Yeshaya 33 - MUKANDA WA MYIDI MUKULU

Muena tshinyangu udi ne diakabi

¹ Wewe munyangi wa bintu bionsu, udi muena diakabi, bualu kabavua bakunyange wewe nenku to. Udi welela bakuabu tshitungu, padibu kabayi bakuelela wewe tshitungu! Pawamana kulekela kubutula bakuabu, nebakubutule ne wewe kabidi. Pawamana kutungila bakuabu tshitungu, nebakutungile ne wewe kabidi.

² Maweja-Nangila, utunwuile luse. Tudi tukutekemena, tukuindila. Dinda dionsu, utukoleshe. Diba dia dikenga, utusungidile.

³ Paudi utonoka, bantu badi banyema mbilu. Paudi ujuuka kulu, bisamba bidi bitangalaka.

⁴ Diba adi, netupawule bintu, mudi mpasu imata panshi, idia bisosa. Tudi tudiela pa bia baluishi betu, mudi mikumbi ikila pa bia mu madimi.

⁵ Maweja-Nangila udi ne bukole, usomba mulu. Udi ukuata mudimu mu Yerushalayime, bua bantu banemekangane, basankishangane.

⁶ Bena tshisamba tshia Maweja-Nangila, nenusombe mu ditunga ne mimuemue. Kuikala bena meji, kumanya Mvidi Mukulu, ke biuma bidi bitufikisha ku lupandu. Kutshina Maweja-Nangila, ke buenu bubanji!

Maweja-Nangila nealuile bena Izrayele mvita

⁷ Monayi: bena mu Yerushalayime, badi bapatuka mu misesu, batua mikemu. Bavua batumanyisha bupole, badi bapingana, benda badila miadi.

⁸ Njila idi munda mutupu. Bantu kabena bapitshilamu. Muena tshikisu mmupule ndondu, mubenge mikanda idi imujadika. Muoyi wa muntu kawena ne mushinga ku mesu ende.

⁹ Ditunga didi mu madilu, diume, dilakata. Mikuna ya Lebanone idi ifubidila ne bundu. Mpata wa Sarone ukadi tshipela. Mu Bashane ne pa mukuna wa Karmele, mitshi idi idinyuka, mabeji apopoka panshi.

¹⁰ Maweja-Nangila udi wamba ne: “Mpindiewu nenjuke, lelu, ndi ngenza bualu. Nendeje bukole bundi nabu.

¹¹ Meji onsu anuvua bele munda muenu, adi a tshianana. Panudi nukeba kuakumbaja, kanuena nupeta tshintu. Mueyelu wanyi udi bu kapia kadi kaabutula.

¹² Bisamba bikuabu nebabioshe, bishale amu butu. Nebabiele mu kapia, bu mudi bantu bela mu kapia mitshi ya meba buabu bakose.

¹³ Nuenu badi base kule, telejayi bimvua muenze. Nuenu badi basomba pabuipi, manyayi bukole buanyi!”

¹⁴ Mu Siyone, bena tshibawu badi bakuatshika bowa; badi kabayi bitaba Maweja-Nangila badi bazakala. “Nganyi wa kutudi washala pabuipi ne kapia aka kadi kabutulangana? Wa munkatshi muetu wasomba pamue, ne tshikutu tshitema kapia kashidi, udiku anyi?”

¹⁵ — Amu udi ulonda njila mululame, unemeka bantu, wamba malu malelela, ubenga kukengesha bantu bua kupeta biuma, ubenga badi basue kumubuejila. Kena uteleja badi bamukoka ku dishipangana. Kena utangila, wanyisha badi benza bibi.

¹⁶ Muntu awu neasombe talalaa, bu muntu musokome kulu pa mikuna, bu udi unyemena mu mbuebue mikole. Neapetemu tshiakudia, kakupanga mayi a kunua.

Badi bapikula Yerushalayime

¹⁷ Mesu ebe neamone mukalenga, ne lumu luende luonsu. Neamone mudi ditunga dialabale.

¹⁸ Neuvuluke bowa buuvua nabu kale. Neukonke ne: “Bantu benyi bavua babala bajadika bungi bua milambu, ituvua bafile, badi penyi? Bavua bakenketa bimenga bietu, bituvua bakoleshe ne bimana, bepi?”

¹⁹ Kanuakumona kabidi bantu aba bavua baditambisha, bavua bakula muakulu mukole, udi bantu kabayi mua kujingulula, kabayi mua kumvua.

²⁰ Neutangile Yerushalayime, neutangile Siyone, muaba udibu benzela bibilu bietu, nanku neumone ne: Yerushalayime ukadi muaba wa dikisha ne wa bupole, bu ntenta udibu kabayi batentemuna kabidi, kabayi batula milonda, kabayi basulula mionji yende.

²¹ Momu amu ke mudi Maweja-Nangila, utulejila butumbi buende. Nemuikale misulu mikese, ne mialabale. Momu amu matu a mvita kaena endelamu. Matu manene kaena apitshilamu.

²² Bualu Maweja-Nangila udi mulombodi wetu, udi mfumu wetu bonsu. Maweja-Nangila udi mukalenga wetu. Yeye ke Musungidi wetu.

²³ Mbamane kusulula mionji ya matu a baluishi. Kayena ishindika kabidi mutshi, kabena babandisha kabidi nayi dibendele dia buatu. Dituku adi, nebabanyangane bintu bituvua banyenge mu mvita. Nansha balema mene, nebaye kupawula bintu bia baluishi.

²⁴ Mu Yerushalayime kamuakuikala muntu, udi wamba ne: “Ndi nsama”. Bualu bantu ba mu thimenga atshi, mbamane kubafuila luse bua tshilema tshiabu.