Yeshaya 43 - MUKANDA WA MYIDI MUKULU

¹ Izrayele, mpindiewu Maweja-Nangila udi wakula! Yeye ke mufuki webe. Yeye uvua mukufumbe wewe, tshisamba tshia Yakobe. Udi ukuambila ne: “Kutshinyi, bualu nenkusungidile! Ndi mukubikile, mutele dina diebe! Udi muntu wanyi meme!

² Pawapitshila mu mayi, nengikale nebe. Pawasabuka misulu, kuena udiinamu to. Pawikala mupitshile mu kapia, kuena upiamu. Ndimi ya kapia kayena ikosha.

³ Bualu meme Maweja-Nangila, ndi Mvidi Mukulu webe. Meme ndi Wa tshijila wa bena Izrayele. Ndi mukusungididi webe. “Ndi mfila Ejipitu, bu biuma bua kukupikula; mfila Kushe ne Seba, bua kubashintakaja nebe.

⁴ Bualu udi ne mushinga ku mesu anyi. Kakuena mukuabu, amu wewe! Meme ndi mukunange. Nenku, ndi mfila bantu bakuabu pa mutu pebe. Bisamba bikuabu nembishintakaje nebe.

⁵ Kutshinyi to. Meme ndi nebe. Nempingaje bana bebe mu ditunga, badi luseke ludi diba dipatukila. Nensangishe bebe bonsu, bafume kudi diba dibuelela.

⁶ Nengambile badi ku mutu ne: ‘Nubalekele, bapingane kuabu.’ Nengambile badi kuinshi ne: ‘Kanukandamanyi nabu to.’ Nufike ne bana banyi ba balume, badi ku mutu kuaka. Nufike ne bana banyi ba bakaji, badi ku ndekelu kua buloba.

⁷ Nufike ne bonsu badibu binyike dina dianyi, bonsu bandi mufuke, bonsu bandi musonge, bandi muenze, bualu bobu badi baleja butumbi buanyi.”

Nuenu nudi bajadiki ba malu anyi

⁸ Nufike ne bantu aba ku tshilumbu. Bualu badi ne mesu, kabayi bamona tshintu, badi ne matshi, kabayi bumvue bualu.

⁹ Matunga onsu adisange pamue. Bantu badikungije. Kadi wa ku mvidie yonsu udi utumanyisha malu adi ne bua kuenzeka nnganyi? Udi mua kutumvuija malu akadi mamane kuenzeka nnganyi? Nanku atuleje bantu badi mua kutujadikila ne: mvidie awu mmukumbaje bivuaye muambe. Atuleje mudiye mubinge. Bajadiki aba bamuteleje, bua batujadikile ne: mvidie awu udi wamba malu malelela.

¹⁰ Maweja-Nangila udi wamba ne: Bajadiki ba malu anyi, ke nuenu bantu banyi. Nudi bena mudimu banyi, bandi musungule. Dijinga dianyi didi ne: numanye, nuitabe, nujingulule ne: Meme ndi nganyi. Kumpala kuanyi, kakuvua mvidie, panyima panyi, kakuakuikala mvidie mukuabu.

¹¹ Maweja-Nangila, ke meme, ke meme nkayanyi. Meme tshiyiku, kakuena musungidi to.

¹² Meme ke udi unupandisha. Meme ke uvua mumanyishe bualu ebu kumpala. Ki mmvidie wa bikuabu bisamba uvua muenze nanku nansha! Nudi bajadike ne: meme ndi Mvidi Mukulu!

¹³ Nengikale Mvidi Mukulu kashidi. Muntu kakungenzeja malu ku bukole. Muntu kakukudimuna bindi ngenza to.

Ndi ntuma muntu bua kunupikula

¹⁴ Maweja-Nangila, Wa tshijila wa bena Izrayele, udi muvue kunusungidila, udi wamba ne: “Bu mundi mununange, ndi ntuma muntu ku Babilone, bua anunzuluile biibi bionsu. Nenku kuaka ku Babilone, mbila ya disanka neyandamuke miadi ne miyenga.

¹⁵ Meme ndi Maweja-Nangila, Mvidi Mukulu wa tshijila, Mufuki wa Izrayele, Mukalenga webe.”

Njila mupiamupia mu tshipela

¹⁶ Kale, Maweja-Nangila uvua mupande njila mu mayi manene. Uvua mupande muaba wa kupitshila mu mayi muondoke.

¹⁷ Kale, uvua muendeshe matempu a mvita ne nyama ya tubalu, bena mvita ne bilobu biabu. Bena mvita aba kufua, kabayi bajuka kabidi to. Badi bajimine, bu kapia kajima mu muendu. Kadi Maweja-Nangila udi wamba mpindiewu ne:

¹⁸ “Kanuedi meji ku malu adi mamane kupita. Kanutangidi bidi bishale panyima penu.

¹⁹ Bualu nengenze bualu bupiabupia. Bualu ebu bukadi bumueneka. Kanuena nubumone anyi? Eyowa, nempande njila mu tshipela. Mu buloba buatuke abu, nempatulemu misulu.

²⁰ Nyama ya muitu, mibuabua ne kasonga-nyunyi, neinganyishe bikole, bua pandi mupatule mayi mu tshipela, ne misulu miaba miume. Bualu ndi musue kupesha bantu, bandi musungule, mayi a kunua.

²¹ Nenku bantu bandi muenze, nebumvuije bakuabu malu manene andi muenze.”

Tshilumbu tshia Mvidi Mukulu ne bena Izrayele

²² Maweja-Nangila udi wamba ne: “Wewe Izrayele, tshisamba tshia Yakobe, kuena muntendelele to. Meme nkavua mukutonde!

²³ Kuena mundambule meme, kuena mungoshile bana ba mikoku to. Unudi banemeke ne milambu yenu, ki mmeme to. Meme tshiena mukubueje mu bupika, bua kukuenzela malu ku bukole, bua wewe kundambula milambu. Tshiena mukutonde pa kukulomba milambu ya manananshi.

²⁴ Uuvua musumbile mienge ya mupuya muimpe ku mushinga mukole, ki mmmeme to! Mafuta a nyama yebe ya milambu, kuena mungukutshishe meme nawu to! Apu, wewe udi mungenze meme mupika webe ne bilema biebe. Buenzayi buebe ke bualu budi buntonda!

²⁵ Kadi, nansha nanku, ndi nkufuila amu luse bua buntomboji buebe. Tshiena musue kuvuluka kabidi bilema biebe. Ke mundi meme nanku.

²⁶ Tuye nebe ku kabadi bonsu babidi. Umfunde bua tshilema tshindi muenze. Umvuije tshilumbu tshijima, uleje muudi mubinge.

²⁷ Nkambua webe wa kumpala ukavua mupile. Ke mudi kabidi balombodi ba ditunga diebe bantombokele lelu.

²⁸ Nenku, ndi mudiombole batuangaji badi bakuata mudimu mu nzubu wanyi. Mvua mubutule tshisamba tshia Yakobe. Ndi muanyishe, bua bena lukuna abu bapende bena Izrayele.