Nehemya 13 - MUKANDA WA MYIDI MUKULU

Nehemya udi ulongolola malu

¹ Mu tshikondu atshi, bavua babadila bantu bonsu mukanda wa mikenji ya Moshe. Dituku dikuabu kubalabu muaba uvuabu bafunde ne: Bena Amone, kabidi ne bena Mowabe, kabena mua kubuela mu tshisumbu tshia bantu badi batendelela Mvidi Mukulu to.

² Bualu kale bobu kabavua bakidila bena Izrayele, kabavua babapesha biakudia, nansha biakunua to. Kadi bavua bapesha Balaame mabuejila bua kutshipaye bena Izrayele. Anu Mvidi Mukulu wetu kuandamuna mitshipu ayi kuvuayi disanka.

³ Bena Izrayele bumvua anu miaku ya mu dibala adi, kujadikabu bua kumusha munkatshi muabu, muntu yonsu uvuakayi muena Izrayele.

⁴ Kadi matuku avua kumpala, bavua basungule mutuangaji Eliyashibe, bua akuate mudimu wa kutangila bibambalu bidi bilamika ku nzubu wa Mvidi Mukulu. Bu muvua Tobiya muanabu,

⁵ mutuangaji Eliyashibe kumulongoluela muaba mu tshibambalu tshinene, tshiyuabu bateka kuonsu eku milambu ya bintu bia mu madimi, musenga wa kamonya, bintu bia kukuata nabi mudimu mu nzubu wa Mvidi Mukulu, bintu bia ku milambu bivua bia batuangaji, ne tshia dikumi tshia ntete ya kuenza bukula, tshia mvinyo mupiamupia, ne tshia mafuta, tshivua bena Levi ne balami ba ku biibi ne bua kupeta.

⁶ Pavua malu awu menzeke, meme Nehemya tshivua mu Yerushalayime to. Mvua muye mu Babilone mu tshidimu tshia makumi asatu ne tshibidi tshia bukalenga bua mukalenga wa bakalenga Artashasta. Nanku, kunyima kua matuku, mukalenga kumanyisha bua meme

⁷ kupingana mu Yerushalayime. Meme kumona bubi buvua mutuangaji Eliyashibe muenze. Bualu uvua mupe Tobiya tshibambalu tshivua tshitangilangane ne mu lubanza lua nzubu wa Mvidi Mukulu.

⁸ Tshiji kunkuata tshikole. Meme kupaluisha bintu bionsu bia Tobiya bivua mu tshibambalu atshi.

⁹ Pashishe, meme kukombesha bimpe mu bibambalu abi, bua bapingajemu bintu bia kukuata nabi mudimu mu nzubu wa Mvidi Mukulu, bintu bia ku milambu, ne musenga wa kamonya.

¹⁰ Meme kumvua kabidi ne: bena Levi kabena bapeta bintu bivua bibafundila. Nanku bakavua bapingana ku madimi abu, balekela kuenza mudimu wa Mvidi Mukulu. Bena misambu pabu badi benza amu nanku.

¹¹ Meme kutandisha balombodi ba ditunga pa kumona banyisha bua bantu balekele mudimu wabu mu nzubu wa Mvidi Mukulu. Pashishe, meme kubikila bena Levi ne bimbi ba misambu. Meme kubambila bua batuadijilule midimu.

¹² Nanku, bena Yuda kufika tshiakabidi ne tshia dikumi tshia ntete ya kuenza bukula, tshia mvinyo mupiamupia, ne tshia mafuta, bua batshiteke mu mayeba avuabu bamane kulongolola.

¹³ Bua kulama mayeba aa, meme kusungula mutuangaji Shelemiya, Sadoke, mufundi, ne Pedaya, muana wa Levi. Bavua babambuluisha kudi Anane, muana wa Zakure, ne muikulu wa Mataniya. Bonsu abu bavua bamueneka bantu ba diyi dimue. Bavua ne mudimu wa kuabanyina bana babu bintu bia ku milambu.

¹⁴ “Eyi Mvidi Mukulu wanyi, uvuluke bionsu bindi muenze! Kupu muoyi malu onsu andi meme muenze ne muoyi umue, bua nzubu webe ne bua kulongolola ditendelela.”

¹⁵ Matuku awu, meme kumona mu ditunga dia bena Yuda, bakama tumuma tua mvinyo dituku dia Dikisha. Bakuabu bavua bame pa nyama ya mpunde ntete ya kuenza bukula, maluvu a mvinyo, tumuma tua mvinyo, tumuma tua mfiku, ne bintu bikuabu, bua kuya nabi mu Yerushalayime. Meme kubabela, dituku divuabu bapana bintu biabu.

