Yeshaya 29 - MUKANDA WA MYIDI MUKULU

Lupandu lua Yerushalayime

¹ “Eyi, Ariyele, Ariyele we, tshimenga tshia Yerushalayime, muaba uvua Davide muase mitanda yende, udi muena diakabi! Matuku onsu wewe kuenza amu bibilu, ku tshidimu ku tshidimu,

² kadi nenkunyoke! Meme Maweja-Nangila ndi njadika nanku. Neudile muadi, neubungame. Tshimenga tshijima netshikale amu bu tshilambuilu tshitampakane mashi miaba yonsu.

³ Nenunyungulule ne mitanda yanyi, nenkuele munkatshi. Nenkutshintshimike ne biamu bia mvita, kabidi ne mushiki wa buloba.

⁴ Neupone panshi mu buloba. Diyi diebe nediumvuike, bu didi difumina muinshi mua buloba, dipitshila mu lupuishi. Nedikale bu diyi ditekete dia mukishi, didi difuma mu kandondu ka buloba.

⁵ Kadi baluishi bebe ba bungi, nebikale anu bu dibungi dia lupuishi. Bena lukuna badi bakuluisha, nebikale bu bisosa bidi lupepele lupepula.” Eyowa, bualu ebu nebuenzeke lukasa, katuyi babutekemene.

⁶ Maweja-Nangila muena bukole buonsu neakuambuluishe, ne makubakuba a mvula, ne bikumina, ne mvunde wa tshipupu, ne ndimi ya kapia idi ibutula bintu bionsu.

⁷ Bena matunga a bende, bavua bakuluisha wewe Ariyele, bavua bakubunda, bavua bakunyungulula ne mushiki wa buloba, bavua bakukengesha, nebajimine bonsu bu mudi tshilota, bu mudi bualu butudi tumona bufuku.

⁸ Bualu ebu nebuikale bu mudi muntu ne nzala, ulota, udia biakudia. Kadi upapuka ku tulu, kudiumvuaye amu ne nzala. Nebuikale bu muntu ne nyota, ulota unua mayi. Kadi upapuka ku tulu, mupungile, kudiumvuaye amu ne nyota yende ayi. Ke muikalabi nanku, ne bena matunga badi baluisha mukuna wa Siyone.

Bantu badi bu bampofu, bakuatshiki ba maluvu

⁹ Nenukeme kanuyi mua kuamba bualu. Nenuikale bamfofu kanuyi mua kumona. Nenukuatshike, kanuyi banue maluvu. Nenutetuke, kanuyi banue tshintu.

¹⁰ Bualu Maweja-Nangila neanuladike tulu tukole. Uvua munusuike tshilamba pa mesu. — Mesu enu ke bambi benu. — Mmunubuikile tshilamba mu mitu yenu. — Mitu yenu ke badi bamona malu. —

¹¹ Malu adi bambi banumanyisha aa, kaena umvuika to. Adi amu bu mukanda mufunda, mulamika ne budimbu bukole, bautua tshitampi. Badi baupa muntu kampanda, udi mumanye mua kubala, bamba ne: “Tubadileku mukanda ewu.” Kadi yeye kuandamuna ne: “Kamuena mushindu wa kubala, bualu mukanda mmulamika, kabidi mmutue tshitampi bikole.”

¹² Badi baupesha kabidi muntu udi kayi mumanye mua kubala ne: “Tubadileku mukanda ewu.” Kadi yeye neandamune ne: “Tshiena mumanye mua kubala mukanda to.”

Maweja-Nangila utshidi wenza malu a dikema

¹³ Maweja-Nangila uvua wamba ne: “Tshisamba etshi tshidi tshinnemeka, amu ne meyi a mukana. Badi bantendelela amu ne mishiku. Kadi muoyi watshi udi kule. Ditendelela diabu didi amu meyi ne bibidilu bia bantu, bidibu balonda.

¹⁴ Kadi nengenze kabidi malu adi atshikemesha. Meji a bena meji batshi, neashikile. Lungenyi lua bena lungenyi batshi, nelujimine.”

Maweja-Nangila nnganyi mene?

¹⁵ Bantu badi benza malu mu musokoku, basokoka Maweja-Nangila meji adibu bela, benza malu abu mu miidima, mbena diakabi! Badi bela meji ne: “Watumona nnganyi? Wamanya tshitudi tuenza nnganyi?”

¹⁶ Nudi bantu batshimbakane, panudi nuteka diima ne mudifumbi mulongu umue! Tshintu tshidibu benza kudi muntu, katshiena mua kuambila muntu ne: “Udi mungenze ki ngwewe to.” Luesu ludi mua kuambila mulufumbi ne: “Kuena mumanye mudimu wa ditumba anyi?”

Dishintuluka dinene dia malu

¹⁷ Telejayi: Nkushale matuku amu makese, ditu dia Lebanone nediandamuke lupangu lua mitshi ya bimuma. Lupangu lua mitshi ya bimuma, neluandamuke ditu.

¹⁸ Dituku adi, badi ne mapapa, nebumvue bidibu babala mu mukanda. Bampofu badi bapatuka mu miidima, nebamone bimpe.

¹⁹ Maweja-Nangila neavudijile bantu bapuekele disanka. Bantu badiombola ba mu buloba, nebasanke, bualu bua Maweja-Nangila wa tshijila, Mvidi Mukulu wa Izrayele.

²⁰ Bualu bena tshikisu nebajimine. Bena kapeja bonsu nebumuke. Bonsu badi bakeba mua kukengesha bakuabu nebafue.

²¹ Ke bonsu badi bafunda ku tshilumbu, bantu badi kabayi ne bualu. Ke badi bakeba mua kuteta bandumbulula, bua bapishe badi babinga.

²² Ke padi Maweja-Nangila, Mvidi Mukulu wa Yakobe ne wa ndelanganyi yende, Musungidi wa Abrahame, wamba ne: “Bituadije ku mpindiewu, bena Yakobe, kabena bafue kabidi bundu, kabakubungama kabidi to.

²³ Padibu bamona, bobu ne bana babu, midimu indi muenze munkatshi muabu, nebajadike mundi. Nebamanye ne: Ndi Mvidi Mukulu wa tshijila wa Yakobe. Nebatshine kuenza bindi mbenga meme, Mvidi Mukulu wa Izrayele.

²⁴ Bantu bavua bapange lungenyi, nebatuadije kungumvua. Bavua bela amu mpata, nebanyishe bua babalongeshe.”