Yeshaya 32 - MUKANDA WA MYIDI MUKULU

Mukalenga wa malu mimpe

¹ Nanku mukalenga neafike, mukalenga udi ulombola bantu bende mu buakane. Balombodi ba mu bukalenga buende, nebalonde amu njila wa buakane.

² Yonsu wa kudibu neenze amu bimpe, yonsu neikale bu muaba utudi mua kunyemena, padi lupepele ne mvula wa tshipupu bitukuata. Yonsu neikale bu musulu udi upueka mu buloba buume, bu dileji didi lubuebue lunene lufila mu ditunga dia luya lupite.

³ Bantu aba badi ne mudimu wa kutabalela makenga a bantu, kabakushala kabidi bampofu to. Bantu aba badi ne bua kumvua, nebateleje bimpe tshidi bantu bamba.

⁴ Bantu badi kabayi bela meji, nebatuadije kumvua malu. Bena tshikukumina nebatuadije kuakula bimpe. Bantu bonsu nebumvue tshidibu bamba.

⁵ Muntu mupote kabakumuangata kabidi ne mushinga to. Muntu wa tshidingidingi kabakumuteka kabidi mulongu wa bantu ba nsongu.

⁶ Bualu bantu bapote badi bakula, amu bua kuamba malu a bupote. Badi bela meji ku malu a bupote, adibu basue kuenza matuku adi kumpala. Badi benza malu bu bashipianganyi. Badi bakula malu adi abipila Maweja-Nangila. Muntu udi ne nzala, kabena bamupesha tshiakudia. Muntu udi ne nyota, kabena bamupesha tshikunua.

⁷ Bantu bapale badi bamanye mua kukengesha bantu bakuabu bikole. Badi badilongolola, bua bamone mua kupisha bapele, pa kujadika malu a dishima. Ke mudi bena dikenga kabayi mua kubinga, nansha bobu kabayi ne bualu.

⁸ Kadi muntu wa kalolu, udi wela meji amu a kalolu, udi ukumbaja kabidi malu a kalolu.

Badi babela bakaji ba mu Yerushalayime

⁹ Nuenu bakaji badi kabayi basumpakena tshintu, jukayi, nunteleje. Nuenu bana ba bakaji badi benda bu badi kabayi ne lutatu, ntelejayi: ke meme awu ngakula.

¹⁰ Papita tshidimu ne matuku, nuenu, bana ba bakaji badi benda kabayi ne lutatu, nenupampakane. Bualu kabakupola kabidi tumuma tua mvinyo to, kabakunowa kabidi bintu mu madimi enu to.

¹¹ Nuenu bakaji badi kabayi basumpakena tshintu, zakalayi, nuenu bana ba bakaji badi benda bu badi kabayi ne lutatu, nusumpakane. Vulayi bilamba bienu, vualayi bilamba bia madilu mu tshimonu.

¹² Dikumayi bianza pa tshiadi, nudile miadi; jingayi budimi buenu bulenga, ne mionji yenu ya mvinyo ivua ikuama bimpe.

¹³ Dilayi bua buloba bua bantu banyi, budi bunyanga kudi meba ne tshisuku. Dilayi, bualu disanka ndimane kumuka mu nzubu yenu yonsu. Musangelu kawena kabidi mu tshimenga to.

¹⁴ Nzubu wa mukalenga mmushale mutupu, tshimenga, tshivua bantu tente, tshikadi tshipela. Mukuna wa Ofele, ne kaleya ka batentekedi, mbishale dikolu kashidi. Nyama ya mpunde ya ditu ikadi inayilamu, bimuna bikadi bikebelamu biakudia biabi.

Malu neashintuluke bikole

¹⁵ Dituku dikuabu, Maweja-Nangila, neatutumine Mueyelu wende. Nenku, madimi avua kaayi akuama bintu, neandamuke malaba mafuke a mitshi. Mitshi ya bimuma neikale bungi bu mitshi ya muitu!

¹⁶ Miaba yonsu, mu mpata ne mu metu, bantu nebakumbaje tshidi Mvidi Mukulu musue. Mu ditunga dijima bantu nebanangangane, nebumvuangane ne muoyi umue.

¹⁷ Buakane nebupatule bupole. Nebufile ditalala bua kashidi, bantu kabayi ne bua kutshina kabidi to.

¹⁸ Bantu ba Maweja-Nangila nebasombe talalaa, muaba udi bupole ne dikisha, muaba udibu kabayi ne lutatu nansha lukese.

¹⁹ Mabue a mvula nealoke bikole muitu, mua baluishi babu, tshimenga tshiabu netshidine mu mayi.

²⁰ Kadi bantu ba Maweja-Nangila nebikale bena diakalenga. Nebakune biakudia biabu ne disanka, bualu mayi neikale mavule. Ngombe ne mpunde nebiendakane miaba yonsu kakuyi bualu, bua bungi bua biakudia bidi mu ditunga.