Nahume 1 - MUKANDA WA MYIDI MUKULU

¹ Mu mukanda ewu mudi malu avua Mvidi Mukulu mumanyishe muambi Nahume, wa mu musoku wa Elkoshe, bua kukanyina bena tshimenga tshia Ninive.

Mvidi Mukulu udi mufikile bena Ninive munda

² Maweja-Nangila Mvidi Mukulu wa mukawu, udi unyoka bantu badi bamubenga. Udi ne tshiji tshikole, udisombuela kudi baluishi bende, kayi ubafuila luse.

³ Maweja-Nangila kena ufika munda lukasa, udi ne bukole bupite. Kadi kena ubingisha muntu udi mupile. Padi Maweja-Nangila wenda, tshipepele tshikole tshidi tshijuka. Mavuba ke lupuishi ludiye ujula padiye wenda.

⁴ Udi ukanyina mayi manene, uuma. Udi ukamisha misulu yonsu. Mpata mimpe ya mu Bashane ne mitshi ya mu mukuna wa Karmele bidi bifuba. Bilongu bidi pa mukuna wa Lebanone bidi bipopoka.

⁵ Mikuna minene idi ikanka kumpala kuende, mikuna mikese idi itenkakana. Padi Mvidi Mukulu umueneka, buloba ne bonsu badi basombapu bidi bizakala.

⁶ Padiye mufike munda, udi mua kukandamana nnganyi? Padiye ne tshiji, udi mua kushala ne muoyi udiku anyi? Tshiji tshiende tshidi tshilambuluka bu kapia, mbuebue mene idi ipandika kumpala kuende.

⁷ Maweja-Nangila udi ne muoyi muimpe. Badi mu dikenga, badi mua kusokomena kudiye. Badi banyemena kudiye, udi ubalama bimpe,

⁸ nansha mu dikenga dikole dipite. Kadi udi ubutula baluishi bende, ubatuma mu kandondu ka bafue.

Malu adi Maweja-Nangila umanyisha bena Yuda ne bena Ninive

⁹ Nudi nutombokela Maweja-Nangila bua tshinyi? Yeye ke udi ubutula baluishi benu kashidi, kabayi mua kunukengesha tshiakabidi.

¹⁰ Nansha bobu banua maluvu bakuatshika basuikakana pamue bu tshipuka tshia meba a mingonga, nebapie babutuke bu bisosa biume.

¹¹ Bena Ninive, muntu mmufume mu tshimenga tshienu, udi musue kutombokela Maweja-Nangila, muntu udi ukeba kuenza bibi.

¹² Maweja-Nangila udi wambila bena Yuda ne: “Baluishi benu, nansha bikale ba bungi, bikale bilobu, nebabutuke, kakuyi kushala muntu. Mvua munukengeshe bikole, kadi tshiakunukengesha kabidi.

¹³ Ndi nnupikula mpindiewu, ku bupika bua baluishi benu, nkosa nkanu idibu banusuika.”

¹⁴ Nuenu bena mu tshimenga tshia Ninive, Maweja-Nangila udi ujadika ne: “Kanuakuikala ne ndelanganyi idi mua kunuinyika mena. Nembutule mpingu ya mitshi nansha ya biamu, idi mu nzubu ya nwidie yenu. Nennumbuile nkita, bualu kanuena ne mushinga ku mesu anyi.”