Nahume 2 - MUKANDA WA MYIDI MUKULU

¹ Nuenu bena ditunga dia Yuda, tangila muntu udi unuluila pa mikuna, bua kunumanyisha lumu lua disanka lua ne: tudi batshimune baluishi betu, tuapetshi bupole. Enzayi bibilu bienu bia kutendelela, tuadilayi Mvidi Mukulu binuvua bamulaye. Bualu muntu mubi uvua unukengesha awu, kena mua kubuela kabidi ne nwita mu ditunga dienu. Bukole buende bonsu mbujike.

² Nuenu bena mu tshimenga tshia Ninive, baluishi benu badi balua bua kunubutula. Bena nwita, lamayi tshimenga tshienu tshinuvua bakoleshe ne bimana, nutentekele ku njila, nudilongolole ku nwita, nusangishe bonsu badi bamanye mua kuluangana.

³ Bualu Maweja-Nangila ukadi upingajila ndelanganyi ya Yakobe diakalenga diabu. Udi upingajila bena Izrayele lumu luabu. Bualu Izrayele uvua bu budimi bua mvinyo, buvua bapawudi babutule, banyangakaje.

Badi bakuata tshimenga tshia Ninive, batshipawula

⁴ Baluishi mbamane kufika, bikale ne ngabu mikunze kunzuu. Mbavuale bilamba bikunze. Padibu bela mualu wa mvita, badi bafuna ne mafuma. Matempu abu adi akenka bu kapia.

⁵ Matempu adi aya ku nwita lubilu, apitshila mu misesu ne mu bisalu, bu nyama mitomboke. Adi akenka bu bimunyi bia kapia, apita lubilu lukole bu mipenya ya mvula.

⁶ Mukalenga wa Ninive, udi ubikila balombodi bende ba bena mvita. Kadi badi benda batetuka. Baluishi badi basemena ku tshimana tshia tshimenga, bakuate ngabu wabu bua kudisungidila.

⁷ Baluishi badi basakila biibi bia tshimenga, bidi bitangila ku misulu ya mayi. Padibi biunzuluka, diakamue badi babuela, bakuata nzubu wa mukalenga.

⁸ Badi bakuata lupingu lua nwidie mukaji, baya nalu. Bena mudimu bakaji bavua balulame, badi batua mikemu bu nyunyi ya nkutshi, badila, badikuma bianza pa tshiadi ne dibungama.

⁹ Kale bantu bavua ba bungi mu Ninive, mpindiewu badi banyemamu, bu mudi mayi apueka lubilu, padi nkila ubumbuka. Padibu bamba ne: “Pinganayi, pinganayi!” muntu nansha umue kena ukudimuka.

¹⁰ Pawulayi biamu bitoke bia mushinga mukole, pawulayi mpawungi! Mu tshimenga mudi bintu bia bungi, bia mushinga mukole, bia mishindu yonsu.

¹¹ Badi bapawula bintu, banyangakaja tshimenga, batshibutula! Bonsu kuteketa mu maboku, mikolu kukanka, mibidi kuzakala, mpala kutokoloka ne bowa.

Ninive udi bu nyama wa ntambue mutekesha

¹² Tshimenga tshia Ninive tshivua bu muaba, uvua nyama ya ntambue ilala, muaba uvuayi idisha bana bayi, kayiyi itshina tshintu.

¹³ Ntambue mulume uvua uya kukeba nyama, uyishipa, uyisunsula, uyituadila ntambue mukaji ne bana. Uvua uwuja tshidilu tshiende, ne minyinyi ya nyama ivuaye ukuata.

¹⁴ Maweja-Nangila wa bukole buonsu udi wamba ne: “Nuenu bena Ninive, nennunyoke, nengoshe matempu enu a mvita, ashale butu. Bansongalume benu nebafue mu mvita. Kanuakupawula bintu pa buloba kabidi. Bantu kabakuteleja diyi dia banudi nutuma.”