Rome 14 - MUKANDA WA MYIDI MUKULU

Kulumbuluishi muanenu

¹ Nuakidile bimpe udi mutekete mu ditaba. Kanuedianganyi nende mpata, bua kupetula meji ende.

² Tudi mua kuteka tshilejilu: muntu mukuabu udi witaba ne: ndi mua kudia tshintu tshionsu. Kadi mukuabu, udi mutekete mu ditaba, udi udia amu bisakisaki.

³ Muntu udi udia bintu bionsu, kena ne bua kupetula udi kayi udia bintu bikuabu. Nanku udi kayi udia bintu bikuabu, kena ne bua kulumbuluisha udi udia bionsu, bualu Mvidi Mukulu uvua mumuanyishe.

⁴ Wewe kabidi udi nganyi bua wewe kulumbuluisha muena mudimu wa bende? Bualu, nansha yeye ukuatshila mfumuende mudimu ne dinanukila, nansha yeye mupangile mu njila, tshilumbu atshi tshidi amu tshia mfumuende wa mudimu. Kadi neakuate mudimu ne dinanukila, bualu Mfumu udi ne bukole bua kumuimanyika.

⁵ Mukuabu udi wela meji ne: manga matuku adi manene mapite makuabu. Kadi munga udi wela meji ne: matuku onsu adi momumue. Kadi muntu yonsu ajadike bimpe meji adiye nawu.

⁶ Udi mumone ne: dituku kampanda ndinene dipite dikuabu, udi wenza nanku bua kunemeka Mfumu. Udi udia bionsu, udi ubidia bua kunemeka Mfumu, bualu udi wela Mvidi Mukulu tuasakidila padiye udia. Udi kayi udia bionsu, udi wenza nanku bua kunemeka Mfumu. Yeye kabidi udi wela Mvidi Mukulu tuasakidila.

⁷ Bualu kakuena muntu wa kutudi nansha umue udi ne muoyi amu bualu buende yeye nkayende. Kakuena udi ufua buende yeye nkayende. Patudi ne muoyi, tudi ne muoyi bua Mfumu.

⁸ Nansha tufua, tudi tufua amu bua Mfumu. Nanku nansha tuetu ne muoyi, nansha tufua, tudi ba bende ba Mfumu.

⁹ Bualu Kristu mmufue, mubike kabidi ku lufu, bua ikale Mfumu wa bafue ne wa badi ne muoyi.

¹⁰ Kadi wewe, udi ulumbuluisha muanenu bua tshinyi? Wewe mene udi upetula muanenu bualu kaayi? Tuetu bonsu netuimane kumpala kua Mvidi Mukulu, bua atulumbuluishe.

¹¹ Bualu Mukanda wa tshijila udi wamba ne: “Meme, Maweja-Nangila udi ne muoyi, ndi njadika ne: bantu bonsu nebatue binu kumpala kuanyi. Bonsu nebantumbishe, bajadika ne: ndi Mvidi Mukulu.”

¹² Nenku yonsu wa kutudi neadilumbuluile nkayende kudi Mvidi Mukulu.

Kulenduishi muanenu to

¹³ Nanku tulekelayi kulumbuluishangana. Tshinudi ne bua kulekela kuenza ngetshi: kanuenji bualu nansha bumue budi mua kulenduisha muanenu, nansha kumufikisha ku bubi.

¹⁴ Ndi mumanye, mushindike menemene ne: patudi bamane kudisanga ne Mfumu Yezu, kakuena tshintu tshidi tshibi tshiotshi nkayatshi. Kadi amu padi muntu wela meji ne: tshintu etshi ntshibi, nanku tshidi tshibi kudiye.

¹⁵ Paudi ubungamija muanenu bua biudi udia, kuena ulonda njila wa dinanga nansha. Kuena mua kujimija muanenu, uvua Kristu mufuile, amu bua biudi udia nansha.

¹⁶ Bidi binulengelela nuenu, kabiena ne bua kulenduisha bakuabu nansha.

¹⁷ Bualu Bukalenga bua Mvidi Mukulu kabuena ku biakudia nansha ku biakunua. Kadi budi ku malu mimpe, ku bupole, ne ku disanka didi Mueyelu wa Tshijila utupesha.

¹⁸ Muntu udi ukuatshila Kristu mudimu mushindu ewu, udi usankisha Mvidi Mukulu. Bantu kabidi nebamuanyishe.

¹⁹ Nanku tukebayi bidi mua kufila ditalala, bidi mua kutushindamija pamue mu ditaba.

²⁰ Kubutudi mudimu wa Mvidi Mukulu, bualu bua biakudia. Bulelela, tudi mua kudia bintu bionsu. Kadi bidi bibi padi muntu udia tshintu kampanda bua kulenduisha muanabu.

²¹ Bidi bimpe kubenga kudia munyinyi, kubenga kunua maluvu, kuepuka bionsu, padibi mua kulenduisha muanenu.

²² Biudi witaba nkayebe mu bualu ebu, udilaminebi munda muebe kumpala kua Mvidi Mukulu. Muntu udi wenza bualu kampanda, kayi udiumvua ne: ndi muena tshibawu, mmuena diakalenga.

²³ Kadi udi udia biakudia, wela mpata, Mvidi Mukulu neamupishe padiye ubidia, bualu kena ulonda ditaba didiye nadi. Bualu buonsu budibu benza budi kabuyi bufuma ku ditaba didi muntu nadi, mbualu bubi.