Yeshaya 41 - MUKANDA WA MYIDI MUKULU

Muntu uvua Maweja-Nangila mutume mu njila

¹ Maweja-Nangila udi wamba ne: Nuenu bantu badi base kule, puwayi, nunteleje. Nuenu bisamba bia bantu, koleshayi muoyi. Semenayi pabuipi! Nenushishe kuakula. Eyowa, tusemenayi, nuenu ne meme, bua kubanga tshilumbu.

² Meme kubikila muntu luseke ludi diba dipatukila, kumutuma mu njila. Muntu awu kutshimuna baluishi bende, kuonsu kuyayaye. Udi utshimuna matunga onsu adi kumpala kuende, udiatakaja bakalenga. Muele wende wa mvita udi ubatangalaja bu lupuishi. Mikete yende idi ibipata nduu, bu bisosa bidi lupepele lutangalaja.

³ Kubalondakajaye, kupitaye munkatshi muabu, kabayi bamuenzela bualu. Makasa ende kaena nansha adiata panshi.

⁴ Uvua muenze bualu ebu nnganyi? Amu yeye udi mudianze kuamba bivua ne bua kuenzeka. Ke meme Maweja-Nangila, ndi ndudika malu a bantu. Ndiku, padibu babanga malu, nengikaleku, padibu baajikija.

⁵ Bantu badi base kule, badi bamona bimvua muenze, bakuatshika bowa. Bantu ba ku nshikidilu kua buloba, badi basemena pabuipi, bazakala.

⁶ Badi bambuluishangana, bakoleshangane ku muoyi, bamba ne: “Tuyayi!”

⁷ Muena mudimu wa mabaya udi ukolesha mufudi wa mpawungi ku muoyi. Mufudi udi ukolesha nsenda wa biamu ku muoyi. Udi wanyisha mudimu wende, wamba ne: “Udi muenze bimpe!” Pashishe badi bashindika lupingu, balupopela ku tshitekelu ne misonsu.

Lekela kutshina

⁸ Izrayele, muena mudimu wanyi, tshisamba tshia Yakobe tshimvua musungule, ndelanganyi ya Abrahame, mulunda wanyi, teleja.

⁹ Meme kukukeba too ne ku nshikidilu kua buloba. Meme kukubikila, pauvua ku matunga a kule. Meme kukuambila ne: “To, tshiena mukubenge nansha. Ndi mukusungule. Muena mudimu wanyi ke wewe.”

¹⁰ Mpindiewu, lekela kutshina, bualu ndi nebe. Lekela kukenzakana nseke yonsu ne dipampakana, bualu meme ndi Mvidi Mukulu webe. Ndi mufike bua kukukolesha ku muoyi. Ndi mufike bua kukuambuluisha. Ndi nkulama. Udi mu tshianza tshianyi tshia bukole.

¹¹ Eyowa, bonsu badi bakukina, nebafue bundu. Bantu nebabaseke. Baluishi bebe nebajimine, nebabutuke bonsu!

¹² Neukebe bantu bonsu, bavua bakuluisha, kuyi ubamona. Bonsu bavua baluangana nebe, nebajimine.

¹³ Bualu meme Maweja-Nangila, ndi Mvidi Mukulu webe, ndi nkuambuluisha. Ndi nkuambila tshiakabidi ne: “Lekela kutshina. Nenkuambuluishe.”

Ndi mfika bua kukuambuluisha

¹⁴ Izrayele, tshisamba tshia Yakobe, lekela kutshina. Bakuabu badi bakumona bu kantu kakese, bu kishi kadibu mua kudiata ku makasa. Kadi meme nkayanyi nenkuambuluishe. Meme Maweja-Nangila ndi njadika nanku. Meme Mvidi Mukulu wa tshijila wa bena Izrayele, nenkusungidile.

¹⁵ Ndi nkuenza, bu tshiamu tshipiatshipia tshitue tshia kubundulula natshi buloba. Wewe neubundulule natshi mikuna minene, uyilandakaje. Neuboze natshi mikuna mikese, mudibu baboza bisosa.

