Misambu 94 - MUKANDA WA MYIDI MUKULU

Mvidi Mukulu udi usombuela bubi

¹ Eyi, Maweja-Nangila, Mvidi Mukulu, udi usombuela bantu. Mvidi Mukulu udi usombuela bantu, patuka.

² Mulumbuluishi wa bantu, juka umonangane ne bena kapeja, ubapingajile bubi buvuabu benze.

³ Maweja-Nangila, bantu babi nebikale ne disanka too ne diba kaayi?

⁴ Bantu bonsu badi benzela bakuabu bibi, badi bakula bibi ne kapeja, baditambisha.

⁵ Maweja-Nangila, badi bakengesha bantu bebe, banyanga bumpianyi buebe.

⁶ Badi bashipa mukaji mukamba ne muenyi, bashipa bana ba nshiya.

⁷ Badi bamba ne: “Maweja-Nangila kena umona, Mvidi Mukulu wa Yakobe kena umanya.”

⁸ Nuenu batshimbakane ba pa buloba, nuadimuka! Nuenu babule ngenyi, nenuele meji diba kaayi?

⁹ Maweja-Nangila ngudi muase muntu ditshi, apange yeye kumvua? Yeye ngudi mufuke disu, apange yeye kumona?

¹⁰ Yeye ngudi ubela bisamba bia bantu, apange bukole bua kubinyoka. Yeye ngudi ulongesha bantu, apange kuikala ne lungenyi?

¹¹ Maweja-Nangila udi mumanye meji adi muntu wela, mmuamanye bimpe, adi bu lupepele.

¹² Maweja-Nangila, muntu uudi ubela, ne uudi ulongesha ne mikenji yebe, udi ne disanka!

¹³ Neikale ne ditalala dituku dia dikenga, kadi umbuile bantu babi dijimba.

¹⁴ Maweja-Nangila kena ubenga bantu bende, kena ulekela bumpianyi buende.

¹⁵ Muntu muakane neabinge tshiakabidi, ne bantu bonsu ba muoyi mujalame, nebamulonde.

¹⁶ Udi mua kunsungidila kudi bantu babi nnganyi? Udi mua kungakuila kudi benji ba malu mabi nnganyi?

¹⁷ Bu Maweja-Nangila kayi mungambuluishe, mvua kuikala mufue.

¹⁸ Maweja-Nangila, misangu imvua ngamba ne: “Tshiena mua kuimana kulu”, malu ebe mimpe avua angimanyika.

¹⁹ Pamvua nsumpakana bua ntatu, wewe kunsamba, kunsankisha kabidi.

²⁰ Udi mumvuangane ne bakoshi babi ba nsambu aba, badi bangata mikenji bua kukengesha bantu anyi?

²¹ Badi belela bantu bakane tshifufu, bapisha muntu udi kayi ne bualu.

²² Kadi Maweja-Nangila ke wanyi nzubu mukolesha ne bimana, Mvidi Mukulu wanyi ke dibue dimvua nsokomena.

²³ Maweja-Nangila, Mvidi Mukulu wetu, neabapingajile malu mabi abu, neabajimije bua malu abu mabi.