Muambi 9 - MUKANDA WA MYIDI MUKULU

¹ Nenku, meme kuela meji ku bionsu abi. Meme kujadika ne: bantu bakane ne bena meji badi mu tshianza tshia Mvidi Mukulu, kabidi ne bionsu bidibu benza. Bantu kabena nansha bamanye ne: mbabanange anyi mbabakine. Kabena mua kudianza kumanya bualu nansha bumue.

² Bidi nanku bua bantu bonsu, bua muntu muakane ne bua muntu mubi, bua muntu udi ne mikiya ne bua udi kayi nayi, bua udi utendelela Mvidi Mukulu ne udi kayi umutendelela, bua udi ulambula Mvidi Mukulu ne udi kayi umulambula milambu, bua muntu wa muoyi mukezuke ne muntu muena malu mabi, bua udi ulaya Mvidi Mukulu malaya ne udi kayi walaya.

³ Bantu bonsu badi mushindu umue. Ku ndekelu badi ne tshipeta amu tshimue. Bantu badi benza bibi, badi bajinga amu malu a butshimbakane. Kadi ku ndekelu kua bionsu nebafue.

⁴ Kadi amu muntu utshidi ne muoyi udi mua kutekemena. Nanku, mbua wa muoyi mmupite ntambue mufue.

⁵ Bualu bantu ba muoyi mbamanye ne: netufue. Kadi bafue bobu ki mbamanye kalu nansha kamue. Bafue kabena bindila kantu, bualu bakadi babapue muoyi.

⁶ Mbamane kujimina, dinanga diabu, nkinu yabu, ne mikawu yabu, mbijimine kabidi. Kabakubuelakana kabidi mu malu adi enzeka pa buloba to.

⁷ Nenku udie biakudia biebe ne disanka, unue maluvu ebe ne musangelu, bualu Mvidi Mukulu mmumane kuanyisha biudi wenza.

⁸ Matuku onsu uleje amu disanka, vuala bilamba bimpe, laba manananshi pa mpala.

⁹ Sanka ne mukajebe uudi munange, mu matuku makese adi Mvidi Mukulu mukulame ne muoyi panu. Ke difutu diudi mua kupeta panu bua ntatu iudi nayi pa buloba.

¹⁰ Ukuate mudimu, usanke ne bionsu biudi mua kupeta. Bualu ku bajangi kuwaya kabena benzaku mudimu, kabena belanganaku meji, kabena bamanya malu, kabena bela meji mene to.

Meji kaena ambuluisha muntu misangu yonsu to

¹¹ Ndi mumone kabidi malu a bungi pa buloba. Bena lubilu lukole kabatu bapita bantu bonsu mu diteta dia kunyema lubilu to. Badi batshimuna mu mvita kabena misangu yonsu bilobu nansha. Badi bimpe pa buloba ki mbena meji to. Badi bapeta biuma ki mbena lungenyi misangu yonsu to. Badi bapeta lumu ki mbadi bamanye malu to. Muntu yonsu udi mua kupeta dikasa dibi.

¹² Bualu muntu kena mumanye diba didi dikenga dimukuata to. Udi umona dikenga dimukuata mu mpukapuka, amu mudi mushipa upia ku bukondu nansha nyunyi uditua mu nsumba.

¹³ Ndi mumone kabidi bunga bualu budi butuleja bimpe bidi meji enza panu.

¹⁴ Kuvua tshimenga tshikese. Bantu bakese bavua basemu. Mukalenga munene kufika bua kutshiluisha. Uvua mutshijingile ne tshikulu tshiende bua kutshiluisha. Bena mvita bende bavua base biamu binene mua kushimbula nabi bimana bia tshimenga.

¹⁵ Muntu mupele wa meji uvua usomba mu tshimenga amu. Yeye ke uvua mua kusungidila tshimenga ku meji ende. Kadi muntu nansha umue kavua uvuluka mupele awu to.

¹⁶ Pa nanku, ndi njadika se: meji mmapite bukitu. Kadi bantu kabena bateleja mibelu ya muntu wa meji yeye muikale mupele. Badi bamupepeja.

¹⁷ Kadi bidi bimpe kuteleja muntu wa lungenyi udi wakula ne lutulu, pa mutu pa kuteleja mfumu udi wela mbila mu tshipangu tshia bantu batshimbakane.

¹⁸ Meji mmapite bia mvita. Kadi muena buenzayi umue udi mua kunyanga bilenga bidi meji atupetesha.