Muambi 4 - MUKANDA WA MYIDI MUKULU

Bantu badi bakengeshangana

¹ Meme kumona kabidi mudi bantu bakengeshangana mishindu yonsu pa buloba. Badibu bakengesha badi badila, kadi kakuena muntu nansha umue udi ubambuluisha! Badi babatatshisha ke badi ne bumfumu. Ke mudi muntu mukuabu nansha umue kayi mua kubambuluisha.

² Meme ndi ngamba ne: badi bamane kufua, badi ne diakalenga dipite dia batshidi ne muoyi.

³ Kadi, muntu uvuabu kabayi balele ke udi ne dikasa dimpe dipite, bualu kena mumanye malu mabi adi bantu benzelangane panu.

⁴ Meme kumona kabidi ne: bantu badi batata, bakuata mudimu bikole, bualu badi bumvua lubabu pa kumona bidi muena mutumba nabi. Biobi abi kabidi bidi amu patupu, bu kuipatangana ne lupepele.

⁵ Bushuwa, mupote udi kayi ukuata mudimu udi udifuisha ne nzala.

⁶ Kadi bidi bipite buimpe kuanji kuikisha pa mutu pa kukuata tshidimudimu katshiyi ne bua nsongu.

⁷ Meme kumona kabidi bualu bukuabu panu, budi kabuyi bumvuika to:

⁸ ke muntu udi amu nkayende, kayi ne mumuambuluishi, kayi mulele muana wa balume, kayi nansha ne muanabu wa balume. Kadi udi ukuata mudimu kayi wikisha to. Nansha yeye udikonka ne: undi mua kushila bindi mpeta ku mudimu wanyi ebi, tshiyi nsanka nabi nnganyi? Udi ukeba amu kukeba biuma bivule. Abi bidi amu patupu, kabidi ntshidimudimu tshia tshianana.

⁹ Nkaya ndutatu, babidi mbapite. Babidi badi bambuluishangana, badi bapeta tshipeta tshimpe ku mudimu wabu.

¹⁰ Padi umue udishinda, mukuabu udi umujula. Kadi tshienda nkaya mmuena diakabi. Padiye udishinda kena ne udi mua kumujula to.

¹¹ Padi babidi baladila pamue, badi bapeteshangana luya. Nkaya kena udipetela luya nansha.

¹² Muntu umue kena mua kutua nkanana, amu bantu babidi, kadi nangananga basatu. Bualu badi bamba ne: Tshipia tshia nshinga isatu katshiena mua kutuka to.

¹³ Mbimpe kuikala nsongalume mupele wa meji, pa mutu pa kuikala mukalenga wa ditunga udi mubule meji, ubenga mibelu.

¹⁴ Bualu nsongalume udi mua kupatuka mu lukanu kushala mukalenga, nansha yeye muikale muntu uvua ulomba tshia pa luse mu ditunga amu, pavua mukuabu mumane kubuela mu bukalenga.

¹⁵ Ndi mmona mudi bantu bonsu bafuilakana nsongalume ukadi upingana pa mutu pa mukalenga uvua mu nkuasa.

¹⁶ Bantu ba bungi badi bamulonda. Kadi yeye mumane kufua bantu kabakumuela kabidi tuasakidila bua bivuaye muenze nansha. Nanku ebi bionsu kabidi, bidi amu tshianana, bidi bu kuipatangana ne lupepele.

Kumpala kua Mvidi Mukulu, akula malu amu pa wowu

¹⁷ Ela meji bimpe bangabanga ne wewe kuya mu nzubu wa Mvidi Mukulu. Uyemu bua kuteleja, pa mutu pa kulambula milambu mushindu udi bantu bapote benza kabayi bamanye ne: tudi tuenza bibi.