Rute 4 - MUKANDA WA MYIDI MUKULU

Bowaze udi upiana bintu bia Elimeleke

¹ Bowaze kuya ku tshibuelelu tshia musoku, muaba udi bantu basombela bua kuyukidilangana. Kumonaye muanabu uvuaye muambe ne: ke udi mua kupiana Rute, upita mu njila. Bowaze kumuimanyika, kumubikila muaba uvuaye awu, wamba ne: — Muanetu, sombela apa. Awu kusomba.

² Ke Bowaze kubikila bantu dikumi ba ku bakulu ba musoku, kubalomba bua kusombabu. Bobu kusomba muaba awu.

³ Pashishe Bowaze kuambila muanabu awu ne: — Nowemi mmumane kupingana kunu, utumina ku ditunga dia Mowabe, udi usumbisha budimi bua muanetu Elimeleke abu.

⁴ Ke pandi mukubikile bua kukumanyisha ne: udi mua kusumba budimi kumpala kua bena ditunga ne kua bakulumpe bonsu badi basombe aba. Kadi pawikala mubenge, ungandamune, bua mmanye tshindi mua kuenza, bualu amu wewe ke udi malu aa onsu atangila, meme ewu ndi mvua panyima pebe. Muntu awu kuandamuna ne: — Ndi musue kusumba budimi.

⁵ Ke Bowaze kumuambila ne: — Paudi usumba budimi bua mufue kudi Nowemi, udi upiana kabidi ne Rute, mukaji wa mufue, bua kulelela mufue bana, ne bua budimi bushale mu dina dia bana abu.

⁶ Muanabu umvua nanku, kubengaye wamba ne: — Tshiena mua kusumba budimi abu, ne kupiana mukaji wa mufue to, bualu nemvue kupanga mua kuabanya bia bumpianyi munkatshi mua bana banyi ne ba mufue. Wewe jikija malu onsu pa mutu panyi meme.

⁷ Ku kale, bena Izrayele, pavuabu bashintakajangana bintu, nansha pavuabu basumbishangana, muntu wa kumpala udi usumbisha tshintu, uvua ukopola tshisabata tshiende, upesha mukuabu bua kujadika diumvuangana diabu.

⁸ Nanku, muanabu mumane kuambila Bowaze, bua asumbe budimi abu, kukopolaye tshisabata tshiende, kutshipeshaye Bowaze.

⁹ Pashishe Bowaze kuambila bakulu, bavuaye mubikile, ne bantu bonsu bavua muaba awu ne: — Lelu, nuajadiki mundi nsumba bintu bionsu bia Elimeleke, ne bia bana bende ba balume aba: Malone ne Kiliyone, kudi Nowemi.

¹⁰ Ndi mpiana kabidi Rute, muena Mowabe, uvua mukaji wa Malone, udi ushala mukajanyi. Nanku bintu nebishale mu dina dia mufue. Nanku dina diende kadiakujimina. Nebashale baditela mu bisombelu ne mu diabu ditunga.

¹¹ Bantu bonsu bavuaye mubikile muaba awu, ne bakulu, kuambabu ne: — Eyowa, tuajadiki. Maweja-Nangila ele mukaji awu lupemba, bu muvuaye muluele Rakele ne Leya. Bubidi buabu bawa batantshisha tshisamba tshia bena Izrayele. Wewe pebe, usanguke mu Efrata, dina diebe ditumbe mu Betleyeme.

¹² Maweja-Nangila akuvudijile bana ne mukaji ewu; diku diebe ditante bu dia Perese, uvua Yuda mulele ne Tamare.

Bowaze ne ndelanganyi yende

¹³ Nanku Bowaze kupiana Rute. Maweja-Nangila kuela Rute lupemba, kuimitaye, kulela muana wa balume.

¹⁴ Ke bakaji bonsu kutumbisha Mvidi Mukulu, bambila Nowemi ne: — Maweja-Nangila wakupeshi muikuluebe udi mua kukuvuluka. Dina diende ditumbe mu Izrayele! Bu mudiye mukusangule, neakuame bimpe mu bukulakaja buebe.

¹⁵ Mukaji wa muanebe udi mukunange, mukupeshe muana. Nanku mmupite ne bana ba balume muanda mutekete.

¹⁶ Nowemi kukongoloja muana bimpe, kushala ndeji wende.

¹⁷ Bakaji bena mutumba kutendakena muana, bamba ne: “Baleledi Nowemi muana!” Kumuinyikabu dina ne: Obede. Yeye ke tatuende wa Ishayi. Ishayi ntatuende wa Davide.

Mena a bankambua ba Davide

¹⁸ Mena a bankambua ba Davide, biangatshile kudi Perese, mmalondangane nenku: Perese uvua tatuende wa Esrone.

¹⁹ Esrone uvua tatuende wa Rame, Rame kulela Aminadabe,

²⁰ Aminadabe kulela Nashone, Nashone kupeta Salma,

²¹ Salma kulela Bowaze. Yeye ewu kulela Obede,

²² Obede kulela Ishayi, Ishayi kulela Davide.