Muadi 1 - MUKANDA WA MYIDI MUKULU

Yerushalayime udi bu mukaji mukamba mulekela

¹ Eyi, monayi tshimenga etshi, tshivua kale ne bantu ba bungi, kabidi ne lumu lunene munkatshi mua bisamba bikuabu, tshidi mpindiewu bu mukaji mukamba! Kale, Yerushalayime uvua mukalenga mukaji, utumina bisamba bikuabu diyi. Lelu bisamba abi mbimukuate ku bupika.

² Yerushalayime udi udila utshisha butuku bujima, upuekesha binsonji pa matama. Ku bonsu bavua bamunanga, kamuena nansha umue utshidi umusamba. Balunda bende bonsu mbamubenge, bashale baluishi bende.

³ Tshisamba tshia Yuda tshidi mu dikenga. Mbaye natshi mu ditunga dia bende. Tshidi tshikuata mpindiewu midimu ya bupika. Tshidi munkatshi mua bantu ba bisamba bikuabu, tshipanga muaba wa kusomba. Bantu bavua batshipata, batshifimpakaja, mbatshikuate.

⁴ Njila idi ifumina ku Siyone idi ne madilu, bualu bantu kabena bafika kabidi ku bibilu bia disanka. Biibi bia Siyone bidi buashi. Batuangaji bende badi batua mikemu. Nsongakaji yende mmibungame. Malu onsu adi mamubipile!

⁵ Baluishi bende mbamupite bukole. Badi bamutshimuna mbasombe talalaa. Maweja-Nangila ke udi ukengesha Siyone, bualu malu ende mabi adi a bungi. Badi bamutshimune badi basaka bana bende, baya nabu mu bupika.

⁶ Siyone mmumane kujimija lumu luende luonsu. Balombodi ba mu bukalenga buende badi bu nyama ya ngulungu, idi kayiyi mipete mashinde a kudia, inyema tshilembi, kayiyi ne bukole.

⁷ Yerushalayime matuku aa udi mu dikenga, uvuluka bintu bia mushinga mukole bivuaye nabi ku kale. Tshikondu tshivua baluishi bakuate bantu bende, kakuyi muntu nansha umue umuambuluisha, bavua bamutshimune kusankabu, bualu uvua mushale tshintu tshia tshianana.

⁸ Yerushalayime uvua muenze malu mapite bubi. Ke pavuabu bamubipisha. Bonsu bavua bamunemeka, badi bamupetula mpindiewu. Bonsu mbamumone butaka. Ke mudiye umuka, mu maboku teketee, wenda utua mikemu.

⁹ Bubi buende mbumuenekele too ne ku muntumpu wende. Yerushalayime kavua muele meji ku bivua mua kumuenzekela. Eyi! Kabutu nkamukuate. Kakuena muntu nansha umue udi umusamba. Udi wamba ne: “Maweja-Nangila, tangila dikenga dianyi. Mona mudi muluishi wanyi untshimuna.”

¹⁰ Baluishi mbapawule bubanji buende buonsu. Yerushalayime mmudimuene muvua bantu ba bisamba bikuabu babuele mu nzubu wa Mvidi Mukulu wende. Ke bantu bauvua wewe Maweja-Nangila mukandike bua kababuedi muaba webe wa kutendelela.

¹¹ Bantu bende badi batua mikemu, bateketa mu maboku, bakeba tshiakudia. Bavua bashintakaja bintu bia mushinga mukole ku biakudia, bua kupetabu bukole. Yerushalayime udi utendelela, wamba ne: “Maweja-Nangila, tangila, umone mudibu bampetula bikole.”

¹² Nuenu bonsu badi bapitshila mu njila, luayi nutangile, nujadike ne: kakuena dikenga dikuabu bu dindi nadi edi, didi Mvidi Mukulu muntumine dituku divuaye mufike munda bikole!

¹³ Uvua mutume kapia ka mu diulu. Kukabuejaye munda muanyi. Kungelaye buteyi ku makasa, kunshindishaye tshianyima. Kunnyingalajaye bikole. Ndi amu nsama matuku onsu.

¹⁴ Udi mumone bubi bumvua muenze. Budi bu dijita mu tshianza tshiende. Budi bufika too ne mu nshingu muanyi. Maweja-Nangila mmuntekeshe, mmumfile kudi baluishi bandi tshiyi mua kutshimuna.

¹⁵ Maweja-Nangila uvua mupepeje bena mvita ba bukitu bonsu bamvua nabu. Uvua mundongoluele tshiluilu bua kunduisha, bua kuzaza nsongalume yanyi. Uvua munzaze, meme Siyone wa Yuda, bu mudibu bakama tumuma tua mvinyo mu tshikaminu.

¹⁶ Ndi ndila bua makenga aa, mpuekesha binsonji bianyi tshiyi ndekela. Udi mua kunsamba, kunkankamika udi kule. Bana banyi badi mu dikenga, bualu muluishi mmumpite bukole.

¹⁷ Nansha Siyone muolole bianza, utendakena, kakuena muntu nansha umue udi mua kumusamba. Maweja-Nangila mmumane kutumina bena mutumba ne bena Izrayele diyi, bua bashale baluishi babu. Yerushalayime mmumane kubipa munkatshi muabu.

¹⁸ Maweja-Nangila mmuenze amu bimpe, bualu mvua mubenge kuitaba ku meyi ende. Nuenu bonsu badi apa, telejayi bimpe, tangilayi dikenga dianyi: nsongakaji yanyi ne nsongalume yanyi idi iya mu bupika.

¹⁹ Mvua mubikile bavua bannange, bobu kunshiya nkayanyi. Batuangaji ne bafidi ba ngenyi banyi mbafue bonsu mu tshimenga, pavuabu bakeba biakudia bua kupeta bukole.

²⁰ Maweja-Nangila, tangila bukole bua dikenga dindi nadi, ne bunene bua kanyinganyinga kadi kantonda. Ndi ne dipampakana dikole munda muanyi, bualu mvua mukutombokele bibi. Mu njila, bana banyi kufua ku muele wa mvita. Nansha mu nzubu mudi amu lufu.

²¹ Bantu kumvua mikemu yanyi. Kakuena nansha umue udi unsamba. Baluishi banyi bonsu mbamane kumvua lumu lua dikenga dianyi. Badi ne disanka bua paudi unkengesha. Dituku diuvua muambe difike, bua bapete pabu dikenga bu dianyi!

²² Tangila bimpe tshikisu tshiabu. Ubenzele muuvua mungenzele meme, bua malu mabi anyi onsu. Mona mundi ntua mikemu. Ndi ne kanyinganyinga kakole.