Rome 15 - MUKANDA WA MYIDI MUKULU

Kanudisankishi amu nuenu nkayenu

¹ Tuetu badi bakole mu ditaba, tudi ne bua kuambuluisha badi batekete mu ditaba diabu. Katuena panu bua kukeba amu bidi bitusankisha tuetu.

² Kadi yonsu wa kutudi akebe mua kusankisha muntu nende, amuenzele malu mimpe, bua kumukolesha mu ditaba.

³ Bualu Kristu kavua musombe panu, amu bua kukeba bivua mua kumusankisha yeye nkayende. Ke padi Mukanda wa tshijila wamba ne: “Padibu bakupenda, badi bampenda ne meme.”

⁴ Nenku bionsu bitudi tubala mu Mikanda ya tshijila mbabifunde bua kutulongesha. Mikanda ya tshijila idi kukolesha ku muoyi, bua tunanukile, tupete bitudi tutekemena.

⁵ Mvidi Mukulu, mpokolu wa dinanukila ne wa disambangana, anupe kabidi diumvuangana dilelela, bua nulonde tshilejilu tshia Yezu Kristu,

⁶ bua bonsu pamue, kabidi ne diyi dimue, nutumbishe Mvidi Mukulu, Tatu wa Mfumu wetu Yezu Kristu.

Lumu lua Disanka ludi bua bisamba bionsu

⁷ Nenku akidilanganayi, muvua Kristu numuakidile, bua Mvidi Mukulu apete lumu.

⁸ Bualu ndi nnujadikila ne: Kristu mmudienze muena mudimu wa bena Yuda, bua kukumbaja malaya avua Mvidi Mukulu muambile bankambua babu, kabidi bua kuleja nanku mudi Mvidi Mukulu wa diyi dimue.

⁹ mMufike kabidi bua bantu ba bisamba bikuabu batumbishe Mvidi Mukulu bua luse luende. Ke padi Mukanda wa tshijila wamba ne: “Ke pandi nkutumbisha munkatshi mua bisamba bikuabu, nsaka misambu ya kutumbisha nayi dina diebe.”

¹⁰ Udi wamba kabidi ne: “Nuenu bena bisamba bikuabu, tuayi tshianga pamue ne bena tshisamba tshia Maweja-Nangila!”

¹¹ Udi wamba kabidi ne: “Nuenu bena matunga onsu, tumbishayi Maweja-Nangila. Bisamba bionsu bimusamune!”

¹² Yeshaya kabidi udi wamba ne: “Muntu wa ku ndelanganyi ya Ishayi neafike, neajuke bua kulombola matunga. Bisamba bionsu nebimutekemene amu yeye.”

¹³ Bu munudi nuitaba Mvidi Mukulu, udi utupa ditekemena, anuwuje kabidi ne disanka, kabidi ne bupole tshishiki, bua ditekemena dienu diye amu kumpala ku bukole bua Mueyelu wa Tshijila.

Polu udi ne bumfumu bua kubatumina mukanda ewu

¹⁴ Bana hetu, meme mene ndi mushindike ne: nudi bena muoyi muimpe. Nudi bamanye bionsu binudi ne bua kumanya. Nudi ne bukole kabidi bua kubelangana nkayenu.

¹⁵ Kadi miaba mivule mu mukanda wanyi ewu, mvua munufundile ne dikima, bua kunuvuluija binuvua bamane kulonga. Mvua munufundile nanku, bualu Mvidi Mukulu uvua mumpeshe dipa,

¹⁶ dia meme kuikala muena mudimu wa Yezu Kristu bua bisamba bikuabu. Ndi nkumbaja mudimu wa tshijila wa mutuangaji ewu, pandi ndongesha Lumu lua Disanka lua Mvidi Mukulu, bua Mueyelu wa Tshijila ujidile bantu ba bisamba bikuabu, bikale bu mulambu udi ulengelela Mvidi Mukulu.

