Yeshaya 45 - MUKANDA WA MYIDI MUKULU

Koreshe, muntu udi Mvidi Mukulu mujidile

¹ Maweja-Nangila udi wambila Koreshe, muntu udiye mujidile ne: “Ndi mutue ku tshiebe, bua utekeshe matunga onsu, unyenge bakalenga mamfumu abu, bakunzuluile biibi, ubuele mu bimenga bionsu.

² Meme ndi ngenda kumpala kuebe, bua kumusha bionsu bidi mua kukujingakaja, kutshibula biibi bia tshiamu tshikunze, kuzaza milonda ya kupayika nayi biibi.

³ Ndi nkupesha lupetu, ne biuma bivuabu basokoke. Nenku neumanye mundi Maweja-Nangila. Meme Mvidi Mukulu wa bena Izrayele, ndi nkuangata bu muena mudimu wanyi.

⁴ Bu mundi munange bantu banyi bena Izrayele, bena mudimu banyi bandi musungule, ndi nkuangata bu muena mudimu wanyi. Nenku meme ndi nkupesha lumu, nansha wewe kuyi mummanye.

⁵ Maweja-Nangila ke meme, kakuena mukuabu to. Kakuena Mvidi Mukulu mukuabu, amu meme. Kuena mummanye to. Kadi ndi nkuangata ku mudimu.

⁶ Bantu ba ku luseke ludi diba dipatukila, ne ba ku luseke ludidi dibuelela, nebamanye ne: Kakuena Mvidi Mukulu mukuabu, amu Meme Maweja-Nangila. Kakuena mukuabu to.

⁷ Ndi ngenza munya, mfuka miidima kabidi. Ndi mpetesha diakalenga, mfila ne dikenga. Eyowa, ke Meme Maweja-Nangila, udi wenza malu onsu aa.

⁸ Diulu, lokesha lumuma! Bu mudi mvula upueka mu mavuba, lupandu lufume mulu, lupueka pa buloba. Buloba bunzuluke, buleje lupandu, bupatule malu mimpe. Meme Maweja-Nangila, ndi mfuka bionsu abi.”

Diima ne mufumbi wa ngesu

⁹ Muntu udi ukimina kuelangana mpata ne udi mumufuke, mmuena diakabi. Udi amu luesu lua patupu, lufuanangane ne mikuabu yonsu. Diima didi mua kukonka, udi udifumba ne: “Tshiudi wenza ntshinyi?” Luesu ludi mua kuambila mufumbi ne: “Kuena mumanye mudimu webe, anyi?”

¹⁰ Muena diakabi mmuntu udi ukimina kuebeja tatuende ne: “Udi mumfikishe ku bantu nenku bua tshinyi?” Muena diakabi mmuntu udi ukonka mamuende ne: “Tshiudi mundelele ntshinyi?”

¹¹ Maweja-Nangila wa tshijila wa bena Izrayele, udi muenze muntu, udi unukonka mpindiewu ne: “Nuenu nudi mua kungela nkonku, pa malu adi atangila bana banyi anyi? Nuenu nudi mua kumfundila tshindi ne bua kuenza anyi?

¹² Meme ndi muenze buloba, mufuke ne bantu badi basombapu. Meme ndi mubalule diulu. Ndi ntumina mabulunge a kulu ne mitotu diyi.

¹³ Meme Maweja-Nangila muena bukole buonsu ndi ngamba ne: Meme kabidi ndi mutume Koreshe, muntu unudi bamanye, bua anusungidile. Nendandakaje njila yonsu kumpala kuende. Yeye ke wibakulula tshimenga tshianyi tshia Yerushalayime. Neanyishe bua bantu banyi bavuabu bakuate, bapingane kuabu! Kena ulomba nansha dikuta, nansha mabuejila!”

Izrayele, Mvidi Mukulu udi kuebe

¹⁴ Izrayele, Maweja-Nangila udi ukuambila ne: tshionsu tshidi bena Ejipitu bapeta ku mudimu wabu, makasa adi bena Kushe, nansha bantu bale ba kafiondu ba mu Seba bapeta, bionsu ebi nebipitshile muebe, nebikale bintu biebe. Bantu aba nebakulonde, bamane kubasuika ne nkanu. Nebadiele panshi kumpala kuebe, bakutondela ne: “Mvidi Mukulu udi amu kuebe. Kena munga muaba to.”

¹⁵ Mvidi Mukulu wa bena Izrayele, udi upandisha bantu, wewe udi Mvidi Mukulu udi udisokoka bulelela!

¹⁶ Kadi mona benji ba mpingu: nebafue bundu, nebende bonsu biname mpala panshi, bu bantu bavuabu badinga.

¹⁷ Kadi bena Izrayele mbapete lupandu lua kashidi kudi Maweja-Nangila. Kabena bafue kabidi bundu. Kabena mua kubapepeja kudi muntu nansha umue.

Badi bamanyisha lupandu patoke

¹⁸ Maweja-Nangila uvua mufuke diulu, ke Mvidi Mukulu uvua muenze buloba, mubusonge, mubushindike. Kadi kena mubutuke munda mutupu, mmubuenze bua bantu basepu. Mpindiewu udi wamba ne: “Maweja-Nangila ke Meme! Kakuena mvidie mukuabu.

¹⁹ Meme tshiena muakule mu musokoku. Muaku wanyi kawena ufuma mu miidima. Tshiena mutumine ndelanganyi ya Yakobe diyi, bua inkebele muaba udi mutupu. Meme Maweja-Nangila ndi ngamba malu amu patoke. Malu onsu andi mmanyisha mmalelela. Ndi ngakumbaja.”

Bena matunga makuabu badi bakudimuna nsombelu

²⁰ Nuenu bena matunga makuabu, bavuabu kabayi bashipe, semenayi, nudisangishe, nusemene popamue. Bonsu bavua bafike ne mpingu yabu ya mitshi, nansha badi batendelela mvidie udi kayi mua kubasungidila, kabena ne lungenyi to.

²¹ Buelayi mu bipangu, nukebe tshinudi mua kuamba bua kudibingisha! Kadi uvua munumanyishe ku kale bidi bienzeka lelu nnganyi? Uvua mubisokolole bangabanga ne kuenzekabi nnganyi? Ki mmeme Maweja-Nangila anyi? Kakuena Mvidi Mukulu mukuabu to, amu meme. Mvidi Mukulu wa diyi dimue, Mvidi Mukulu udi usungidilangana, kenaku, amu meme.

²² Nuenu badi basombe ku ndekelu kua buloba, fikayi kundi meme. Nennusungidile. Bualu Mvidi Mukulu ke meme! Kakuena mukuabu to.

²³ Bu mundi Mvidi Mukulu bulelela, ndi nditshipa ne: nenkumbaje malaya anyi. Ndi ndaya ne muoyi umue ne: bantu bonsu nebatue binu kumpala kuanyi. Nebaditshipe bua kundamata kashidi.

²⁴ Nebambe ne: “Amu kudi Maweja-Nangila nkayende, ke kutudi tupeta bukole, ke kutudi mua kutshimuna.” Bonsu bavua banduishe, nebafike kundi ne bundu.

²⁵ Kadi nengambuluishe ndelanganyi yonsu ya Izrayele, bua bapete tshidibu ne bua kupeta. Nanku nebantumbishe.