Ngalate 5 - MUKANDA WA MYIDI MUKULU

Kanupinganyi mu bupika

¹ Kristu uvua mutupikule bua tuetu kudisunguila tshitudi basue. Nanku shindamenayi momu. Kanupinganyi mu bupika.

² Telejayi tshindi meme Polu nnuambila. Nuenu banyishe bua banuteke panshi, Kristu kena mua kunuambuluisha kabidi to.

³ Ndi nnushindikila tshiakabidi ne: muntu yonsu udi wanyisha bua bamuteke panshi, udi ne bua kukumbaja mikenji yonsu nkong.

⁴ Nuenu badi basue bua Mvidi Mukulu anubingishe bua panudi nulama mikenji, nudi babulukangane ne Kristu. Nudi babenge bua Mvidi Mukulu anunange.

⁵ Kadi tuetu ku bukole bua Mueyelu wa Tshijila, udi ukuata mudimu patudi tuitaba, tudi bindile, batekemene se: Mvidi Mukulu neatubingishe.

⁶ Patudi badisange ne Kristu, nansha batuteke panshi, nansha kabayi batuteke, kabiena ne bualu. Tshikole tuitabe, tuleje ditaba dietu mu nsombelu wetu mujima pa kunangangana.

⁷ Nuvua babange luendu bimpe. Udi munuimanyike, bua kanulondi kabidi njila wa bulelela, nnganyi?

⁸ Bivua bantu abu banuambile bua nuitabe, kabivua bifuma kudi Mvidi Mukulu udi unubikila nansha.

⁹ Ke padibu bamba ne: “Buanga bua mampa bukese budi butuntumija tshitapitapi tshionsu.”

¹⁰ Kadi bu mutudi badisange nenu mu Kristu, ndi amu mumanye ne: nudi ne meji a momumue ne anyi. Kadi muntu udi unupambula, ne nganyi ne nganyi, Mvidi Mukulu neamunyoke.

¹¹ Bana hetu, meme mutshikale mulongeshe bushuwa ne: badi ne bua kunuteka panshi, batshidi bankengesha bua tshinyi? Diba adi Lumu lua Disanka lua Kristu, mupopela pa mutshi mutshiamakane, lundi ndongesha, kaluvua mua kutonda muntu to.

¹² Ndi njinga se: badi bakeba kunupambula bayile kule: badipakule!

¹³ Bana hetu, Mvidi Mukulu mmunubikile, bua nudisunguile tshinudi basue kuenza. Tshiena musue kuamba ne: nudisunguile amu majinga mabi adi anusankisha mu buntu buenu. Kadi nunangangane, nuambuluishangane.

¹⁴ Bualu paudi “unanga muntu nebe, bu muudi mudinange,” udi ukumbaja mikenji yonsu.

¹⁵ Kadi panudi nusumangana, nusunsulangana, bu nyama ya lonji, nudimuke, tshianana nenubutulangane.

Mueyelu wa Tshijila unulomboie

¹⁶ Ndi nnulomba ne: nuanyishe bua Mueyelu wa Tshijila unulombole. Kanulondi majinga mabi a buntu buenu.

¹⁷ Majinga mabi adi abengangana ne bidi Mueyelu musue. Mueyelu udi ujinga bidi muoyi wetu mubi ubenga. Mueyelu ne majinga mabi bidi biluishangana. Ke munudi kanuyi mua kukumbaja bilenga binudi nujinga.

¹⁸ Kadi padi Mueyelu unulombola, mikenji kayena kabidi ne bualu kunudi.

¹⁹ Bantu bonsu mbamanye kudi majinga mabi atufikisha: ku buendenda, buenzavi, malu a bundu;

²⁰ ku ditendelela dia mvidie, ne ku majimbu; ku lukinu, matandu, lubabu, tshiiji, difuilakana mianzu, diabulukangana, ditapulukangana;

²¹ ku lukuka, bunuavi, budiavi, ne ku malu mabi makuabu. Bu mumvua munubele kale, lelu kabidi ndi nnuambila ne: badi benza malu a nanku, kabakupeta muaba mu Bukalenga bua Mvidi Mukulu.

²² Kadi bidi Mueyelu wa Tshijila upetesha ke dinanga, disanka, ditalala, lutulu, diyi dilenga, muoyi muimpe, diyi dimue,

²³ bupole, didikanda. Bushuwa, mikenji kayena ibengangana ne malu a nanku.

²⁴ Bantu ba Yezu Kristu mbashipe buntu buabu, babupopele pa mutshi mutshiamakane, pamue ne nkuka, ne majinga mabi abu.

²⁵ Bu muvua Mueyelu mutupeshe muoyi, utulombole kabidi mu nsombelu wetu.

²⁶ Kanuditambishi, katufikishanganyi munda, katutekedianganyi lubabu.