Yeshaya 38 - MUKANDA WA MYIDI MUKULU

Izkiya udi usama

¹ Tshikondu atshi, mukalenga Izkiya kupeta disama dia lufu. Muambi Yeshaya, muana wa Amose kufika kudiye bua kumusamba. Kumumanyishaye miaku ivua Maweja-Nangila muambe ne: “Diba diebe ndimane kukumbana. Udilongolole, bualu kuena upanda ku disama edi. Neufue.”

² Nenku, Izkiya kukudimuka, kutangila ku tshimana tshia nzubu. Kutendelelaye Maweja-Nangila wamba ne:

³ “Eyi! Maweja-Nangila, vulukaku bionsu bimvua ngenza. Mvua mukulamate ne muoyi mujima. Mvua amu ngenza malu mimpe avua mua kukusankisha!” Pashishe Izkiya kudilaye muadi.

⁴ Nanku Maweja-Nangila kutuma Yeshaya bua

⁵ kuambila Izkiya ne: “Maweja-Nangila Mvidi Mukulu wa nkambua webe Davide udi wamba ne: — Ndi mumvue ditendelela diebe. Ndi mumone binsonji biebe. Nanku, neushale kabidi ne muoyi bidimu dikumi ne bitanu.

⁶ Wewe ne tshimenga tshia Yerushalayime, nennusungidile ku bianza bia mukalenga wa bena Ashure. Nendame tshimenga etshi kashidi.”

²¹ Pashishe Yeshaya kutuma diyi bua bafike ne ditapi dia tumuma tua mutshi wa mfiku. Kudilamikaye muaba uvua disama bua kuondapa mukalenga!

²² Nanku Izkiya kukonka muambi Yeshaya ne: “Ntshimanyinu kaayi tshidi mua kunjadikila ne: ndi mua kubuela kabidi mu nzubu wa Maweja-Nangila?”

⁷ Yeshaya kumuambila ne: “Maweja-Nangila neakupe tshimanyinu tshidi mua kukujadikila ne: neakumbaje bionsu bidiye mulaye.

⁸ Mundidimbi ukadi mubuikila tshibandilu tshia Akaze tshidi pambelu mu munya. Nanku Maweja-Nangila neabandishe tshiakabidi bukenke bua diba pa bidiatshilu dikumi bia tshibandilu atshi!” Bulelela diba divua ditokesha tshiakabidi bidiatshilu dikumi bivua mundidimbi mumane kubuikila.

Izkiya udi utendelela Mvidi Mukulu

⁹ Ke musambu uvua mukalenga wa bena Yuda Izkiya muimbe, pakajika disama diende ewu:

¹⁰ Mvua ngamba ne: ndi mfua, mulale panu amu tshia bibidi tshia matuku anyi. Ndi mbuela mu kandondu ka bafue, nkumbajamu matuku antshivua mua kulala panu.

¹¹ Meme kuamba kabidi ne: tshiakumona kabidi Maweja-Nangila pa buloba bua ba-muoyi; tshitshiena mua kutangila mpala nansha umue wa muntu udi muase panu.

¹² Mbatule nzubu undi nsomba, mudibu batula mutanda wa mulami wa mikoku, baya nawu kule kudi lupepele. Matuku anyi a panu akadi matue ku tshibungubungu, bu tshipese tshia tshilamba, tshidi mukumi ukosa buanda, uvunga. — Maweja-Nangila buatshia buila, udi mua kuvua kungangata, kumbutula. —

¹³ Bufuku bujima ndi ngela mbila, mmona ne: Maweja-Nangila mmuzaze mifuba yanyi yonsu, mudi nyama wa ntambue uyiboza, uvinga. — Maweja-Nangila buatshia buila, udi mua kuvua kungangata, kumbutula. —

¹⁴ Ndi ngela mbila mikole, bu kandindi, ntua mikemu ne kanyinganyinga, bu kamanda-nkutshi. Mesu anyi adi atangila mulu, apungila. Maweja-Nangila, ungambuluishe! Ndi nkenga, mioyi mminshikile munda.

¹⁵ Kadi tshingambila Maweja-Nangila ntshinyi? Udi muenze bionsu ebi ki nYeye anyi? Ndi ngendakana panu, mpitshisha matuku, amu ne kanyinganyinga kakole munda.

¹⁶ — Maweja-Nangila, wewe uvua mudianze kumanya, bivua ne bua kungenzekela. Kadi wewe kumfululula, kumpingajila makanda, kundama ne muoyi.

¹⁷ Eyowa, kanyinganyinga nkandamuke diakalenga. Udi munnange bushiwa, mungumushile lufu. Wewe kuangata bilema bianyi bionsu, kubiela panyima kule kutambe.

¹⁸ Mu kandondu ka bafue kabena bakutumbisha. Bitalu kabiena bikuela bikashi! Badi bapueka mu kandondu, kabatshiena bakutekemena bua ubavuluke.

¹⁹ Amu badi ne muoyi ke badi bakusamuna, mundi ngenza meme lelu. Baledi nebamanyishe bana babu, muudi ukumbaja bionsu biudi ulaya.

²⁰ Maweja-Nangila, uvua munsungidile. Ke mutudi tukutumbisha, tukuimbila ne bisanji, matuku onsu atudi tusomba panu, mu nzubu muudi netu, Maweja-Nangila.