bia mpawungi. Badi bangata nsenda wa mpawungi ku mudimu, bua abafudile mvidie, udibu batendelela, udibu bakukuila.

⁷ Pashishe badi bambula mvidie wabu pa makaya abu, baya kumuteka pa muaba wende. Mvidie udi ushalapu, kayi unyunga. Nansha bobu bamubikila, kakuandamuna to. Kena usungidila muntu udi mu dikenga. Lupandu kaluena kule to

⁸ Nuenu bantomboji, nuvuluke bimvua muenze kale. Nuelangane meji bimpe, nudilengeje.

⁹ Nuvuluke malu enu a kale. Meme ke Mvidi Mukulu, kakuena mukuabu. Kakuena Mvidi Mukulu mukuabu udi bu meme.

¹⁰ Ku tshibangidilu tshia bionsu, ndi mudianze kuamba tshindi ngipatshila. Ndi mudianze kuamba amu ku kale, bivua kabiyi bianji kuenzeka. Ndi ngamba ne: Tshindi ngela meji, ndi ntshikumbaja. Tshionsu tshindi musue, ndi ntshienza.

¹¹ Ndi mbikila nyunyi mudianganyi, ku luseke ludi diba dipatukila. Ke muntu wakumbaja bionsu bindi mujadike. Ndi mmubikila ku ditunga dia kule. Mundi ngamba amu, ke muenzekabi! Mumvua mujadike, ke muvuabi bikumbana.

¹² Nuenu bantu badi bateketa mu maboku, nuenu badi bela meji ne: malu andi mulaye atshidi kule, ntelejayi.

¹³ Malu aa kaena kabidi nenu kule to. Akadi pa kukumbana amu mpindiewu! Lupandu kaluena lunengakana. Meme mene ndi mfika nalu mu Siyone. Eyowa, ndi ntuadila bena Izrayele tshitupa tshia butumbi buanyi.