Yeshaya 14 - MUKANDA WA MYIDI MUKULU

Bena Izrayele bavua mu bupika badi bapingana

¹ Bushuwa, Maweja-Nangila nealeje tshiakabidi mudiye munange ndelanganyi ya Yakobe, mudiye musungule bena Izrayele. Neapingaje bantu bende mu matunga abu. Bantu benyi nebadisange kudibu, nebapetangane ne bena tshisamba tshia Yakobe.

² Bantu ba mu bisamba bikuabu nebambuluishe bena Izrayele, nebabafile kuabu. Mu buloba bua Maweja-Nangila, bena Izrayele nebadiangatshile bantu aba balume ne bakaji bu bapika babu. Bantu bavua babela mu lukanu, bena Izrayele nebabele kabidi mu lukanu. Nebashale bamfumu ba bantu bavua babatumina diyi.

Lufu lua mukalenga wa Babilone

³ Maweja-Nangila neapatule bena Izrayele mu bupika. Bobu bamane kupitshila mu makenga ne ntatu, nebapete dikisha.

⁴ Diba adi nebimbe musambu wa kuseka nawu mukalenga wa bena Babilone, bambe ne: Kia! Ebi mbienzeke munyi? Mfumu wa tshikisu mmufue bishi? Kakukengesha kabidi muntu nansha umue.

⁵ Maweja-Nangila mmunyangakaje bumfumu bua bantu babi. Mmutshibule dikombu dia muena tshikisu.

⁶ Uvua utuuta bantu ne tshiji tshikole kayi ulekela. Uvua ukengesha bantu ba mu matunga avuaye mukuate, kakuyi dikisha nansha dikese.

⁷ Mpindiewu bantu ba mu buloba buonsu, badi ne dikisha, bela mbila ya disanka.

⁸ Nansha mitshi idi isanka, bua padi muena tshikisu ewu mubutuke. Mitshi ya siprese ne ya sedre ya mu Lebanone idi imuambila ne: “Katshia wafua, kakuena udi ufika, bua kutupuila panshi kabidi to.”

⁹ Ku bajangi padibu bumvua, muukadi pa kufika, wewe muena tshikisu, badi badilongolola bua kukuakidila. Bualu buebe badi babisha bajangi bavua bamfumu banene panu. Bualu buebe badi bumusha, bakalenga bonsu ba matunga mu nkuasa yabu.

¹⁰ Bonsu badi bakula, bakuseka ne: “Lelu wewe mene ukadi mutekete bu tuetu, ukadi mutufuane, kuyi bukole.”

¹¹ Bintu biuvua udisua nabi, ne misambu iuvua muimbe mu nzenze yebe, udi nabi ku bajangi anyi? Bulalu buebe, ke bintu bibole, mbulankete webe, ke bikusu.

¹² Ebi mbienzeke munyi? Wewe uvua bu mutotu udi ukenka mu dinda! Mudibu bakukulula kulu mmunyi? Wewe uvua utshimuna bukua matunga, mudibu bakuimansha panshi mbishi?

¹³ Uvua uditambisha ne: “Netubande too ne mu diulu. Nembandishe nkuasa wanyi, kulu kua mitotu ya Mvidi Mukulu. Nensombe pa mukuna, padi mvidie isomba, yela tshipangu tshiayi, ku luseke lua ku mutu kua ditunga.

¹⁴ Nembande pa mutu pa mavuba. Nemfuanangane ne Mvidi Mukulu, muena bukole buonsu.”

¹⁵ Kadi mpindiewu, mbakuele mu bajangi, mu kandondu ka buloba.

¹⁶ Bonsu badi bakumona upuekamu, badi bakutangila, kabayi mua kuitaba bidi mesu abu amona. Nebebejangane ne: “Ewu, ki mmuntu uvua uzakaja buloba anyi? Ki mmuntu uvua munyange makalenga anyi?

¹⁷ Uvua mushiye matunga munda mutupu, mubutule bimenga, mubenge kulekela bena lukanu.”