¹⁶ Kabidi bena Tire bavua basombe mu Yerushalayime, bavua bafike ne minyinyi ya mu mayi, ne biakudia bikuabu, bua kubisumbisha bena Yerushalayime ne bena Yuda dituku dia Dikisha.

¹⁷ Meme kutandisha balombodi ba bena Yuda. Meme kubakonka ne: — Nudi bamanye bibi binudi nuenza anyi? Nudi nunyanga dituku dia Dikisha bua tshinyi?

¹⁸ Bankambua benu bavua benza bibi nenku. Ke pavua Mvidi Mukulu mutukengeshe tuetu ne tshimenga tshietu. Kadi nuenu panudi nunyanga dituku dia Dikisha, nudi nukebela bena Izrayele tshiji kudi Mvidi Mukulu.

¹⁹ Nanku, kutuadija ku musangu ewu, meme kutuma diyi bua binjile biibi bia Yerushalayime padi butuku buila, Dikisha kadiyi dianji kutuadija. Bavua mua kubiunzulula amu pavua Dikisha dijika. Meme kuteka bena mudimu banyi bakuabu ku biibi, bua kukandika bantu kababuedi mu tshimenga ne bintu bia kupana dituku dia Dikisha.

²⁰ Kadi bangenda mushinga ba bintu bishilangane bavua balala misangu mikuabu pa mbelu, pabuipi ne bimana bia Yerushalayime.

²¹ Meme kubatandisha, kubambila ne: — Nudi basombe ku mbelu ku bimana bia tshimenga bua tshinyi? Nuenu benza kabidi nanku, ndi nnuelesha mu lukanu. Kutuadija musangu awu, kabavua bafika kabidi dituku dia Dikisha.

²² Nanku, meme kuambila bena Levi, bua bumushe mikiya yabu, baye kulama biibi bia tshimenga, bua bantu banemeke dituku dia Dikisha. “Eyi, umvuluke Mvidi Mukulu wanyi, bua bualu ebu kabidi. Wewe udi muena dinanga, umfuile luse!”

²³ Mu tshikondu atshi kabidi, mvua mumone muvua bena Yuda basela bakaji ba bena Asdode, bena Amone nansha bena Mowabe.

²⁴ Bana babu bakuabu bavua bakula muakulu wa bena Asdode, bakuabu muakulu wa tshisamba tshikuabu tshia bantu benyi. Kadi kakuvua nansha muana umue uvua mumanye muakulu wa bena Yuda to.

²⁵ Meme kubatandisha, kubela milawu. Meme kutuuta bantu bakuabu, kubatula nsuki. Pashishe meme kubambila bua baditshipe kudi Mvidi Mukulu, bua kabaseleshi kabidi bana babu kudi bantu benyi. Kabidi kabaseledi babu bana bakaji ba bantu benyi. Bobu bine kabena mua kusela bakaji ba bantu benyi.

²⁶ Meme kubakonka ne: — Malu aa ki ngavua mafikishe Shelomu, mukalenga wa Izrayele, ku dienza bibi anyi? Munkatshi mua bisamba bia bende bionsu, kakuvua mukalenga mukuabu bu yeye to. Mvidi Mukulu uvua mumunange, mumuteke mukalenga wa bena Izrayele bonsu. Kadi bakaji ba bisamba bikuabu bavua bamufikishe ku dienza bibi

²⁷ Katuena basue kumvua kabidi munudi nuenzela Mvidi Mukulu bibi pa kusela bakaji ba bisamba bikuabu.

²⁸ Muana umue wa Yoyada, muikulu wa mutuangaji munene Eliyashibe, uvua musele muana wa Sanebalate, muena Orone. Ke pamvua mumuipate mu Yerushalayime.

²⁹ “Eyi, Mvidi Mukulu wanyi, vuluka kashidi muvuabu bapepeja nanku mudimu wa batuangaji, banyanga ndondu uuvua mutue ne batuangaji kabidi ne bena Levi.”

³⁰ Meme kumusha bantu benyi munkatshi mua bena Yuda. Meme kufundila batuangaji ne bena Levi meyi ne mikandu bua kulongolola mudimu wabu.

³¹ Meme kulongolola kabidi mudimu wa kufila nkunyi matuku avuabu bafunde, kabidi wa kufila milambu ya bintu bia tshianyi bia mu madimi. “Eyi Mvidi Mukulu wanyi, umvuluke, ungenzele bimpe.”