Yeshaya 16 - MUKANDA WA MYIDI MUKULU

Bena Mowabe badi balomba diambuluisha

¹ “Bena Mowabe, tuminayi mukalenga wa ditunga dia Yuda mulambu wa mukoku wa tshimpanga. Numuke nawu ku Sela mu tshipela, nuye too ne ku mukuna wa Siyone.”

² Bakaji ba bena Mowabe, badi bimane ku bisabu bia musulu wa Amone, amu bu mudi tunyunyi tupapalala, padibu batuipata mu disua diatu.

³ Bena Mowabe nebambe bena Yerushalayime ne: “Shindikayi diyi, nutuleje tshia kuenza. Nutulame munda munya, bu mudi butuku busokoka bintu mu miidima. Sokokayi bantu badibu bipata, kababamonyi kudi muntu.

⁴ Anyishayi bua bana betu, bavuabu bipata mu buloba bua Mowabe, basombe mu buloba buenu. Nubasokoke ku mesu a mushipianganyi. Diba nedifike didibu kabayi kabidi bakengesha bantu, kabayi babuela mu ditunga ne mvita, kabayi kabidi biba bintu.

⁵ Diba adi, bu munudi nudileja luse luenu, muntu wa ku ndelanganyi ya Davide, neasombe kashidi mu nkuasa wa bukalenga. Nealumbuluishe bantu, neakose nsambu pa yoyi, nealudike bantu mu njila muimpe.”

Bena Yerushalayime kabena ne tshidibu mua kuenza

⁶ Tuvua bumvue bakula ne: bena Mowabe badi baditambisha, badisua bikole, baditemba, badiamba tshianana, baditambisha patupu.

⁷ Mpindiewu bena Mowabe, bakadi badila, bela miyenga ya miadi, badila mikata ya bimuma, ivuabu nayi mu musoku wa Kire-Erese. Badi badila bikole, kabayi bamona tshia kuenza.

⁸ Madimi a mu Eshebone adi munda mutupu! Mionji ya mvinyo ya mu Sibma idi mifubidile. Bakalenga ba matunga, bavua bakuatshika maluvu a ku mionji ayi. Mionji ayi ivua yela matamba too ne ku Yazere, ibuela too ne mu tshipela. Ntonga yayi idi ilamba, too ne dia muamua dia Mayi manene a luepu.

⁹ Ke pandi ndila, pamue ne bantu ba mu Yazere, bua budimi bua mvinyo bua mu Sibma budi bunyanguke. Ndi ndila bikole bualu buenu, nuenu, bena Eshebone, ne bena Elale, bua padi bena mvita bapitshila ne mvita, muaba unuvua bapole bimuma, banowe bia pa madimi.

¹⁰ Kanutshiena ne disanka, bua mitshi yenu ya bimuma to. Kanutshiena nusanka, nutshionkomoka bua madimi enu a mvinyo to. Bualu mu mabungu a maluvu mmushale mutupu, bakami ba tumuma bonsu mbumuke, misambu ya bakami ba maluvu mmikoseke.

¹¹ Ke pandi ndidila bena Mowabe, ne kanyinganyinga, ne muadi bu wa lunzenze. Muoyi wanyi udi ujinga Kire-Erese.

¹² Nansha bena Mowabe babanda pa mukuna wa tshijila, baya mu nzubu wa mvidie wabu, benda bapungila, batendelela mvidie wabu, kabakupeta tshintu to.

¹³ Ke tshivua Maweja-Nangila muambe kale bua bena Mowabe.

¹⁴ Lelu Maweja-Nangila udi wamba ne: “Papita bidimu bisatu, amu dituku dia lelu, nebaseke bena Mowabe bonsu, ne bilobu biabu mene. Bantu babu badi bashala ne muoyi, nebikale bakese kabayi ne bukole.”