Sefanya 2 - MUKANDA WA MYIDI MUKULU

Nupingane kudi Maweja-Nangila

¹ Nuenu badi kabayi ne bundu, elayi meji bimpe, nudikonke, nudilengeje,

² kanuyi banji kutangalaka, mudi bisote bitangalaka dituku dimue. Nukudimune mioyi yenu, tshiji tshia Maweja-Nangila tshikuata kapia katshiyi tshianji kufika kunudi, dituku didiye ulumbuluisha bantu kadiyi dianji kusemena pabuipi.

³ Nuenu bantu bapuekele bonsu ba mu ditunga, badi batumikila mikenji yende, pinganayi kudi Maweja-Nangila. Kumbajayi tshidiye musue, inyikayi mitu yenu kumpala kua Maweja-Nangila Mvidi Mukulu. Nanku dituku didi Maweja-Nangila ufika munda, bumue kena ununyoka nansha.

Maweja-Nangila nealumbuluishe bisamba bia ku luseke ludi diba dibuelela

⁴ Ngaza neashale dikolu. Askalone neabutuke. Badi basomba mu Asdode, nebabipate munda munya. Nebumushe bena Ekrone mu tshimenga tshiabu.

⁵ Nuenu badi bafumine ku Kaftore, basombe ku muelelu wa mayi manene, nudi bena diakabi! Maweja-Nangila udi wamba ne: “Wewe Kenaane, ditunga dia bena Peleshete nenkunyangakaje. Neushale munda mutupu.

⁶ Buloba buebe ku muelelu wa mayi manene, nebuandamuke mpata wa bisosa, nebushale muaba udi balami ba mikoku bendakana, ne udibu bateka bikumbi biayi.”

⁷ Bena Yuda badi bashale ne muoyi, nebakuate ditunga dienu. Nebadishilemu bisumbu bia nyama yabu. Butuku nebaye kulala mu nzubu ya mu Askalone. Maweja-Nangila Mvidi Mukulu wabu neabenzele bimpe, neakudimune dikenga diabu, dienza disanka.

Maweja-Nangila nealumbuluishe bisamba bia ku luseke ludi diba dipatukila

⁸ Maweja-Nangila udi wamba ne: “Mvua mumvue bena Mowabe ne bena Amone, baseka bantu banyi, babapetula. Bayua babapenda, bamba ne: netununyenge buloba buenu, bua kudiundisha buetu.

⁹ Meme Maweja-Nangila wa bukole buonsu, Mvidi Mukulu wa bena Izrayele, ndi nditshipa ne: bu mundi ne muoyi, ndi njadika bulelela ne: nebabutule ditunga dia bena Mowabe ne dia bena Amone, bu muvuabu babutule tshimenga tshia Sodome ne tshia Ngomore. Buloba buabu nebushale tshipela tshiendelele. Nemuikale amu meba ne bina bia luepu. Bantu banyi badi bashale ne muoyi, nebafike bua kubapawula, ne bua kukuata ditunga diabu.”

¹⁰ Ke muakabanyokabu, bualu bavua baditambisha, bapenda bantu ba Maweja-Nangila wa bukole buonsu, bamba ne: netununyenge buloba bua kudiundisha buetu.

¹¹ Maweja-Nangila neabakuatshishe bowa. Neabutule nwidie yonsu ya pa buloba. Diba adi, bantu bonsu, nansha badi basomba kule kupite, nebamutendelele, muntu yonsu muaba udiye usomba.

Maweja-Nangila udi ulumbuluisha bisamba bia kuinshi ne bia ku mutu muditunga

¹² Maweja-Nangila udi wamba ne: “Nuenu kabidi bena Kushe, nennushipeshe mu nwita.”

¹³ Maweja-Nangila neanyoke kabidi badi ku mutu kua ditunga. Neabutule bena Ashure, neashidishe bena Ninive. Tshimenga atshi netshishale tshipela, kamuyi muntu.

¹⁴ Muaba uvua tshimenga, bisumbu bia nyama nebilalemu, kabidi ne nyama mikuabu ya mishindu yonsu: tshipungulu ne kakutukutu nebisombe mu mitu ya makunji a nzubu. Nebumvuile miadi ya nyunyi ku madidishi a nzubu. Tshikolokolu netshimueneke ku tshibuelelu. Mabaya a sedre avuabu balamike ku bimana, nebaalamune ku bukole.

¹⁵ Ke muikala tshimenga etshi tshivua tshiditambisha. Badi basombamu bavua bela meji ne: dikenga kadiena mua kutukuata. Badi mua kuambangana netu mbanganyi? Lelu tshimenga tshidi tshienda tshibutuka. Tshikadi muaba udi nyama ya lonji ilala! Bonsu badi basemena pabuipi natshi, badi batshiela bibingu, batshiseka.