Rome 7 - MUKANDA WA MYIDI MUKULU

Tshilejilu tshia mu dibaka

¹ Bana hetu, nenumvue bimpe bindi musue kunuambila, bualu nudi bantu badi bamanye mikenji. Nudi bamanye ne: mikenji idi ne bumfumu pambidi pa muntu, amu patshidiye ne muoyi panu.

² Tuangate tshilejilu tshia mukaji musela. Mikenji idi imusuikakudi bayende, amu patshidi mulume ne muoyi. Kadi padi bayende ufua, mukaji udi usuluka ku mikenji ivua mimusuike kudi bayende.

³ Nanku patshidi bayende ne muoyi, yeye muye kudi mulume mukuabu, nebambe ne: mukaji awu mmuena tshiendenda. Kadi bayende mumane kufua, mmusuluke ku mikenji. Udi mua kuya kudi mulume mukuabu, kabayi bamuamba ne: mmuena tshiendenda.

⁴ Bana hetu, bidi bia momumue kabidi buenu nuenu. Nudi bafue ku bidi bitangila mikenji, bualu nudi badisange mu mubidi wa Kristu. Mpindiewu nudi bantu ba muntu mukuabu, ba muntu uvua mubike ku bafue, bua tukuatshile Mvidi Mukulu midimu idi imusankisha.

⁵ Bualu patutshivua tuenza malu adi buntu buetu bujinga, bijingajinga bia kuenza malu mabi, bidi mikenji ijula, bivua bikuata mudimu munda muetu muonsu, bitufikisha ku lufu.

⁶ Kadi mpindiewu, mbatupikule ku mikenji. Bualu tuvua bafue ku mikenji ivua mitukuate, mitujingile mu nkanu. Nanku tudi mua kukuatshila Mvidi Mukulu mudimu mushindu mupiamupia ku bulombodi bua Mueyelu wa Tshijila. Katumukuatshidi kabidi mudimu muetu mua kale ku bulombodi bua bivuabu bafunde mu mikenji.

Mikenji ne bubi

⁷ Kadi tshitudi mua kuamba kabidi ntshinyi? Mikenji idi mulongu umue ne bubi anyi? Nansha kakese! Kadi mikenji ivua mimmanyishe mudi bubi. Bualu tshivua mua kujingulula mudi lukuka, bu mikenji kayiyi miambe ne: “Kualakanyi to.”

⁸ Bubi kupetela njila ku mikenji, bua kujula munda muanyi majinga a mishindu yonsu. Bualu kakuyi mikenji, bubi ntshintu tshifue.

⁹ Kale mvua ne muoyi, bualu mikenji kayivuaku. Kadi pafiki meyi ne mikandu, bubi kutuadija.

¹⁰ Ke meme kufua. Meyi ne mikandu bivua ne bua kumpetesha muoyi. Kadi kumfikishabi ku lufu.

¹¹ Ke meyi ne mikandu kupetesha bubi njila, bua bubi bundenduishe, bumfikishe ku lufu ku meyi ne mikandu mene abi.

¹² Nenku mikenji idi ya tshijila. Meyi ne mikandu bidi bia tshijila. Bidi bimpe, bitufundila bidi Mvidi Mukulu musue.

¹³ Kadi tshintu tshimpe tshidi mua kumpetesha lufu anyi? Nansha kakese! Amu bubi ke budi bunkebela lufu. Buvua budimuenesha mudibu bubi menemene. Buvua bubuela mu tshidi tshimpe, bua kunkebela lufu. Ke muvua bubi budileja bu bualu bubi menemene, bualu bua meyi ne mikandu.

Muntu udi mu mvita

¹⁴ Tudi bamanye ne: mikenji mmifume kudi Mueyelu wa Mvidi Mukulu. Kadi meme ndi muena butekete, udi bubi busumba bu mupika wabu.

¹⁵ Tshiena mujingulule bindi ngenza to. Bualu tshiena ngenza bindi musue kuenza. Kadi ndi ngenza bindi mbenga.

¹⁶ Pandi ngenza bindi tshiyi musue kuenza, ndi ngitaba ne: mikenji mmimpe.

¹⁷ Nanku udi ubienza ki mmeme to, kadi bubi budi munda muanyi.

¹⁸ Bualu ndi mumanye ne: bidi bimpe kabiena bisomba munda muanyi, nkuamba ne: mu buntu buanyi butekete. Bualu nansha dijinga dia kuenza bimpe dikale munda muanyi, tshiena ne bukole bua kudikumbaja.

¹⁹ Tshiena ngenza bimpe bindi musue. Kadi ndi ngenza bibi bindi tshiyi musue.

²⁰ Pandi ngenza bindi tshiyi musue, nanku udi ubienza ki mmeme to, kadi mbubi budi busomba munda muanyi.

²¹ Nanku ndi mumone mudi bionsu bilonda njila ewu: pandi musue kuenza bimpe, ndi amu ne bukole bua kuenza bibi.

²² Mu kondu kanyi ka munda, ndi nsanka bua mikenji ya Mvidi Mukulu.

²³ Kadi mu bindi ngenza ndi mpeta mukenji mukuabu, udi uluangana ne mukenji udi muoyi wanyi musue. Mukenji mukuabu awu udi ungela mu lukanu, bua ngikale mu bindi ngenza mupika wa bubi budi munda muanyi.

²⁴ Ndi muena dikasa dibi. Udi mua kunsulula ku mubidi ewu udi umfikisha ku lufu nnganyi?

²⁵ Tuelayi Mvidi Mukulu tuasakidila, bualu Yeye mmuenze nanku kudi Mfumu wetu Yezu Kristu. Nanku ndi nkuatshila mikenji ya Mvidi Mukulu mudimu ne lungenyi luanyi. Kadi mu bindi ngenza ne buntu buanyi butekete, ndi mupika wa mikenji ya bubi.