¹⁸ Bushuwa, bakalenga bonsu ba matunga, bavua babajika ne lumu, muntu mu luende lukita.

¹⁹ Kadi wewe mbakuimanshe pambelu, mbakupale lukita bua kukujikamu. Udi mufuanangane ne muana, udibu balela mufuile munda, ukuatshisha bowa. Udi mufuanangane ne tshitalu, tshidibu badiatakaja ku makasa. Mbakubuikile bitalu bia bantu, bavuabu bashipe ku muele. Kadi bobu bavua babajika mu lukita lua mabue,

²⁰ wewe kuena uya muaba udibu mu nkita to. Bualu udi munyange ditunga diebe, mujimije mashi a bena tshisamba tshiebe mu mvita. Kashidi kabakulela dina dia bena diku diebe, dia bashipianganyi kabidi to.

²¹ Bana ba balume ba mfumu awu badi ne bua kufua, bafuta tshibawu tshia tatuabu! Tshianana badi mua kujuka, kukuata tshiakabidi buloba bujima, kuasamu ne bimenga.

²² Maweja-Nangila muena bukole buonsu udi wamba ne: “Nennyoke Babilone. Nenjimije dina dia Babilone, bana bende, ne ndelanganyi yende yonsu pa buloba.

²³ Nengenze Babilone bu mudi tshisense, muaba udibu basombe kudi nyunyi ya kasonga-mule. Nembutule bionsu. Meme Maweja-Nangila, ndi njadika nanku.”

Kabakukengesha kabidi bantu to

²⁴ Maweja-Nangila muena bukole buonsu, mmuditshipe, wamba ne: “Bushuwa, tshionsu tshindi muele meji netshienzeke, tshionsu tshindi mushindike netshikumbane!

²⁵ Nenyangakaje bukole bua bena Ashure, mu buloba buanyi meme. Nembudiatakaje pa mikuna yanyi. Nenjikije tshinyangu, tshidibu banyanga natshi bantu banyi. Nengumushe bujitu bunene, budibu babambuishe.”

²⁶ Ebi ke bivua Maweja-Nangila mujadike, bua kuenza pa buloba bujima. Ke mikanu idiye ukanyina matunga onsu.

²⁷ Padi Maweja-Nangila muena bukole buonsu muangate dipangadika, udi mua kumukandika, bua kukumbajaye tshidiye muele meji nnganyi? Padiye musue kunyoka muntu, udi mua kumbusha dinyoka adi nnganyi?

Mvidi Mukulu udi ukanyina bena Peleshete

²⁸ Mu tshidimu tshia lufu lua mukalenga Akaze, Mvidi Mukulu kutuma muambi Yeshaya ne mukenji, wamba ne:

²⁹ Nuenu bonsu bena Peleshete, kanusanki bua padi bena Ashure, bavua banukengesha, kabayi kabidi ne bukole. Bualu kudi nyoka mufuile, nekupatuke munga nyoka, mupite wa kumpala ku lulengu. Diyi diende neditoye, nyoka wa kasanga-muma.

³⁰ Bena dikenga nebikale ne biakudia, bu bana ba mikoku badi badia bimpe mu mpata. Bapele nebalale talalaa, kabayi ne lutatu. Kadi nuenu bena Peleshete, baluishi benu nebanubutule ne nzala. Nebashipe bana benu badi bashala ne muoyi.

³¹ Nuenu bena bimenga bidibu bakoleshe ne bimana, dilayi muadi, elayi mbila mikole. Bena Peleshete bonsu kabena mua kutekemena kabidi tshia nsongu. Baluishi badi bafuma luseke lua ku mutu kua ditunga, bafuane divuba dia muinshi. Baluishi bonsu badiku, muena mvita nansha umue kena mushale to.

³² Bantu badi bena Peleshete batume, tubandamune tshinyi? Tubandamune ne: — Maweja-Nangila nkayende mmuase Siyone. Ke muaba udi bapele bende baye kusokomena.