Misambu 95 - MUKANDA WA MYIDI MUKULU

Diba dia kutendelela Maweja-Nangila

¹ Luayi tuelele Maweja-Nangila mbila ya disanka, tuele Dibue dietu, ne Musungidi wetu tunkunduluila.

² Tuye kumpala kuende, tuimbe misambu ya kumusankidila, tumusankidile ne misambu.

³ Bualu Maweja-Nangila, udi Mvidi Mukulu munene. mMukalenga munene udi upita mvidie yonsu.

⁴ Udi mulongolole tundondu tua mu buloba, ne mikuna minene mile idi yende.

⁵ Mayi manene kabidi ngende, bualu yeye nguvua muafuke, ne buloba yeye nguakabufuka.

⁶ Buelayi, tuiname, tuinyike mitu, tutue binu, kumpala kua Maweja-Nangila, Mutufuki wetu.

⁷ Bualu yeye ke udi Mvidi Mukulu wetu, tudi bantu badiye ulama, tudi tshisumbu tshia mikoku tshidi tshianza tshiende tshilombola. Lelu, nudi mua kumvua tshidiye wamba anyi?

⁸ “Kanubengi mua kumvua, bu muakenza bankambua benu ku Meriba, diba dia bualu buvua buenzeka ku Masa mu tshipela.

⁹ Bavua bamfunyine, bavua bantete, nansha muvuabu bamone bimvua muenze.

¹⁰ Bantu ba mu tshikondu atshi kuntonda, bidimu makumi anayi, meme kuela meji ne: Bantu aba mbatomboke, kabena bamanye tshimvua ntekemena kudibu.

¹¹ Nenku ke meme kuditshipa ne tshiji ne: kabena babuela mu buloba, bumvua mubalongoluele bua kuikishabu nansha.”