¹⁶ Neupepule mikuna, lupepele neluye nayi! Mvunde neayitangalaje. Kadi wewe neusanke, bualu meme ndi Maweja-Nangila webe, ndi nkusankisha. Neungele tuasakidila muvule, bua bidi Wa tshijila wa bena Izrayele ukuenzela.

Tshipela netshiandamuke muaba udi ne mayi

¹⁷ Bapele ne bakengi, badi bakeba mayi, kabayi baapeta. Nyota idi ibumisha muminu. Kadi meme Maweja-Nangila, ndi ngitaba ku dilomba diabu. Meme Maweja-Nangila wa bena Izrayele, tshiena mbalekela to.

¹⁸ Nempatule misulu ya mayi, pa mikuna idi kayiyi ne mitshi. Nempatule mishimi ya mayi muinshi mu bibandabanda. Tshipela netshiandamuke dijiba dia mayi. Buloba buume nebuandamuke muaba udi mayi mavule.

¹⁹ Nenkune mu tshipela mitshi ya sedre ne ndunga, mitshi ya mirte ne ya olive. Mu ditunga divua kadiyi mayi, nenkunemu mitshi ya siprese, mitshi ya pine ne mikuabu kabidi.

²⁰ Nenku bantu bonsu nebamone, bonsu nebamanye, bonsu nebajadike, nebajingulule ne: Maweja-Nangila wa tshijila wa bena Izrayele, ke udi muenze malu onsu aa. Yeye ke udi wandamuna malu.

Mvidie ya dishima kayena ne bukole

²¹ Maweja-Nangila, mukalenga wa Yakobe, udi wamba ne: Nuenu mvidie ya bukua matunga, fikayi, nudilumbuluile, nutuleje binuvua benze.

²² Semenayi pabuipi, tuambilayi malu anuvua bakumbaje. Nutumvuije malu akadi mamane kuenzeka, bua tuetu kuelaku meji. Tumanyishayi nansha malu adi kaayi manji kuenzeka. Nanku netumanye bidi mua kuenzeka.

²³ Eyowa, tuambilayi malu avuavua kuenzeka bidimu bidi kumpala. Nanku netumanye bushiwa, munudi nuudie milelela. Enzayiku, nansha malu mimpe nansha mabi, bua tuetu kujadika munudi mvidie, tushale kunutshina.

²⁴ Kadi nudi tuntu tua patupu. Binudi nuenza bidi bia tshianana. Badi banusungula bu mvidie yabu, ndi mbadiwula kashidi.

²⁵ Ndi mujule muntu, ufumina luseke ludi diba dipatukila. Muntu awu udi ufika luseke lua ku mutu kua ditunga. Badi batela dina diende, luseke ludi diba dipatukila. Udi udiatakaja balombodi ba maloba, mudibu badiata bitotshi, mudi mufumbi wa ngesu, udiata diima, udibeta.

²⁶ Wakadianjila kutuambila bualu ebu, bua tuetu kubumanya nnganyi? Wakabuamba kumpala, bua tuetu kujadika ne: “Ke muntu uvua mumanye bualu,” nnganyi? Bulelela, kakuena nansha umue wa kunudi, nuenu mvidie, uvua mubumanye. Kabena banumvue bamba bualu.

²⁷ Meme ndi wa kumpala, wakadianjila kuambila Siyone bualu. Bualu mvua mutume muntu mu Yerushalayime, bua kutuadila bantu lumu lua disanka lua ne: “Bana benu, bakadi bapingana!”

²⁸ Meme mvua mutangile, kadi tshiena mumone mvidie. Munkatshi mua mvidie yonsu, kamuena udi mua kufila meji, undi mua kukonka bualu, udi mua kungandamuna.

²⁹ Bonsu buabu badi tshianana. Bidibu benza bidi patupu. Mvidie yabu idi lupepele, kayiyi ne bukole nansha bukese.