¹⁷ Nanku ndi ndisanga ne Kristu, nditemba bua mudimu wanyi undi nkuatshila Mvidi Mukulu.

¹⁸ Bualu meme musue kutela bualu kampanda, ndi ngamba amu bivua Kristu muenze kundi, bua kufikisha bantu ba bisamba bikuabu ku ditumikila Mvidi Mukulu. Uvua muenze nanku ku bimvua muambe, ne ku bimvua muenze,

¹⁹ ku bukole bua bishima ne bua malu a dikema, kabidi ne ku bukole bua Mueyelu wa Tshijila. Ke mumvua mulongeshe muanyi muonsu Lumu lua Disanka ludi lutangila Kristu. Mvua muendakane nseke yonsu, kutuadijila mu Yerushalayime, too ne ku buloba bua Iliriya.

²⁰ Kadi mvua musue kumanyisha Lumu lua Disanka amu miaba ivuabu kabayi banji kumvua batela Kristu. Tshivua musue kuibaka pa bitaku bivua muntu mukuabu muase.

²¹ Ke mumvua musue kukumbaja bidi Mukanda wa tshijila wamba ne: “Bantu bavuabu kabayi bamanyishe bualu buende, nebamumone. Bavua kabayi bumvua bamutela, nebamumvue.”

Polu udi musue kuya ku Rome

²² Ke bivua bimpumbishe misangu mivule bua meme kufika kuenu aku.

²³ Kadi mpindiewu ndi mujikije mudimu wanyi mu matunga aa. Kukadi bidimu bivule bindi njinga kumonangana nenu.

²⁴ Mvua musue kupitshila kuenu, pakumbana luendu luanyi lua kuya ku Espanye. Bualu ndi ntekemena kufika kuenu mu luendu alu bua kumonangana nenu. Ndi musue kushala nenu amue matuku, njinga kabidi bua nungambuluishe, bua mmone mua kufika ku ditunga dia Espanye.

²⁵ Kadi mpindiewu ndi nganji kuya ku Yerushalayime, bua kuambuluisha Tshisumbu tshia bena ditaba badi kuaka.

²⁶ Bualu bena ditaba ba mu Masedoniya ne ba mu Akaya bavua bapangadika bua kusangisha makuta, bua kuambuluisha bakengi ba mu Tshisumbu tshia bena ditaba badi mu Yerushalayime.

²⁷ Bavua badijadikile bualu ebu nkayabu. Kadi bulelela bavua ne bua kuambuluisha bakengi aba. Bualu bena ditaba ba bena Yuda ba ku Yerushalayime bavua babanyangana ne bantu ba bisamba bikuabu ditaba diabu. Nanku bantu ba bisamba bikuabu badi ne bua kubambuluisha, kuabanyangana nabu bintu bia panu bidibu nabi.

²⁸ Pangikala mujikije mudimu ewu, mumane kubapesha makuta avuabu basangishe, nentungunuke ne luendu bua kuya ku Espanye. Nanku mu luendu alu nempitshile kuenu.

²⁹ Ndi mumanye ne: ku difika dianyi kuenu, Kristu neanuele lupemba muende muonsu.

³⁰ Kadi, bana hetu, ndi nnulomba ne: mu dina dia Mfumu wetu Yezu Kristu, ne ku bukole bua dinanga didi Mueyelu wa Tshijila utupa: luanganayi nanyi. Nutendelele, nundombele kudi Mvidi Mukulu.

³¹ Nulombe bua mmone mua kuepuka ku bianza bia bena muoyi mupape badi mu Yudeya; kabidi bua bena ditaba badi mu Yerushalayime banyishe bintu bindi mubatuadile.

³² Ke mundi mua kufika kuenu ne disanka divule, pikala Mvidi Mukulu musue. Nenganji kuikisha kuenu aku, muaba unudi.

³³ Mvidi Mukulu, udi ufila bupole, ikale nenu bonsu. Amene.