Muambi 10 - MUKANDA WA MYIDI MUKULU

¹ Njiji mifue idi ibolesha kalangi kajima ka manananshi. Nenku butshimbakane bukese budi bunyanga meji ne lumu bidi muntu nabi.

² Muntu wa meji udi wenza malu mempe. Kadi mutshimbakane kena umvua bualu nansha bumue.

³ Padi mutshimbakane uya mu njila, bantu bonsu badi bamba ne: mmupale, bualu mmubule lungenyi.

⁴ Pikala mfumuebe mufike munda, kumbuki muaba uudi. Wewe mulame lutulu neakufuile luse bua bilema biebe biuvua muenze.

⁵ Nenku kudi tshilema tshindi mumone pa buloba, tshidi bamfumu benza.

⁶ Muntu mutshimbakane misangu mikuabu udi upeta muanzu munene. Kadi bena biuma badi bashala kabayi mianzu.

⁷ Ndi mmona bapika babanda pa tubalu, kadi bamfumu benda ku makasa bu bapika.

⁸ Muntu udi mumbule dijimba udi mua kuponamu, udi ubumbula tshimana badi mua kumusuma kudi nyoka.

⁹ Mumbudi wa mabue udi mua kutapika. Mupandi wa nkunyi udi ne njiwu pabuipi.

¹⁰ Padibu kabayi banoona tshisuyi tshidi katshiyi tshitue, amu muntu wa dikanda udi mua kuenza natshi mudimu. Nenku meji adi apetesha muntu tshipeta.

¹¹ Nansha wewe mumanye mua kutekesha nyoka, nenkuambuluishe ku tshinyi padi nyoka mumane kukusuma?

Kupitshi kuakula

¹² Padi muntu wa meji wakula, bantu badi basanka. Padi muntu mutshimbakane wakula, bantu badi badiwula.

¹³ Udi utuadija kuamba miaku ya tshianana, ujikija ne miaku mibi.

¹⁴ Muntu mupote udi wakula amu kuakula. Kadi muntu kena mumanye nansha kakese bidi ne bua kuenzeka kumpala kuetu eku. Wamuleja bienzeka panyima pende nnganyi?

¹⁵ Mudimu mukese udi upungija muntu mutshimbakane. Kena nansha mumanye mudiye mua kupeta njila wa kupingana mu tshimenga.

¹⁶ Ditunga didi ne mukalenga utshidi muana ne bamienampala basombele amu kudia, nditunga dia diakabi!

¹⁷ Kadi ditunga didi ne diakalenga padidi ne mukalenga wa mu diku dia bantu baneme, kabidi ne bamienampala badi basomba ku mesa amu pa diba kabayi bakuatshika maluvu, badia amu bua kukolesha mubidi.

¹⁸ Muntu udi ne lulengu kayi ulongolola nzubu, nzubu udi umupukila. Udi ulengulula mua kulongolola musaka wa nzubu wende, nzubu udi umata mayi.

¹⁹ Bantu baneme badi badia bua kusanka. Badi basangulaka padibu banua maluvu. Kadi amu badi ne biuma ke badi mua kupeta bionsu bidibu bakengela.

²⁰ Nenku kujanyi mukalenga nansha mundamunda muebe. Kujanyi mubanji, nansha wewe nkayebe mu nzubu webe wa bulalu. Bualu nyunyi wa kulu mmufuane mua kutangalaja miaku yebe, kubamanyisha biuvua wamba.