Nsumuinu 26 - MUKANDA WA MYIDI MUKULU

Bantu badi kabayi lungenyi

¹ Bu mudi mvula wa neje kayi mukumbanyine mu muvu wa minanga, nansha mvula wa mudimbi tshikondu tshidibu banowa bia pa madimi, ke mudi lumu kaluyi lukumbanyine muntu mupote.

² Bu mudi mushamusha ne kandindi bipapelela mulu kabiyi bikisha, ke mudi mulawu muela muntu kapayi bualu kauyi umukuata.

³ Badi batuuta kabalu ne lukodi, mpunde ne mukaba, nyima wa muntu mupote ne mulangala.

⁴ Kuandamunyi muntu mutshimbakane miaku ya bupote. Tshianana nenufuanangane nende.

⁵ Kudimuna muntu mutshimbakane bilondeshile mudiye, bua kadiumvu bu muntu wa meji.

⁶ Udi utuma muntu mutshimbakane ne mukenji, udi ububakana bu muntu udi udikosa nkayende makasa, bualu udi udikebela makenga.

⁷ Lusumuinu luela kudi muntu mutshimbakane kaluena ne bukole, mudi mikolu ya muena tuneke kayiyi nabu.

⁸ Kutumbisha muntu mutshimbakane kudi bu kuteka dibue dinene mu mukaba wa kuela nawu mabue.

⁹ Mushindu udi muntu mukuatshike maluvu upatula dieba dimutue mu tshianza, ke mudi muntu mutshimbakane ujanguluka ne lusumuinu.

¹⁰ Mfumu udi wangata muntu mutshimbakane yonsu ku mudimu, nansha muntu yonsu udi upita mu njila, udi wenzela bantu bonsu bibi.

¹¹ Muntu mutshimbakane udi upingana ku bupote buende, bu mudi mbua udiululula biluishi biende.

¹² Wewe musangane muntu udiamba mudiye muena meji, mbimpe kutekemena kudi mutshimbakane pa muntu pa kutekemena kudiye.

Muena lulengu

¹³ Muena lulengu utu wamba ne: “Tshiena mpatuka to; bualu ntambue udi mu njila, nyama wa lonji udi mu musesu.”

¹⁴ Tshiibi tshidi tshinyungulukila pa nkanu yatshi, muena lulengu udi ubungulukila mu bulalu buende.

¹⁵ Muena lulengu udi wela tshianza tshiende mu dilongu. Kadi udi upungila bua kutshituma mukana.

¹⁶ Muena lulengu udi mudimone muena meji mupite bantu muanda mutekete badi bandamuna ne lungenyi.

Nsumuinu mikuabu

¹⁷ Kubuelakana mu matandu adi kaayi ebe, kudi bu kukeba kukuata ku matshi a mbua udi upita mu njila.

^18-19 Muntu udi udinga mukuabu, pashishe umuamba ne: “Mvua ngela bilele,” udi bu muena mukupa udi ukupangana bikunyi bia kapia, mikete, nansha bintu bikuabu bia lufu.

²⁰ Padi nkunyi kayiyi kuiku, kapia kadi kajima. Padi muena mukosu mumane kumbuka matandu adi ajika.

²¹ Makala adi alama mbabula utema, nkunyi idi itemesha kapia muiku, muena mutoyi udi ujudija matandu.

²² Miaku ya lunsonge idi bu biakudia bilenga bidi bantu bupukila bua kudia.

²³ Miaku ya lubombu idi misokoke muoyi mubi, idi bu tshiamu tshitoke tshia mushinga mukole tshidi ne bikanganya, tshidibu balamika ku luesu lua diima.

²⁴ Muena lukinu udi wakula bualu buimpe usokoka muoyi wende mubi. Munda muende udi ukeba amu kudinga bantu.

²⁵ Nansha yeye muakule ne diyi dimpe, kumuitabi to. Bualu udi ne malu a kadiwu munda tente.

²⁶ Udi ne budimu bua kusokoka lukinu luende. Kadi bantu bonsu nebajingulule bubi buende.

²⁷ Udi umbuila mukuende dijimba neakulukemu. Dibue diudi ubunguluja nedikubungulukile pambidi.

²⁸ Udi ushiminyina muntu malu, udi umukina. Muena mpala ibidi udi ufila bantu ku kabutu.