Rome 12 - MUKANDA WA MYIDI MUKULU

Tukuatshile Mvidi Mukulu mudimu

¹ Bana hetu, padi Mvidi Mukulu muleje nanku mudiye utufuila luse, ndi nnusengelela bua nudifile kudiye bu mulambu udi ne muoyi, bu mulambu wa tshijila, udi umusankisha. Ke mushindu muimpe unudi ne bua kumutendelela.

² Kanulondi bidi bena panu benza. Kadi nuanyishe bua Mvidi Mukulu ashintulule meji enu onsu, bua nuikale bantu bapiabapia. Nenku nenujingulule bidi Mvidi Mukulu musue, bidi bimpe, bimulengelela, bidi biakane tshishiki.

³ Mu dina dia dipa didi Mvidi Mukulu mumpeshe ku luse luende, ndi nnuambila bonsu ne: kanuditembi bu bapite bakuabu nansha. Ikalayi ne lungenyi lua kalolu. Yonsu wa kunudi adiangate ne mushinga, bilondeshile mudiye muitabe Mvidi Mukulu.

⁴ Bualu mu mubidi wa muntu mudi bidimba bivule, bidi bikuata midimu mishilangane.

⁵ Momumue kabidi, nansha tuetu bavule, tudi amu tuenza mubidi umue, patudi tudisanga ne Kristu. Tudi tulamakana bonsu pamue bu bidimba bia mubidi umue.

⁶ Tudi ne mapa mashilangane. Tukuate nawu mudimu, bilondeshile bivua Mvidi Mukulu mupeshe muntu yonsu amu patupu ku luse luende. Padi muntu wa kutudi ne dipa dia kuambila bantu malu adi Mvidi Mukulu umumanyisha, udi ne bua kuenza nanku, bilondeshile ditaba didiye nadi.

⁷ Pikala mukuabu ne dipa dia kuambuluisha bantu, abambuluishe. Udi ne dipa dia kulongesha, udi ne bua kulongesha.

⁸ Udi ne dipa dia kukolesha bakuabu ku muoyi, abakoleshe. Udi ne dipa dia kupa bakuabu bilenga bidiye nabi, abipeshangane ne kalolu konsu. Udi ulombola, alombole ne muoyi muimpe. Udi wambuluisha bakengi, abambuluishe ne musangelu.

⁹ Udi ne dinanga, kikadi ne mpala ibidi. Abenge malu mabi, ananukile ne dienza dia malu mimpe.

¹⁰ Nanganganayi, mudi bana ba muntu umue banangangana. Nunemekangane ne disuminyina.

¹¹ Nukazamuke, nukuate mudimu, nulekele lulengu. Nukuatshile Mfumu mudimu ne muoyi wenu mujima, kabidi ne disuminyina.

¹² Ikalayi ne disanka bua ditekemena dinudi nadi. Ikalayi ne lutuulu panudi mu dikenga. Tendelelayi Mvidi Mukulu ne munanunanu.

¹³ Ambuluishayi bana benu ne bidibu bakengela. Akidilayi bimpe badi bafika ku nzubu yenu.

¹⁴ Badi banukengesha, nubalombele kudi Mvidi Mukulu bua abele lupemba. Numulombe bua abasankishe, kabatshipi nansha.

¹⁵ Sankayi ne badi basanka, nudile ne badi badila.

¹⁶ Umvuanganayi munkatshi muenu. Kanuditambishi to. Kadi nuanyishe midimu mishadile yonsu. Kanudiangatshi bu bena meji.

¹⁷ Kanupingajidi muntu bubi ku bubi. Nukebe kuenza malu mimpe kumpala kua bantu bonsu.

¹⁸ Nuenze muenu muonsu bua nusombe ne bantu bonsu mu ditalala, bilondeshile munudi numona ne: tudi mua kuenza nanku.

¹⁹ Balunda banyi, kanudisombuedi. Kadi nuanyishe amu bua Mvidi Mukulu aleje bantu tshiji tshiende. Bualu Mukanda wa tshijila udi wamba ne: “Meme Maweja-Nangila, nensombuele. Nembapingajile bubi buvuabu benze.”

²⁰ Mukanda wa tshijila udi wamba kabidi ne: “Padi muluishi webe ne nzala, umupeshe biakudia. Padiye ne nyota, umupe biakunua. Bualu paudi wenza nanku, nebikale bu makala atema kapia, audi unguija pa mutu wende.”

²¹ Kuanyishi bua malu mabi akupite bukole. Kadi watshimune ku dienza dia malu mimpe.